Жагьдеш хъилизирси манзил

1940 ибил дус.
ДуцIрумла бархIехъ. Урку­хъла шила дублабси гIи­низла мякьлав Аттабекхъала Мя­хIяммад вахъхIи хIерлири, гIи­низ­ли­чи убяхIихъуси дякь­личи хIери­кIули, хIул­би изес­дя­хIилри.
«Марли, ГIяшура хIера­кIе­сара? Гъай гибсири кьалли? Наб­кIун илизи ур­кIи буре­с гIягIнили саби: хIябал дус гIур я чераэс, я гъайэс хIе­бир­кур. Умут агарли гьара­хъси ар­хIяличи дуравхъес хIябилра хIей­гули левра. Наб илизибад аргъес дигуси ца гъай саби…» – пик­ри­икIулри ил, кьакьавакIибдешли бекI­ли­чибси маза-кьапIа чебра исули, чера кабиръули.
Ахирра-ахир, кункти гунзри че­ди­хесдяхIиб. «Шукру биаб, шинничи ляркьуси цархIил хьунул адам ма­риаб. Сурсур жярла кьадалиу ди­гIя­никили сецадхIи уусира?» – Мя­хIям­мадла ил гьанбикра булхъран къянари гIелакахъибси чехьери рурси да­кIу­рухънира цугдикиб. Уркухъан гIулухъас кьалли сунес ахIерси исбагьи багьлали кайцIути гунзрачилра рагьес замана баилри: чумал дус гьалабал илини жагьилла хIяланачи ургьур чехъибси сабри.
— ХIябилра кьанни ракIири: хIечи хIерли хIянирули бара калунра.
— Тамашала леври? РакIес гьамадли викIулрив?
— Иргъулра, ГIяшура, черрерхи. Бархьли бурасли кьалли, дугира бакIили, шалара дикайчи хIечи хIерли уира.
— Се саби хIела бурусилра?
— Рахъ къалабасира лерри. Ши бархьбатес чевкъули саби. Ну савли аркьулра…
— Чина?
— ГIярмиялизи. ХIера, иш военкомла повесткара, — МяхIяммадли шалбарла ки­сализибад кIапIи дурасиб, ГIяшурас гьабуциб.
Рурсили кагъар сунези са­хIесиб. ГIур хумар-хумарли иб:
— ГIярмиялизи лебилра уршби арбикутив?
– Арбикути саби, ил ВатIа гьалабси къуллукъ саби.
– ЖагIял аркьулра викIуду?
— ЖагIял.
— Нуни се бируси? Набзи хIуни се бурес дигулри?
МяхIяммадли, ибкьбикибси кьакьари гьаргбирули, шутри кьуртIаиб.
— ГIяшура, наб хIу ца сарри Ур­кухъла шилизир лерси… Наб хIу ахIерсири… Набчи хIерли кали дигахъира…
— Халаси къияндеш хIе­биал­ли? Шилизирси ну чина риркусира?
— ЦархIиллис шери аррукьядли…
— КьакьамайкIуд, цархIил агара, я вирхIейрар!
— Баркалла, ГIяшура, наб ил гъай сабри хIезибад аргъес дигуси. Шакдеш агарли хIябал дус аркьян. Ну хIечи чарулхъас… Ну­ша талихIчерли хIер­ди­рех­Iе…
Рахли ГIяшура ришхантличил гъинчIризур.
— Набчи хIерли руэн викIули, хIуни ца мятIушка хIе­раргадли?
— Аллагьличира, дила хIулби чичилра хIерхIедилзан, ур­кIи чизилра гъайхIебулхъан. Илди гьанна хIела сари. Иргъулрив, ГIяшура? Ну лявкьяс хIечи!
— Иргъулра. Гьунби гIяхI­дираб!
ГIяшурани гъай тамандиъни аргъахъиб. Биалра, МяхIяммад арукьес къалабахIейкиб. Рурсиличи цIацIали гъамиубли, шивкIивбариб:
— Черрерхи, асубиралли, хIу гьанриркахъес хIела шайзибад савгъатла матяхI дигахъира. Ил ишаратли дила гIярмия гьамадбирахъу.
— Дила савгъатла матяхIуни агара. ДукIумила иш явлухъ саби лебси, — ГIяшурани алгъай някълизи гъяжбарибси явлухъ чебаахъиб. ХIули липIла манзиллис хъямикунси МяхIяммадли ил сунезиб бетаахъур.
