Бара гьалабван, «Дагъистан» РИА-лизиб берк-бержла ва палтар-кьяшла хIекьлизирти багьначила брифинг бетерхур. Балбуцличир ДР-ла шила хозяйствола ва берк-бержла масанала министрла заместитель Эмин ШайххIясановли, ДР-ла вачарла ва промышленностьла министрла цаибил заместитель Рашид Мурзаевли, илкьяйдали СМИ-бала вакилтанира бутIакьяндеш дариб. Спикертани республикализирти багьнала тяхIяр-кьяйдаличила буриб.

БегIлара хIяжатти берк-бержла ахIенти ва берк-бержла масани ишбархIилис цIакьли дурхъадиубли ахIен или буриб Р.Мурзаевли.
«БелчIудила сагаси дус бехIбихьес гьалаб дурхIнала палтарла ва дабрумала багьни циила ахъдиуб. Илгъуна анцIбукь илдачи тIалабкардеш лебниличил бархбасири.
Нушани дургIели гIявадеш ва чакар тIалабдарес дирути 8 субъект кадизахъурлира. ВягIда хIясибли ма­­сани дурхьантачил халаси хIянчи дураберкIира», — ви­кIи ил.
Тукентазир дирцути берк-бержла масанала багьни ца агиличир калахъес шимала хозяйствобала ярмаркабани кумекбирниличила буриб Э.ШайххIясановли.
«ДурадуркIути шимала хозяйство­ба­­­ла ярмаркабани халкь берк-берж­ла продуктуначил гIеббурцули саби.
Ну­ша­ла республикализирти багьни ахъхIедиахъубли ка­лахъ­нила асарчебси тяхIярли бетарули саби ил», — викIи Э.ШайххIясанов.
Илала гъай хIясибли, ишдус ярмаркаби даим дурадуркIули сари. Хасти майдунти хIедиъни багьандан, илди дурадуркIесра къиянбулхъули биъниличилара аргъахъиб Э.ШайххIясановли.
Илкьяйдали ярмаркаличир секIулти гьаладир­хьа­хъес шила хозяйствола масани дурайанти биркI­ниличила, дирцути секIултала багьни ахъ-гIяш­дир­нила сабабуначила буриб спикертани.