Январьла 29-личиб Дагъиста БекI В.Ва­си­льевли, «Дагъис­тан Республикализир шила хо­зяйствола культураби ва гье дашахънила аги-кьяй­даличила» ибси ма­съ­ала ахъбурцули, со­ве­ща­ние дураберкIиб. Илар бу­­тIа­кьяндеш дариб Фе­де­раль­ный пачалихъла бюд­жетла гIилмула «Фе­де­раль­ный гIилмула духъ­луми да­шахънила центр» ибси уч­реж­дениела директор А.Сол­да­тен­конира.

Совещание ибхьули, регионна руководительли рес­публикала шила хозяйство гьар шайчибадли гьалабяхI баш­ниличила багьахъур. «Гьанна гьатIира ункъли хозяйство ахъбикIахъниличила саби масъала тIашбатурси. Лертигъунти сурсатунира пай­да­ладарили, сабухъуни им­цIа­ди­кIахъесли. Нушала улкализирти ва респуб­ли­кализирти хIукуматла гьуни чебиахъути, гIилмула ва техникала сурсатуни Дагъистайзир цаладяхъес нушаб дигахъахIери. Иш столла гIела кабиибтазивадли гьарилли балуси саби сегъуна тяхIяр гIяхIсил: пакетуназир гье дирцес яра — тоннабадли культураби. Нуша пикридухъесил масъала саби ил. Нуша ишбархIи къайгъиличил гIердаэс гIягIниси даражаличирра», — буриб В.Васильевли.
ГIур илини духълуми дашахънила гIилмула Федеральный центрли Дагъиста ван­заличир гьанна 20 дус духъ­лу­мала ахъси даражала гье кай­сули диъниличила багьа­хъур. Нушала улкала лерилра мер-мусаличир илди исра исули сари.
А.Солдатенконира республикаличил институтлис бархбасуни дузахъес дигниличила багьахъур.
Илини буриб республикала шила хозяйствола кьялилизиб духълуми дашахънили белгиси мер бурцули ва гьалабяхI башули саби или.
«Дагъиста тIабигIятла сурсатуни гIяхIти сари дахъалгъунти духълумала ва цIедешла гье дашахъес. Республикализиб гье дашахъуси центр акIахъалли, дахъал масъулти ирзнилис кумекли бетарар. Дурала улкназирадли хIейсули нушани гье, илдас дирцесцад дашахъахIелли гIяхIсири», — викIи ил.
Специалистунани буруливан, гIяхIси даражала гье де­гIал­ли, кайсуси сабухъра им­цIа­бикIар. Республикала агропромышленный центрла гьала тIашбизурси масъала арзахъес ил­гъуна бетуц кумеклира бетарар.
Ахъбуцибси масъалала чевкад гъайухъун ДР-ла Пра­вительст­вола Председательла заместитель, ДР-ла ши­ла хо­зяйствола ва продовольст­вие­л­а министр ГI.ГIяб­дул­­мус­ли­мов.
Северный Кавказлизиб гIяхIсигъунализи халбируси халасигъуна аграрный регионни сабси республикализир акIахъубли сари гье хIядурдирути 4 хозяйство. Илдазирадли хIябал ризкьила культурабала сари. Илди дузули сари Къизларла районнизибси «Нива» ООО-ла, ил районна ва «Сириус» ООО-ла, Хасавюртла районна Кировла уличилси опытла-производствола хозяйствола хьулчиличир.
Республикала шила хозяйствола предприятиеби гIяхIти ризкьила ва духълумала гьеличил гIердурцнила даража 3-5 процентличи халбирули саби. Республикала дурарадли дихули сари цархIилти гье.
Республикала агропромышленный комплексла ункъли гьалабяхI башуси кьялили бетаурли саби, министрла гъай хIясибли, духълуми дашахъни. БурахIелли, 500-600 тонна регионна дурала мер-мусаличи дицес ардихули сари. Илкьяйда бетарули саби духълуми садаибси манзиллизиб. ГIурилти замунтазир илди дихIести шуртIри агни сабабли, духълуми камли сари. Иличирли республикала базуртачир ва тукентазир дурарадли хибти цIедеш ва духълуми дирцули са­ри. Илдира сегъуна даражала сарил белгили ахIенти.
«Дагъиста аграрный гIил­мула центр» ФГБНУ-ла баян­ти хIясибли, Дагъис­та духъ­лумала ва тIутIила се­лек­ционна-опытная станция хIядурли саби капустала сецад-дигара гье гьаладихьес. Ил барес вирар вягIда ва илди дурхахъниличи вирхести баянти диаллицун.
Гье дашахъантани цауркIли бурулри илгъуна шила хозяйствола шали гьалабяхI башахъес хIяжатли биъниличила. Иличирли хIянчила меранира дирар ва дурарадли дурхъали гье исесра хIяжатдеш хIебирар. Илгъуна хIянчи бетарар са­ни­гIятлашал хIядурбарибти хIян­чи­зартира хIяжатти техникара диалли.
«ИшбархIи нушани ахирласи хIянчи бекIбарес хIяжатли саби, белгибарес хIяжатли сабил илгъуна программа яра ахIенал. Амма белгили бурес вирар, духълуми дашахънила бетуц гIелабяхI башар гIяхIси даражала гье хIедиалли», — буриб ДР-ла Правительствола Председатель Артём Здуновли.
«Нушани чебиулра ил хIян­чи гьамадси хIебиъни. Леб гьа­лабдеш багьанданси абзра. Ил­ди лерилра масъулти гьа­лак­хIе­ди­кIули арзес хIя­жат­лира саби. Нушани гье дашахънила хIянчи жигар­чеб­бирехIе, хIя­жат­тицад гье дакIахъес хIедиахIелра, сеннира гьаладяхI дашахIе», — буриб регионна БекI Владимир Васильевли.