Гьаннала замана адамтани мобильный телефонти зумали дузахъниличил бархбасахъи, вайнукьабани макрукьядешла баркьудлуми дурадуркIули сари. ИмцIаливан илдала кьялшубази биркули саби жявли бирхарути ва гьести гIямрула адамти.
«Меры по борьбе с телефонными мошенниками» бикIуси темала чебкад «Дагъистан» РИА-лизиб пресс-конференция бетерхур. Илар Россияла Банкла Дагъистаннизибси отделениела управляющий Мурад Идрисовли, республикализибси МВД-ла УУР-ла (такьсирти гьаргдирнилизиб бузуси) отделла начальник Шамил ГIяхIмадовли ва журналистунани бутIакьяндеш дариб.
Балбуцличир телефон пайдалабарили, вайнукьабани макьрукьядеш дурадуркIниличила, илдас къаршидеш дирниличила гъай детаур, илкьяйдали гIяхIлани вегIличила баянти мяхIкамдирнила хIекьлизирти насихIятунира гIердуриб.
«Халкь биргIябургнила анцIбукьуни дебали зумадиубли сари. Зянкъдяхъили, банкла гьарли-марси хIянчизарли хIушала баянтачила хьархIебиу, сенахIенну банклизир илди дирутихIели. Эгер илдигъунти суалти акIалли, итмаданал телефон бяшес чебиркур», — викIи М.Идрисов.
Россияла Центральный Банк Дагъистаннизибси МВД-личил барх бузнили, дурадуркIути такьсиртала лугIи гIяшбиахъес имканбакIили саби. БусягIятла манзиллис макрукьябани дигIунти арцлизирад 11 процентла кьадарлизирти арц чардарили сари.
ДР-ла МВД-лизир макрукьядешла масъулти ирзути подразделениеби акIахъубли сари.
«Макрукьябани банкла номерличирадван, МВД-ла яра прокуратурала номерличирадра зянкъдяхъес асубирар. Илдани адамли чучи игьдибар бихьесли жагали гъайбикIес балули саби. ХIушала карталичирад арц дигIес яра хIушала у пайдалабарили, кредит абхьес дигули саби или адамти бачабурхахъули саби. Илдигъунти аги-кьяйдализиб адамти гьамадли асарлиу биркули саби ва илдани макрукьябала буйрухъуни детурхахъули сари», — викIи Ш.ГIяхIмадов.
«Эгер хIушала карталичирад арц дигIи диалли, ит бархIил яра гIергъила бархIи арц дигIнила гIярзаличил банклизи дугьадизес чебиркур, кIинайс биалли, ихтиюрти далтахъути органтази.
30 бархIила духIнар банкли арц чардирути сари, рахли хIуша гIяйибла дегIти хIедиъни белгибаралли. ГIяйибла бегIтази халбирути саби макрукьябази чули пин-код яра цархIилти баянти дурибти адамти», — викIи М.Идрисов.
Макрукьябала «кьурбанни» детхIеэс ва арц мяхIкамли дихIес багьандан, лебтасалра сахъли диэс чебиркур.
