Ишди бурхIназиб нушала улкализир Крым, Севастополь Россияличил сагадан цахIнадяхъниличибад 6 дус дикнилис хасдарибти шадлихъуни дурадуркIули сари. Наб дебали гIяхIдизур Крым Россияличил цахIнабяхъили ца дус дикили гIергъи Крымлизивадси поэтли делкIунти назмуртала чумал тугъ. Даргала мезличи шурдатурли, нуни хIушабра илди делчIахъес гьаладирхьулра.
Арбякьун дус… «ХIуша нешличил
Секьяйда хIердирулра?» ибхIели,
«Нуша нушала хъулирра,
Россияла узити халкьличил хIердирули»
ДикIес дирулра.
Крымлизивадси поэтли ца дус Россияличил барх хIербирути байхъу островла (полуостров) халкьла шайзибад таманси ва бархьси жаваб лугули сай. Наб илала жаваб дебали гIяхIбизур. Наб имцIаливан гIяхIдизур илала «Нуша нушала хъулирра» ибти дугьби.
Нушани гIяхIил балуси саби, сецад дявти кадикибтил Россияла солдатунала ва матросунала дурала улкнала гIярмиябачил, Крымла халкьла хъархIерагардеш хIербарес багьандан, ил Россияличил барх калахъес багьандан.
«Севастополь Россияла асилдешла шагьар саби» («Севастополь – город русской славы») бикIули бири нуша диштIахIели, илкьяйда лукIусири Россияла тарихла жузазибра урусла писательтала ва поэтунала макьалабазибра. Крымлис ва Севастопольлис багъишладирутири Россияла чебяхIти художникунани суратуни, композитортани музыкала произведениеби…
Дила макьалализиб наб бурес дигуси ца саби: се бирусирив урусла поэтунас ва писательтас Крымла ванза, сен илдас илцадра Крымлизи башес, камси замана биалра илаб хIербиэс дигусирив. Гьала хили, наб нуни жаваб чарбирулра: нушала рухIла давлала бегIти адамтас Крым сунезиб бамсри ахъес вируси жагаси ва ванаси мерцун ахIенри. Ишар алкIутири рухIла давлала адамтала гIяхIтигъунти произведениеби. Писательти ва поэтуни ишаб гIямруличи цархIил журали хIербикIутири. Крымла больницабазиб ва санаторийтазиб илдазибад имцIатани гIямру багьандан бебкIаличил дяви бирусири, ва саби чедибиркутири. Крым илдас халаси мягIнила, дебали дурхъаси мер сабри.
А.Пушкин бегI гьалав Крымлизи, пачала хIукуматли дугIеибхIели (южная ссылка), 1820-ибил дуслизив вакIибсири. Байхъу островла жагаси тIабигIятли ил сунела гIяхIтигъунти произведениеби делкIахъес гьирвариб. Пушкинни илхIели белкIунси саби поэма «Бахчисарайла фонтан». Илаб сабри поэтлизиб бегI гьалаб востокла исламла назмуртачи иштяхI акIубсира. Ил иштяхI бахъхIи поэтлизиб калун ва 1825 ибил дуслизиб северла ссылкализиб, Михайловское шилизиб, илини исламла дурхъаси жуз Кьуръан белчIунсири. ХIера, се викIулил ил Кьуръайчила:
«ДугIеибси бархIи дигIянси гIинкъиб
Нуни белчIунсири муриси Кьуръан…» ва гIурра:
«Нурли ухул Кьуръан
Халкьлис бархьнилис,
Халаси баркалла
Дурхъал Идбаглис»
Крымлизирти хIябал ши-шагьарли Пушкинна у бихули саби. Крымла шел шагьарлизир Пушкиннис памятникуни тIашдатурли сари. Гурзуфлизиб А.С.Пушкинна музейра бузули саби.
Крымлис багъишладарибти произведениеби хIясибли Пушкиннис гIяхIли-декIар гIелаулхъули ахIен И.Бунинра.
1825 ибил дуслизив Петербурглизивад Кавказлизи аркьуси А.Грибоедов 3 баз Крымлизив калунси сай.
Н.Гогольли «Тарас Бульба» бикIуси повестьлизир 15 ибил даршдусла Крымла халаси ши ва иларти гIядатуни чедаахъили сай. Крымла Сакский курортла мерличиб Гогольлис памятник-бюст тIашли леб.
