Россияла халкьла гIя­датла выс­тав­ка­бала «Хай­дакь­лан­ти» бикIуси центрлизиб Зу­бай­дат ХIясановала твор­чес­кий вечер бетерхур. Илар бу­тIа­кьяндеш дариб Хай­дакьла ад­министрацияла хIян­чи­зар­тани, учительтани, куль­турала хIян­чизартани ва цар­хIил­та­ни­ра.

Ил балбуц «Дила Хайда­кьланти» бикIуси, Зубайдат ХIясановани белкIунси, далайличил бехIбихьиб.
Зубайдат акIубси сари ГъярацIан бикIуси шилизир, бахъал дурхIнала хъалибарглизир. Унивеситет таманбарили гIергъи, 1977 ибил дуслизиб районна библиотекализиб методистла хIянчи барибсири. Илар рузули илини культурализи халаси пай кабихьибсири. Хайдакьлантала культура, гIядатуни, рухIлашал гьаладяхI ардукес, илди хъумхIертахъес рузули калун.
2012 ибил дуслизиб «Хайдакьла някьиш» бикIуси выставкаличиб илини ДР-ла Президентла Грант сархибсири. ГIергъиси дуслизибра, республикала конкурсличиб Зубайдатли цаибил мер буциб.
Зубайдат ХIясановани 2014 ибил дуслизиб лебил Россияла «Культурная мозаика» проектунала конкурсличиб «Гьайкар» бикIуси проект гьалабихьиб, сабира цаэсил мерличи лайикьбикибси. 2015 ибил дуслизиб «ГIяхIтазибад бегIлара гIяхIти» бикIуси конкурсличиб ил проект даимбарибсири. «Миллатла палтар, халкьла пагьмула произведение сарливан, сагадарни ва мяхIкамдарни» бикIуси проектлис 2016 ибил дуслизиб ДР-ла БекIла Грант сархибсири.
Хайдакьла районна администрацияла ва ДР-ла культурала Министерствола ку­мек­личибли Москвализиб ва Санкт-Петербурглизиб хайдакьла някьишла выставка ду­ра­беркIибсири. Зубайдатли гIурра Владикавказлизиб, Стам­буллизиб ва цархIилти ша­гьуртазир дурадеркIибти выстав­кабачирра хIянчурби гьа­ла­дихьибтири.
З.ХIясанова культурализи ва литературализи кабихьибси пай багьандан, «ДР-ла рурибси хIянчизар» хIурматла уличи лайикьрикиб. Илини РФ-ла культурала Министерствола ва ДР-ла Правительствола хIурматла грамотаби, дипломти ва дахъал цархIилти шабагъатуни касиб. З.ХIясанова гьарра шайчирад пагьмучерси адам сари. Илис бикьрили детарули сари илала гъай хIясибли нушала гIяртистунани дучIути далуйти. Илала назмуртала чумал сборник дурадухъи сари. Цаибси «ГIямруличил далдикили» бикIуси сборник 2011 ибил дуслизиб дурабухъун. Далуйти ва назмурти кадерхур «Ахъли зайбикIен, далай!» бикIуси сборниклизира. Сунела творчестволизиб илини ВатIайчи, алавси тIабигIятличи, адамтачи дигиличила бурули сари.
Зубайдат сунела назмуртазир ишкьяйда рикIули сари: «Дила назмурти ва далуйти наб цIуба пIиргъикI, хьанцIа хIулбар, райхIян ва цархIилти авлахъла вавни сари. Илди нуни цацали цахIнадяхъили халаси вавнала хала бирулра. Ил халали адамтас гIяхIдеш, разидеш, гIянручIла гьавалагъуна умудеш дихули дигулра».
З.ХIясановала пагьмулис хасбарибси балбуцличир зайдухъун илала назмурти, далуйти. Илаб бегIлара мягIничебсили бетаур Перизат МяхIяммадовани саркъахъили белчIунси «Нешлис» бикIуси Зубайдатла назму. Иларти дугьбани заллизибти хьунул адамтачи халаси асарбариб. ХIера, ил саби Зубайдат ХIясановала поэзияла цIакь.
Нунира илис хасдарили ишдигъунти тугъи делкIунра.
Хайдакьла хан унхъразир
Кьакьари арцла булбул,
Шишимти дицIахъули
Сар хIела девли булан.

БерхIила ванадеш леб
ПасихIти назмуртазиб,
ХIял гьалакбирахъути
КарцIайла далуйтазиб.

Милигсилис шарабван
Умути дугьбала регI,
ЗягIипсилис дарманван
Сабабла уркIила регI.

ХIечибли давлачебси
Саб баракатла Хайдакь,
ХIела пагьмучердешла
Дунъялира хабар дакь.