Гьалабван Моск­ва­лизибад Хай­дакьла районнизи Skolkovo Vision журналла из­датель ва бекI редактор, К.Ко­­ро­винна уличилси «Барх уца­хъехIе» бикIуси, рухIла куль­тура мяхIкамбируси фонд­ла вице-президент, куль­турала ва искусствола шайчирти хал­кьани-ургарти прое­к­туни къел­гIердикуси Г.Мерз­ли­ки­на­чил барх блогер­та­ла кьу­кья бакIиб.

Илдала архIяла мурад сабри хайдакьлантала бекIа­хъу­дила гIямруличил ва культураличил тянишбиъни, Россияла халкьла культура ва тарихла шай­чибси рухIла давла чеби­цIахъни, илди-ургарти барх­басуни гьаладяхI ардукни.
Далай-делхъличил, миллатла бизити берклумачил гIяхIлас гьунибаиб районна админис­т­­­рацияла вакилти, культурала, спортла ва жагьилтала полити­кала отделла хIянчизарти. ГIяхI­лас культурала Центрлизиб экскурсия дураберкIиб. Илаб блогерти хайдакьлантала гIя­датуначил, культураличил, да­хъал дусмазир машгьурдиубти някьишличил тянишбиуб. ГIур илдас имканбакIиб районна жагати мер-мусаличи архIя ду­раберкIес, тIабигIятла жагадеш чебаэс.
Чедаибти мер-мусаличила пикруми дурули, илдани илцадра жагаси ва давлачебси хайдакьлантала культурали, иштяхIдухъести делхъли, пергер тIабигIятли чула уркIбачи мекелли халаси асарбарниличила аргъахъиб. Илкьяйда хайдакьлантала берк­лумачилара бурес хъум­хIер­тур блогертани.
«Цала цали культура, гIя­да­­туни далнили миллатуни-ур­габси бархбас, диги, хIур­мат имцIабирахъуси саби. Ил­ди бархбасунани нушала жа­мигIятра гьалабяхI арку. Ам­ма дебали мягIничебси саби цар­хIилтала культура бяркъес гъа­зализиб вегIлайчилара хъум­хIертни», — викIи Хайдакьла районна бекI ГI.Темирбулатов
Разити гьунибаънибани, ар­­хIябани адамла уркIила гьав ахъ­бирахъу, пагьмуртала ва устадешла шайчив гьалавяхI вашахъес икьалабиру. Хаслира гьанна нушала мез, рухIла давла, гIядатуни бархIиличи-бархIи гIеладяхI дашухIели, илдигъунти далдуцуни дебали мягIничерти сари. Нушала чараагарси чебла саби хала бегIтани кадизахъурти, дахъал дусмазир дузахъули калунти вегIла гIядатуни мяхIкамдарни, рухIла давла чебицIахъни, гьа­ладяхI ардукни ва чеалкIуси нас­луличира илди даахъни.
Ил, гьайгьайрагу, аргъба­иб­си масъала саби. Гьачам­цун ахIен нуни иличила бел­кIун­си­ра. Чуйна бел­кIас­лира, илди макьалаби лебилра дар­ган­тачи дила уркIила жи­ли детарар. Наб децIигули саби бахъалгъун­ти адамтани хала бегIтала гIя­датуни муч­ла­хIе­дир­ни, дарган мезли гъай­би­кIес хIейг­ни, шко­лабазирти неш­­ла мезла ва литературала дурс­рала ся­гIя­туни камдирни. Хаслира дигахъ­­и­ра жавабла хIянчизартани ва хIякимтани ил масъалаличи пикри бяхI­чи­аили. Урус мез дагьес мур­талра кьанни хIебирар, виш­тIа­ли левай хIедагьурти неш­ла мез гIурлизирра илкьяйда хIе­­да­гьур­ли кавлути сари. Иличила пикридухъеная, хIурматла дарганти!