— Иш явлухъ наб баибси саби. ГIяхIли кален!
ГIинизла гьалар рурсира рархьратурли, МяхIяммад илмадан гьарахъикиб. Илини иргъулра: урхIли чебаалли, гъай-мез тIинтIдирар, бугьтанчибани сунес ахIерси рурси язихъриру.
Чина хабарри итхIели я МяхIям­мад­лис, я ГIяшурас ватIа гьалабси къуллукъ хIябал дусла ахIи, урехи-балагьла вер­хIел дусла бетарнила?..

Галгаличиб – цIудара къяна
Поездла тIашхIедилзути кьутIуръай МяхIяммад Аттабековла бекIлизир дам дяхъибхIеливан сабри. КIел жу­мягI­ла гьуни анцIбукьеси сабри. АнцI­дукьири улкьайларад чедиути ва шел­гIер­дулхъути зумати вацIурби, халати аварагуни, дягIути ва багьлати хIуркIби. Илцад халати мулкани сунела пачалихъла диъниличи ца шайчибад илини пахрура бирулри, илис тамашара билзулри, сенахIенну илгъуна гьарахъси архIяличи МяхIяммад гьалав дуравхъунси ахIенри…
Амур хIеркIла дуб. Японияла дазу. Илаб сабри дубурлан уршилис ва иличил барх лебти юлдашунас къуллукъбарес гIягIниси гIярмия. КIинайс илдас гIячихъбиуб, саби се багьандан Японияла дазуличи баахъибтирил. СССР-личил ил улка даршули ахIенри, чуйна-чуйнара Японияла самурайтани дазурби дулъути чябхъинти дурадеркIилри: ил багьандан Дальний Восток чIумали хIербарес гIягIнисири.
М.Аттабековлис ца дус се­лрац­ад анцIхIебукьун. Казар­мализив цу­нухъунхIели, илини ГIяшурани пешкешбарибси явлухъ дурайсулри, иличил анда-дяхI хIяршдирулри, гIур авкабарили кисализи ди­гIян­бирулри. ЛукIулри кагъурти бегIтачи ва ГIяшурачи. ХIя­­дурдешла хIябал баз ар­дякьунхIели, ил сержантла школализи кьабулвариб, дявила устадешла багьуди касиб.
Ца бархIи биалли, казармала гьалабси пурпила зурба гал­галичиб цIудара къяна да­кIу­бухъун ва ахъли «къя-къя» или тIамадариб. ГIе, гIе, бурни хIясибли, ил вайти хабурти дихан бирар, адамтас хIейгахъу ил арцан. МяхIяммад, къянала жилис жавабли биахъубли, «гIяхIла хабар, гIяхIла хабар» или, тикрарбаресра бажардиикиб.
Сепайда, гьатIи, тревога гIеб-гIе­ба­гьур: чумал минутла гIергъи казармала гьалаб тIашти гIярмицуначи командир ахъли дугьаизур:
– Кахси дергъ бехIбихьили саби. Не­мецунала гъармукаби нушала улкаличи чебухъи саби, нуша дячIес, нушала пачалихъ буцес ва палакатбарес кьасбарили сай Гитлерли. Юх, хIебирар ил секIал! СССР-ла ургъан хъямчибас кьукьмусхIеркур, тарихлизибра илгъуна анцIбукь лебси ахIен. ГIярмицуни! Нушара ишар лехIкахъили дуэс хIейрехIе, улкала кьисмат ирзухIели. Ил багьандан кIел бархIила духIнар гIеладяхI чардухъес хIядурдирехIе. Фашистунас гьуни гIекIес нушала чебла саби!
ГIурра поездла анцI­дукьести кьу­тIу­ръа­ла. Свердловск шагьар. Илаб гIяр­ми­цуни жура-журала полканази мерлабирулри. Аттабеков 13 ибил минометунала полклизив ветаур. Иличи илмадан хIябал базла минометчикла курсани хIерли сарри.
ГIярмиялизирти гьалар-гьаларти бурхIназибадал Мя­хIям­мадли гьанбикунала тетрадь бузахъес вехIихьиб. Хъум­хIертести анцI­бу­кьу­на­чила, детаур-диуб­та­чила гьар бархIехъ лукIули вири.
ХIера, илала тетрадьлизибси ишгъуна белкI: «Халаси хIямамлизир нуша дазахъира, сагати палтарли ва ярагъли дегIдарира, гIергъила бархIи фронтлизи дархьес пикрибариб.
