ИшхIелла замана дебали аргъбаибсили бетаурли саби жагьилти хIянчиличил гIеббурцнила масъала. СенахIенну чебяхIси даражала белчIудила заведениеби тамандарили, дипломти чинаралра пайдалахIедарили, хъули кабиибти специалистуни бархIиличи-бархIи бахъбикIухIели. Илдигъунти аги-кьяйдализиб, гьайгьайрагу, гIулухъабала багьудлуми касес сегъуналра иштяхI кахIевлан. «Се барес учIусира, чинабалра багьуди хIяжатхIебиркули биалли», — бикIутира ахъес асубирар. «Юх, хIуша хатIадиркулра», — чIумали бурес вирус нуни илдази.

ИшбархIи багьудлуми агарси адам сегъуналра бетуцлизив гьалавяхI вашес хIейрар. Арц дейгIесра багьудлуми диэс гIягIнити сари. БегIлара гIядатласи баркьуди баресалра бажардихIеркалли адам, гIур секьяйдали хIерируси? Гьанна лерилра баркьудлуми вачар-чакарличил диалли дархдасунти? Ил багьандан , бегI гьалабси яргализиб, балес хIяжатси саби математика. Гьайгьайрагу, гьарилла сунела иштяхIуни дирар. Цалис дигахъу математика, цархIиллис — биология, хIябэсиллис — география. Илди иштяхIуни хьулчили дуцили саби челябкьлализиб сунес дигуси санигIятра чеббиркIуси. Ил шайчир гьанна гIяхIцад декIар-декIарти конкурсуни, проектуни, далдуцуни дурадуркIули сари нушала республикализирра. Илдани жагьилтас кумекбирули саби гIямрулизиб чус дигуси дякь чеббикIахъес.
ХIера, илдигъунтазибад ца саби WordSkills санигIятунала шайчибси абз. Гьалабван жагьилти-ургабси «WordSkills 2020» бикIуси абзла регионна бутIа ахирличи бикиб. Илизиб школала бучIантачибад бехIбихьили, студентуначи бикайчи гIяхIцад жагьилтани бутIакьяндеш дариб.
БутIакьянчибас чус дигуси санигIятличил дархдасунти хъарбаркьуни дедлугути сари. Илдани кумекбирули саби школализиб бучIули лебалтас, халабаибхIели, сегъуна санигIят чус дигесили бетарарал ва илизир сегъунти къияндешуни лерал аргъахъес, чули ил санигIят бузахъес бирарал белгибарахъес. СанигIят декIарбарили, бучIути студентунас биалли, ил гIяхIси имкан саби университет таманбарайчи чула санигIятлизиб гьалабяхI башес. КIинайс хIянчи бузахъухIели, илдас гьамадли бирар, сенахIенну хасси бетуцлизирти дигIяндешуни дала, устадеш имцIадирар.
Гьайгьайрагу, илдигъунти далдуцуназир бутIа­кьяндеш дарнира жагьилтас дебали мягIничебси саби, амма, илдазиб чедибикес имканбакIалли, гьатIира гIяхIси саби. Чедибикибтас гьамадли бирар чула са­ни­гIятличил бархбасунси хIянчи баргес Россияла ор­ганизациябазиб яра цархIилти кьадричерти мераначиб. Умутбихьес вирар хIянчи бедлугантани илди чу­чи жибирниличира.
Илдигъунти ва цархIилти гIяхIти имканти гьарг­ди­рухIели, нуша, жагьилти, илдачил пайдала­хIе­­дикIни, бегI гьалабси яргализир, нуша сарра гIяйибла дегIти. Селра хIебирули виаркайибсилис чи­на­балра хIянчи бируси ахIен. Узес дигусилис биалли мурталра хIянчира бирар, бузерилизив гьалавяхI вашести детуцунира дирар.