Каспийскла бекIлибиубси библиотекализиб, ДР-ла «Россияла нешани» хIяракатла «Араси нешдеш» проектла дазурбазиб, «Родительство» бикIуси клубла заседание бетерхур. Иш гьакIлизиб гьунибаъниличиб хIербарибси бекIлибиубси масъала сабри биштIатас вакцинаби дирнила шайчибси.
Гьунибаъни ибхьули, «Родительство» клубла руководитель, ДР-ла «Россияла нешани» хIяракатла председатель Таиса МяхIяммадова гъайрухъун.
«Чейхъути излумачи къаршили вакцинаби хIедирутани иргъули ахIен жамигIятла иммунитетличила. Чула виштIаси гьанна бикайчи мицIирли калунси, алав-гьалав чейхъути излумазибад мяхIкамдеш барибти адамти лебни багьандан саби или пикрибикIути чула багьудиагардешли саби. Нушани ишбархIи илдигъунти пикрумас ахир кабирхьехIе ва иличибли нешанала ва илдала дурхIнала арадеш мяхIкамбарес имканбикIур», —рикIи Т.МяхIяммадова.
Балбуцличир бутIакьяндеш дариб Каспийскла «Россияла нешани» хIяракатла председатель Г.МяхIяммадовани, республикала чейхъути излумала шайчибси центрла бекIлириубси тухтурла заместитель М.ЖабрагIиловани, Каспийскла биштIатала поликлиникала педиатрияла шайчибси отделениела заведующая В.МикагIиловани ва цархIилтани.
Вакцинабала шайчирти тамашала баянтачила буриб А.ГIялиевала уличилси медколледжлизиб бучIутани. Илдани чейхъути излумачи къаршили дирути вакцинабала тарихличила гьанбикахъиб ва вакцинали кьаркьайчи сегъуна асар бирулил буриб.
ГIур тухтуртани республикализибси чейхъути излумала шайчибси агиличила, вакцинаби хIедирнила асуртачила, излумазибад мяхIкамдеш бирнила чебкад ихтилатбариб.
Вакцинаби хIедирниличила бурули, «Родительство» клубла ведущая М.Касаткинани прививкаби къадагъадирниличил дархдасунти машгьурти сабабтачила гьанбушиб. Илдигъунти сабабтазибад цаибил саби – прививкабала халаси лугIи, календарь мурталра сагатачил чебирцIули саби ва бегIти сагати вакцинаби дарахъес кьабулбиркули ахIен, сенахIенну илдазиб хIяжатдеш лебниличи бирхули ахIен. Вакцинаби дарили гIергъи детарути асуртачила гъайикIалли, хIейгеси биалра, илди камли диалра къаршидиркули дирар, амма вакцинаби хIедаралли, биштIати гьатIира дахъал вайти асуртачил бяхIигули бирар.