Къуппакантас дебали спорт дигахъу. Къуппа мурталра дубуртазиб спортлашал бурибси ши бирусири. Къуппала шилизир къаркъа иргьнила, дуцIбикIнила, азадли мушулбашнила абзани имцIали дурадуркIутири. Саби къуппакантира чедир гьандушибти ва цархIилти спортла абзаначир бутIакьяндеш дарес Хажалмахьилизи, ЦIудахъарлизи ва Хьаргаблизи башули бири.
Дагъиста дахъал мераначиб тяхIярли, цIудхърила шимазибра дугIла мирхъила варъа касес ахъти лусентачи абицIни цархIилтазибад декIарси спортла журализи халбирусири. Бурусилис бикьрили гьанбуршехIе ца мисалра.
1940 ибил дуслизив мирхъичи Учарли «Чанки» бикIуси лусенничирти мирхъила хъулри заядарибсилис унц лугули уили сай: дугIла мирхъили, Учарла мирхъи хIердируси мерличи дашули, лебилра варъа букули буили саби. Жагьил урши МяхIяммад Мирзаевра ва илала адала узи Ибрагьимра, абацIили лусенничи, даргаибтири мирхъила хъулри. Илдас, Учарли гибси унцула чеди, 4 пуд (64 кг) варъалара бикибсири.
Халаси гьунарла бегIти къуппакантира буили саби итхIели. Мякьлаб Къуппала шилизибад гечбиубтала Тилагу бикIуси биштIаси ши буили саби. Илав хIерирули уили сай ца Гъазила ГIямар бикIуси халаси цIакьла вегI адам. Ил 2 метрла ахъси, 150 килограммла битIакIла адам сайри. Бурни хIясибли, илини, ургадихь дарилри жал хIясибли, Буйнакъск шагьарлизир цахIнар хIябал дицIибти къап (кIел шайуд дуцили, ца — цулбази) вагоннизи кайхьибти сари. Хан Хановли, шайу дуцили кIел бетIула къап, шила «Кабкаци» бикIуси мерличи башуси 200 метрла лаг ихъусири. Тяп ил лаг, ГIябдулла бикIуси цархIил къуппакай хъарчIайчиб унцра сайра ихъусири, бикIар. Къуппаканти Расул Ибрагьимов ва Гиммат Рабаданов дебали хъярхъли дуцIбикIутири или буру.
ИшбархIира спортзалла директорли узуси къуппакан ХIусин МяхIяммадов дуцIикIнила ва тIяхIикIнила спортла журализив 30 дус чемпионни калунси сай. БусягIятра леб къуппаканти 3 дунъяла чемпион, 6 дунъяла халкьани-ургабси журала спортла мастер ва 30 спортла мастер.
Гьаларван Къуппала шилизир, дунъяла чемпион МяхIяммадкамил МяхIяммадовла у бихуси спортзаллизир, азадли мушулбашнила абзани детерхур. Абзанала сиптакарчибили Каспийсклизибси рекламала агентстволис бекIдешдиран Шамсутдин МяхIяммадович Ханов ва Къуппала шила спортшколала тренер МяхIяммад МяхIяммадзагьирович МяхIяммадов бетаур.
МяхIячкъалализирад, Каспийсклизирад, Хасавюртлизирад, Избербашлизирад дахъал командаби дакIиб. Дагъиста шагьуртазиб ва чула шилизиб хIербирути Къуппала дурхIнала командабира лерри. Мушулбашутала лугIи 103 дурхIяличи абикиб.
Абзаначиб тренер МяхIяммад МяхIяммадзагьировичла командали цаибил мер буциб. Къуппакан дурхIни чула устадешли, гьалмагъдешли ва узидешли чедибдешличи киб.