Ворошиловградлизиб ми­­номет­чи­­ку­нала сагаси полк акIахъуб. Иш гьакI­лис гьарли-марли дявилизи бурхьуси, душ­мантачил бургъес хIя­дурбиубси. Ил полклизивси Чита шагьарлизивад гIяр­­мия­лизи живарибси Ткачев би­кIуси урус урши набчил гьалмагъикиб. УркIи гьаргси, къай­гъичевси ил гIяхIизур, илала дурабадра, нуша кIелра цугли дергълизира дархьира…»
«… Душмантачил цаибил дергъ Волково бикIуси шила дублаб бетаур. БегI гьалар илар дяхIягиб набчи кабушибтала жаназаби, бяхъибтала цIум-цIу­мъала ва, гьайгьайрагу, дявила урехира кахдешра. Гьанбиркур, гьужумличи дурахIебухъунти кIел бургъан, вершабази ва пандахьибази халбарили, кабушахънира. Бахълис гIибрат сабри. Ил бархIи Григоровка бикIуси шира немецунази акьубатахъурра, минометлизивад иртули душмантала ца туп агарбарира. Ил цаибил гьунар сабри дила ургъан сайливан. Командованиела шайзибад наб баркалла багьахъур, ва ну КПСС-ла къяянази кьабулварира…»
«1944 ибил дусла мартла вецIну шу­ра. Нуша Крымлизи даахъира. Ил­хIели ну Украинала 4-ибил фронтла 993 ибил полкла стрелковый батальонна минометчикунала ротализив сайри. Крымлизиб фашистуни бемжурси ягълавла кабатуртиван сабри. Чебашуси нушала гIярмияли илди сабемцIахъурлири, биалра, чули дуцибти мер-муса дархьдатес къалабали ахIенри. ХIябал бархIила духIнар авал гьужум детерхур, душмантала ва нушала кабушибти бургъантани, къада хIеркIла къаркъубаниван, авлахъ бицIахъиб. Илди балагьла бурхIназир сеннира нушала детаур Таганали, Джанкой, Симферополь, Бахчисарай ва гIяхIцад цархIилти диштIати шими…»
Аммаки МяхIяммад Аттабековличи ва иличил барх бургъути минометчикуначи пехоталичил цаберхурси гьатIира балагьла гьужум хIерли сабри. Сапун-дубура! Севастополь шагьарла гьалабси къала!

Сапун-дубура
1944 ибил дусла май баз.
Улкала ва ХIунтIена ГIярмияла халал И.Сталинна чIумаси хъарбаркь Крым азадбалтути бургъантачи баиб: «Лерил цIакьани пайдаладарили, Севастополь ша­гьар душмантазибад азадбатес!»
Ил хъарбаркь бетерхахъес багьандан, гьала-гьала Сапун-дубура немецуназибад кебасес гIягIнилири. ЧIянкIли илала гIергъи, Севастопольлизи гьуни гьаргбирулри.
Майор Дмитрий Скворцовли минометчикунала батальон кьяшмачи тIашбатахъур. Бургъанти хIерлири, чула командир гьар мурталраван кьяркьли гъайулхъан или. Юх, иш гьакIлис Скворцов бургъантачи малхIямли дугьаизур:
— АхIерти адни-уршби! Крымла кьисмат ирзуси гьужум нушачи хIерли саби. Пехоталичил дарх нушара Сапун-дубурличи аркьути сарра. Ил ванза нушала саби, хIебиалли, ил нушачи хIерли саби, нушагIебли саби. ИшбархIи нуни чилалра жан мяхIкамдарес хIейрус, аммаки хъуммартидая, гьарил алхунси ургъан ЧебяхIси ВатIайс марси гъабза сайлин халкьла уркIбазив даимлис кавлан…
ГIянручI окоплизив рахаурси МяхIяммад Аттабеков юлдаш Ткачевли чеваргъахъиб:
— Иргъулрив даргудути гIярадабала ряхяма? Гьужум бехIбирхьули саби.
— Иргъули ахIенра: нуни бикьуси туплагъуна хIела тIама саби.
— Дати масхурти! ХIу урухкIули ахIен­рив?
— ХIярхIубала заблизивад чи урух­хIе­кIара?
— Дила уркIира кахли саби, гьалмагъ Аттабеков.
— Сен или викIуда?
— ИшбархIи гьужумлизив вебкIес хIейгулра.
