Гьанна бусягIятра уркIи гьаргли бурес вирар, школабазирти кIел смена анцIдукьи сари или, амма дахъал школабазиб хIябал сменализиб бучIутира лебал. Тяп илгъуна аги сабри Сагаси Вихърила школализибра. Гъану цара ибил даршдуслихълизиб халаси шилизиб биштIатас физкультурала дурсри кадирхьес спортзал агарли, байрумти дурадуркIес актовый зал агарли, дурхIни бахес гьарзаси столовая агарли асубирусирив, гьатIи?
Амма белчIудила дус дебали разиси ва нуша дахъхIи хIерси баркьудиличибад бехIбихьиб — Сагаси Вихърила шилизиб, сагаси хIябал дерхIла школа абхьиб. Илгъуна гIяхIси хабарли уркIи разидешли бицIахъили саби.
Сагаси школа халаси ва жагаси саби, ишхIелла гIямрула тIалабуначи далдикибти лерилра хIяжатти ваяхIличил балкьаахъурли саби. Школа лушнила хIянчи ахъси даражаличир дурадеркIахъес, гьар бархIи хIеруди бузахъулри районна администрацияла бекIла къуллукъуни заманалис дузахъуси МяхIяммад Эльдерхановли. Илала гъай хIясибли, школа лушнила хIянчи заманаличир тамандарницун ахIенри хIяжатси, илди чедетаахъили дурадуркIни, гьатIира мягIничебси сабри.
Школа лушнила 8 дуслис духъяндитIунти хIянчи ахирра-ахир тамандиуб, ва белчIудила заведениели бучIантас сунела къапу абхьиб. Байрамла аги-кьяйдализиб дурабуркIуси линейкаличи 1-ибил классла ва 11 ибил классла бучIантицун сабри бакIахъибти, коронавирусла чейхъуси изала тIинтIбикIнила урехи камбиахъес багьандан.
Халаси баркалла багьахъес дигулра КПРФ-ла Дагъиста отделениелис ва МяхIяммадов МяхIяммад ХIясановичлис, Решульский Сергей Николаевичлис, сенкIун илдала сипта хIясибли бехIбихьибсири сагаси школа. Гьалжана кьадарбараб чус Аллагьли.
Наб дигулра, лерилра шимазир сагати школабира, спортзалтира, спортплощадкабира абхьили. ДурхIнас ункъти шуртIри акIахъни дебали мягIничебси саби, илдала белчIуди, спортличи диги ва пагьмурти гьаладяхI дашахъес багьандан.
Гъамси заманализир лерилра шимазир сагати школабира, дурхIнала унхърира тIашдалтниличи, вирхулра.
Коронавирусла изала тIинтIбирниличибли яра цархIил сабабличибли, школаби гIекIили дигули ахIенра, набра дила бархкьябасра.
Гьариллис арадешра, баракатра, паргъатдешра дулгулра.