Лавашала район­на Къуппала Зулпукьар Кьур­ба­новла ули­чилси школализиб хала­си бал­буц бетерхур. Ил багъиш­лабарилри Кавказла дявти тамандиубхIейчирад 160 дус дик­нилис, АхIульголизиб каби­киб­си цIакьси дергъ 180 дус биънилис ва Къуппала шилизибадти имам Шамилла наибунала хIурматлис.

Балбуцла сиптакартили бетаур имам Шамилла культурала ва тарихла «Шамилла фонд» цалабяхъла президент, ДР-ла жамигIятла палатала член, урибси культурала хIянчизар Хархачаев ГIя­ли­асхIяб МяхIяммадович, фондла даргала мил­латла шайчивси вакил, ДГПУ-ла ис­торияла кафедрала доцент, Фондла вице-президент Ра­базан Сул­тIанбеков ва Къуппала шила ад­ми­нист­рация.
Ишаб бурес гIягIнибиркур Шамилла уличилси фонд акIахъубси саби 1991 ибил дуслизиб ва республикализиб тарихлашалси халаси хIянчи бирули бузуси саби. БусягIятла манзил ила кабурхули саби Дагъиста бекIлидиубти 9 миллатла мезанала вакилти. Гьарил республикала районтазиб ва шимазиб илдани жура-журала далдуцуни дурадуркIули саби, нушала тарихличила ва гIяда­ту­начила чеалкIуси наслулизи хъумхIертахъес багьандан.
ГьанбуршехIе Кавкавзла дургъ­базир, Дагъистан азадли ка­лахъес багьандан, жигарла бутIакьяндеш дарибтири ле­бил Дагъиста миллатунала жа­мигIятли. Баянти хIясибли имам Шамилла наибтазибад 25 дарганти буили саби, илда­зи­бад 5 Къуппала шилизибад­ра.
Балбуц бехIбихьиб Лавашала районна бекIла цаибил заместитель ГIябдусалам Дибировли: «Нуша ишбархIи цаладикилра Кавказла дургъби тамандиубла 160 дус дикнилис ва Къуппализибад дурабухъунти имам Шамилла гъабзадешчебти бургъантала хIурматлис. Къуппала шили нушала районна тарихлизиб хасси мер бурцуси саби.

Районнацун ахIи, Дагъиста ва Россияла даража чебяхIбирути бахъал хIурматла адамти лебти саби, гьанна нушачил барх ишаб лебтачила гьанбуршис: Ис­мя­гIилов ИсмягIил Шейхович, суненира Дагъистайзиб черяхIти технологиябала ахъси даражала больница абхьибси, илини, гьанна шилизи чарухъи, ишабси больницализив узули лебталалра халаси хIурмат сархили сай. ГIямаров ГIиса ГIисаевичли шилизиб тарихла, край руркънила ва палеонтологияла музей акIахъуб, ва даим ил че­бир­цIахъули, хIялумцIлаби дура­дуркIули, баянти дурчули, жузи лукIули сай. ДГПУ-ла кафедрала профессор ГIяли Кьурбанов, азадли мушулбашнила шайчибти чемпионти узби МяхIяммадкамил, Мя­хIям­мад ва илдигъунти бахъал цархIилтира, чучибад гIибрат касести. Имам Шамилли нушачи хъарбарибсири даршули ва уржили хIердиахъес, цадиахъес. Даширая, мурталраван гьаннара илкьяйда бирехIену».
ГIергъиси гъай бедиб Шамилла уличилси фондла Президент ГIялиасхIяб Мя­хIям­мадовичлизи: «Ну дебали ра­­­зилира хIушала гьабкьяти хIян­­­чизартала ва гъаб­за­деш­чебти бургъантала шилизи вакI­­­­­ни­личи. Нушала фондла хIян­­чи ахъси даражаличиб бе­­­тур­­­хахъес лебил Дагъис­та мил­латунала вакилтани кумек­­бируси саби. Дагъиста гьарил мер-мусаличиб нушани Шамилличила, илала наибтачила гьанбуршес кьас саби. Нушачи чебулхъути гьаларти дусмазиб бахъал лебтири, амма чисалра Дагъистан мукIурхIебакIиб, сенахIенну нушала хала бегIти мурталра цабалги хIер­би­ру­хIе­ли. Нушара илкьяйда ур­жи­ли хIердирехIе. Амма ца че­­лукьуси масъалара гьанбу­р­шис, Шамил хIерируси Ка­лу­­гала областьлизибси хIя­бал дерхIла хъулиб музей акIа­хъуб­ли саби, Дагъистайзиб биалли ишбархIира Шамиллис хасбарибси музей агара. Ил секIайчи пикри бяхIчиаалри, лебтасалра гIяхIил бири. Наибуни хIярибихьибти мер-муса дагьес къайгъибаресра чебиркур. ВегIла тарих балес, руркъес, дила пикрили, гьарилличи чебси саби. Имам Шамилли лебил Дагъистан ва Чечня цабарибси кьяйда нушара цадиэс чебиркур», — буриб илини. Балбуцличиб илкьяйдали гъайбухъун: музейла заведующий ГIиса ГIямаров, ДГУ-ла профессор Закарья Нахибашев, школала историяла мугIяллим МяхIяммад МяхIяммадов, илини цалабикибтази шила тарихличила гьанбушиб ва шилизив калунси Абакар-кьади бикIуси наибла кьамлизивадси Дибир Дибировличил цалабикибти тянишбариб.
Илкьяйдали фондла вице-президент Рабазан СултIан­бе­ков­ли Къуппала гIяхIгъубзни наи­­бу­начила ва илдала гъабзадешличила бу­риб. Илди Ша­мил­ла наибуни саби: Зубаир, Хаки, Чупалав, Дамбай ва Абакар-кьади (Га­зетала гIер­гъити но­мертазиб илдачила ва цар­хIил­­ти даргантачила тIинтI­ли­ бу­рехIе).
Балбуцла ахирличиб Къуппала хIур­мат­ла адамтас Шамилла уличилси фондла шайзибад патриот бяркъ бедлугнилизи ва халкьани-ургарти узидеш чIумадирнилизи кабихьибси пай хIисаблизи касили грамотаби ва М.Иб­ра­гьи­мо­ва­ни имамличила бел­кIунти жу­зи савгъатдариб.