— ЖагIял, царахIел…
— ИлхIели селра ахIен.
— ГIяжаибси ургъан хIейадли?
—Балулрив, дила гелешмеш Анастасиячибад кагъар касира. УркIи разили саби: ил набчи хIерли сари, ил дила жавабличира хIерли сари.
— БелкIен гьатIи!
— БелкIира, сепайда, бархьес замана агара, хIунира чебиуливан, дергълизи дурадулхъуси сягIят гъамбиубли саби.
— Эллелей, юлдаш Ткачев, гелешмешличи кагъар бархьес бикалли, веб­кIес хIядурли валанри. Илцад халаси кьад­рила бегI сабив хIела жаваб?
– Саби, саби…. Анастасияни белкIи сари, ну дергълизи­вад чархIевхъаслира, набчи­ хIерли, наб марли гIямру дур­­кIис или. Наб, дила узи, Анастасия илкьяйда кьур­банриубли хIейгахъира. Нуни илизи цар­хIил­лис шери рукьяхъес ихтияр барира, иличила кагъарлизи белкIра белкIунра. Рахл­и иличи баалли…
– Биур. Сапун-дубура ахъиб­­­хIе­ли, замана бирар ка­гъар бар­хьесра. ХIу къала­ба­май­кIуд веб­кIес, чис се кьадарлил, багьес хIейрар.
– ХIебалас, бургар хIу ви­кIусира. Нагагьладан ну ми­цIирти-ургав кахIеласли, хIуни бархьа дила кагъар. Гъай биха!
Аттабековлис гIур жаваб чарбарес бетхIеур.
– Гьурра! ГьаладяхI! – ахъбуцили тапанчара, командир гьужумличи дуравхъун. Илис гIелабад, окопра бархьбатурли, лебилра бургъантира, гьарбухъунси хIеркIла кьуллаван, Сапун-дубурличибяхI батбихьиб…
«Тупала даргудути гIярадаби. Пулеметунала хIярхIубала къири. Бургала чедир садемцIурти душмантала самолетунани лайдикIути бомбаби. Ил кьияма сабри, кьиямара ибхIели, адамтачил бархли гIяйибагарси ванзара цIумбикIуси. ЦIали алкунси, хIили иркуси. Дила мякьлабти гьужумлизи каберхурти бургъанти цалис гIергъи ца кабиркули саби: илди кьяшми дуцили ванзализибад дураберхурси хабарла аждагьали бугутиван сабри…» — бучIулра Аттабековла белкI.
Сапун-дубура дурхъали кабизур душмантасра, гьайгьайрагу, нушала бургъантасра. Тарихла баянти хIясибли, ил гьужумли 30 азир фашист арбухиб. Сецад хIей­геси биалра, кIинали бахъал нушалара алхун.
Сунела кьисмат гьала хили балу­сигъуна уилри Аттабековла юлдаш Ткачев. Сапун-дубурла бекIличи баибхIели, ил душма хIярхIяли варгиб. Ца гъайра бурес хIейубли, таманкайуб. Дунъяличи гIяжизли кIайдизурти юлдашла хIул­ба­чибад МяхIяммадли хъат чеди­бер­кIиб…
ГIергъила бархIи илини Ткачевла кагъарра хъули бархьиб.

Душма ванзаличиб
М. Аттабековла белкIана­зи­бад: «1945 ибил дусла апрель баз. Нуша не­мецунала Кенигсберг шагьарлизи даилра. Бургъанти сагали акIубтиван гъирачебли саби, сенахIенну гьанна дергъ душма ванзаличиб даимбиубли саби. Чедибдеш гъамли биъни ва ил нушала бирни ашкарси анцIбукь саби. Нушала гIярмияли немецунала шагьарла гьарил кьакьа гьамадли бурцули саби: душманти, ашкарли, чула ахир гъамбиъни аргъили, райбирули саби. Дила отделениелизиб шел солдат саби калунти, командирли сагати цIакьаначил ил чебирцIахъни аргъахъиб. Умут леб гъамли Германияла тах шагьар Берлиннизи ваэс биркниличи…»
Юх, Аттабековлис умут пишхIе­бя­хъиб. Кенигсбергла байхъу гъятI­би­иб­си юрт­­лизибад душма «шмайсер» автомат тIя­­кьярбухъун: ил кьакьализи геркавхъун.
МяхIяммад азарханализив чевсаргъиб. Мякьлар, койкаличи кариили, тухтур рурси лерри.