Л.Толстой хIяйна Крымлизи вякьунси сай, ва илини илар цугли кIел дус деркIибти сари. 1855 ибси дуслизив Толстой, Севастополь батахъес багьандан, Англияла ва Францияла гIяскуртачи къаршили ургъули калунсири. Авэсил бастионнизиб кабикибси дергълизив урусла чевяхIси писатель командирли вирусири. Илала «Севастопольла хабурти» бикIуси жузлизир илар кадикибти анцIбукьуначила бурули саби.
А.Чеховли чумал дус Ялтализир деркIибти сари. Ил, тухтур виъниличибли изайзивад сагъхIейрни балукъи, сай вебкIес Ялтализи арякьунсири. Ялтализиб илис тIашбатурси памятникра юрт-музейра лер.
М.Волошин, лебтанилра балули, Крымла поэт сай. Илини Коктебельлизибси сай-вегIси юртлизиб «Поэтла Юрт» барибсири. Ила поэт сайра или гьанбиркуси гьарил адам ацIес вирусири. Гьайгьайрагу, ила ишди удиб гьанбуршути поэтуни ва писательти имцIали башутири: Мандельштам,Брюсов,Булгаков,Цветаева,Гумилев,Зощенко, Горький,Чуковский, Белый ва цархIилти.
23 дус виубси А.Горький Одессализивад Крымлизи хьурали вашули вакIибси сай. Илар пикридарибти сари илини сунела «Лачинничила далай» , «Хан ва илала дурхIни».
1896-1903 — ибти дусмала дуцIрум А.Ахматовани гьар дус Крымлизир, Севастопольлизир, дуркIутири. Илала гIямрулизиб ва кьисматлизиб Крымли халаси, бекIлибиубси мер бурцулри. Ил илис сунела бегIлара ахIерси ванзали бетаур. Крымли Ахматовала назмуртазиб халаси, сунечи хасси мер буциб.
М.Цветаевара С.Эфронра чула рурси Алячил барх М. Волошинничи Коктебельлизи бакIибтири (Цветаева гьаларра чуйнара ила ракIибсири). Волошинни илди декIарси юртлизи мерлабариб. Илар М.Цветаевани дахъал назмурти делкIунтири: «Дила назмуртас», «Аркьулри, набчи мешули ахIенси», «ХIуша, дила мякьларад шулумдулхъути» ва цархIилти.
К. Паустовский, бегI гьалав Крымлизи вакIибхIели, 14 дус виубси гIулухъа сайри. КIинайс ил Крымлизи 1916 ибил дуслизив вакIибсири. ИлхIели чебаибси саби илини Бахчисарайла кIялгIя. «Романтики» бикIуси роман лукIесра илхIели вехIихьибсири. 1933-1934 — ибти дусмазив писатель Севастопольлизив хIерирусири ва Крымличила жуз белкIес баянти учидирхъутири. Илис имцIаливан жяв заманала Крым гIяхIбилзусири. Илар делкIунти сари илини «Бетахъибси бархIи» ва «Кахси уркIи» бикIути хабуртира.
А.Грин жагьти дусмала заманара Крымлизи вакIибсири. Матросунала ва солдатунала ургар революцияличила пикруми тIинтIдирни багьандан, ил Севастопольлизибси туснакълизи ухIнаили калунси сай. Илав лукIесра вехIихьибсири. Чумал дус ардякьи гIергъи, 1923 ибил дуслизивра, писатель Крымлизи чарухъун. Илини лерилра сунела халати произведениебира Крымлизир делкIунти сари. Гринни ишаб белкIунси саби сунела хьунул Нинас багъишлабарибси бегIлара машгьурси «Шала-хIунтIена ялканти» («Алые паруса») бикIуси повесть.
Нуни чедиб гьанбушибти писательти-поэтуницун ахIенри Крымличил чула гIямру дархдасахъунти. Гьамадли бирар ила бакIибтичир хIебакIибти писательти ва поэтуни бейгIес. РухIла давлала бегIти адамтас Крым дебали дурхъаси мер саби, цархIилван буралли, ил рухIла давлала урунж саби.
Ил нушала бегIлара дурхъаси мер Украиналис, США-лис, НАТО-лис лугусив? ИлданикIун ила бусягIят чула дявила базаби кадалта ва нушачи чула ракетаби дяхIчииу. Илала чеди ил дурхъаси мер нясра биру. Ил барахъес сеналра асухIебирар.