– Ну ишав сецадхIи сайра?
– Дагличивад.
— Дила юлдашуни?
— ХIела юл­да­шуни-бургъанти гьа­ла­бяхI арбякьи саби. ХIу Кенигсберг шагьарла госпитальлизив сайри. Паргъатии, хIела дергъ таманкабиубли саби…
Кьанниван МяхIяммадлис гIячихъ­биуб немецунала ил шагьарлизи 137 азирла ХIунтIена ГIярмия бухI­на­бер­хур­ли биъниличила. Ца гIяхIдеш, шагьарла бекI генерал Отто фон Ляшли, анцIбукь чина бетикилил аргъили, сунес марси гIяскарлизи ярагъ кадихьахъни, райдеш кьабулдарни.
МяхIяммадла дяхъи сагъбируси дармай бетаур бегIтала бегIла гIергъиси кагъар. Илар нешла, узби-рузбала ва сунес ахIерси ГIяшурала саламти лерри. Ил­ди лехIли, хIерли сабри, азирти цар­хIил­тиван ба­лагьла дергъ таманбиахъес бул­­гули сабри.
ГIур М.Аттабековли их­ти­лати­кIу­­­хIели уркIи гьаргли бу­рули вири: «ГIямру, дила дурхI­ни, лебтасалра дурхъати сари. Сен дикIадалли, ЧевяхIси Аллагьли илди гьарил инсайс гьачам сари лугути. Илдала дурхъадешра гIя­зиз­д­ешра кIир­кали халатили детарули сари адам къиян-жапализив, уре­хи­лизив сайхIели. Илкьяйда­ хIебирару, эгер хIу дяхI-дяхI­ли бяхIчиаибси автоматла хIя­ра­личивяхI аркьули виадли?..»
Хъулибтачи сецад карцIли виалра, МяхIяммадлис, дергъ таманбиубмад, гIелавяхI чару­хъес бетхIеур. ЧIянкIли урхI­ла ванзаличир дяхъи-хъас сагъдиубли гIергъи, илис Уркухъла дурхъати мина-мулкличи чарухъес кьадарбиуб. Кьадарбиуб сунес балгна ручIуси нешла ва ахIерти узи-уршила дяхI-някъ чедаэс.
Илдачицунрив гьатIи ил карцIси?
Илини цацахIели гимнастеркала кисализибад тяп ил дукIумила явлухъ дурай­сулри ва сунези сай шив­кIи­вул­хъул­ри:
— Ну сеннира хIечи чарулхъас, ахIерси ГIяшура. Гъай къянахIебирис!

«Хала хала дудешла гIямру нуни далути сари…»
МяхIяммад Аттабековла даршути гIямру даимдиуб. Уркухъла «Ильичла аманатуни» колхозлизив узес вехIихьиб. Хъайчикайиб. Баягъи сунес марли калунси ГIяшурани илис урши Аттабек, рурсби ПатIимат ва Раисат пешкешбариб. Илдани абикьурти вецIну цара биштIа дурхIнани Аттабекхъала кьам, цIедешла галгубани анхъван, жагабариб…
Уркухъла дахъал шалубар лицейлизиб урус мезла учительница Светлана Васильев­нани шуибил классла дурхIнас дарс кабирхьулри. Сочинение сабри. Азадси тема.
Духути хIулбира учительницачи вякьаили, Аминат бикIуси рурсили някъ ахъбуциб.
— Ну хIечи лехIихъулра, дила духучан?
— Асубирару дила хала хала дудешличила сочинение белкIес?
— ЧебяхIси ВатIа дергъла жи­гарла бу­тIакьянчи МяхIям­мад Аттабековличила белкIес ди­гулрив?
— Дигулра.
— Ил гIяхIси пикри саби, Аминат. Бажардириркуду?
— Риркус, нуни илала гIямру далути сари.
– Хала хала дудешла гIямру, илала дявила гьуни хIуни сен-сен дагьес риубри? ИлкIун хIу акIайчи гIямрулизивад арякьунси сай?
— Балулра… БегIтани иличила дахъал хабурти дуриб. Илала дурабадра, хала хала дудешла белкIани-гьанбикунала тетрадьра набчи баибси саби.
— ХIябилра дахъдагь лерри! — учительницани рурсила бекIличи малхIямли някъ кабихьиб. – Аминат, белкIен илгъуна сочинение. ХIу бажардириркуд. Нура хIечи рирхулра…