«ХIела гIямруличи ­пахрубирулра ва хIу нуша-ургав ­агниличи децIдикIулра»

2026 ибил дус­ла фев­ральла 23-личив Ахъу­шала район­ни­зивадси маш­­гьурси спортсмен Айгу­бов БяхIямма Раба­да­но­вич акIубхIейчирад 72 дус дикиб. Гьайгьайрагу, спорт­ла ветеран, цулбала тухтур, дуцI­ви­кIуси, спортла тухтур, поэт, спортла мастер, тренер, Ва­тIан дунъяличибра маш­гьур­барибси адамличила убла заманализив гъайикIесра гьамадли ахIен. Сен-биалра, ил акIубси бархIиличил барх­ба­сахъи, иличила газета бу­чIан­­тазира гьанбикахъес лайикь­силизи халбирулра.
Россияла ва Европала чуйнара чемпион ветаурси, спортла декIар-декIарти журабазир дунъяла абзаначил гьаларти мерани дуцибси, авцIали дусцадхIи лебил Россияла ва дунъяла абзаначиб нушала улкала байрахъ ахъли бихули калунси спортсменничи нушани пахрубирулра. Дагъиста гьаларти къуллукъуни багьандан ил «Дагъиста халкьла игит»-ла хIурматла ура бедили, «мургьила зубариличил» шабагъатлаварибсири.
Б.Айгубовли мурталра жигарла бутIакьяндеш дирутири кункси ва декIси атлетикала абзаначир, спортла миллатла журабазир — гиря ахъбурцнилизир, ирибачил мушулвашнилизир, бокслизир. Илкьяйдали илини гIяхIцад чедибдешуни диахъуб самбола, дявила самбола, дзюдола шайчирти гIяхIцад абзаназирра. Абзаначир илини битIакIла декIар-декIарти шел журализир бу­тIа­кьяндеш дирутири. Дунъяличив чилра агарсири илгъуна баркьуди дурабуркIуси. Илала сархибдешуни ДР-ла спортла Министерствола Дагъиста спортла Асилдешла Музейлизи ва FILA-ла мушулбашнила хал­кьа­ни-ургабси спортла организацияли­зи кадерхахъурти сари.
БяхIямма Рабаданович вахъхIи дуцIикIули битIакI камбирахънила шайчив Россияла ва дунъяла хIяйна рекорд кабизахъурси сай, илкьяйдали ил Гиннессла рекордунала жузла рекордсменра сай. Гъал дусла духIнар илини битIакI камбирахънила шайчир тамашала рекордуни кадизахъур, амма 66 дус виубхIелицун ил дунъяла даражаличи дураухъун, тIашбизагарли 5 сягIят дуцIикIули 9,5 килограмм лайдакIили. Илис гьалаб дунъяличиб чилилра илгъуна барибси ахIенри. Гьарил рекорд мягIничерти анцIбукьунас ва адамтас хасбарибсири: 2021 ибил дуслизир Токиолизир детерхурти Олимпиадала ХIязанала бутIакьянчиби дагъистанлантас, Расул ХIямзатов акIубхIейчирад 100 дус дикнилис, СВО-ла бутIакьянчибас ва дявила хасси балбуц бетурхуси мер-мусаличиб алхунти бургъантас. Улкала гьалаб илини сунела интернационалный чебла ахъиб, 1979 ибил дуслизир Эфиопиялизив дявила тухтурла къуллукъуни асилдешличил тамандирули.
Б.Айгубовли сунела гIям­ру­л­изиб цалра дуцI уббатурси ахIенри, цацахIели ил бархIили 2-3 дуцIикIусири, 10-личибад 50-йчи бикайчи километрла гьуни ихъули. Аргъла сегъунти-дигара шуртIразив ил дуцIвикIи, шими-ургав ва шагьурти-ургав. 2021 ибил дусличивад ил «DAGRUN» би­кIуси дуцIбикIутала клублизи кер­­хурсири, мурталра ДР-лизир дуцIла шай­­чир ду­ра­дуркIути абзаначир жигарла бу­тIа­кьяндеш дирутири: янила замана «Ма­­хач­кала-Каспийск» бикIуси дуцI, «Wild Trail», «Тарки-Тау», лебил Россияла «ЗаБег», «Ог­ни Дербента» бикIуси дугила замана бетерхурси дуцIла абз. БегIла гIергъи илини бутIакьяндеш дариб лебил Россияла «ЗаБег» бикIуси балбуцлизир, ил кавшес 18 бархIи гьалар. Абз МяхIячкъалализиб 2024 ибил дусла майла 19-личиб бетерхурсири. Ил­хIели илини 21,1 километр ахъибтири.
БяхIямма Айгубов – 48 дусла бузерила стажличилси цулбала тухтурра сайри, илини дурхIнала цулби матъал арадирутири, дебали цула изесбяхIибти зягIипти биалли, дугила замана кьабулбирули вири. Илини Дагъиста медицинала Академия ва ординатура хIунтIена дипломличил хъараахъуртири. Буралли, ил гьарра шайчивад пагьмучевси, мурхьти багьудлумачилси адам вири.
Физическая культура ва спорт гьаладяхI дашахънилизи халаси пай кабирхьни багьандан, ил декIар-декIарти ведомствобани ва министерствобани Баркаллала кагъуртачил чуйнара шабагъатлаварибсири. Илди-ургар лер ДР-ла Халкьла Собраниела Председатель Хизри ШихсягIидовли бедибси Баркаллала кагъар, Перьмла областьла греко-римский тяхIярли мушулбашнила Федерацияли, «Пермскла синкби» бикIуси спортла мушулбашнила шайчибси клубла Баркаллала кагъар, Россияла «ИшхIелла машгьурти мушлукьяби» бикIуси спортла мушулбашнила шайчибси Федерацияли Диплом ва цархIилти.
Б.Айгубов Россияла, республикала, регионна газетабази, журналтази, радиостанциябази живирусири, иличил ихтилат дураберкIес багьандан. «Дагъистан» РГВК-ла телеканалла телепередачабала кIинайс хIурматла гIяхIялли ветаурсири – «На виду. Спорт» ва «Акценты». «Цаибил канал»-личиб чебиахъуси «Я почти знаменит» бикIуси телепередачализирра бутIакьяндеш дарибтири. Иличила, «Дагъистан» РГВК-ла телеканалличибси «Тамашала дубурланти» бикIуси телепередачала дазурбазиб, режиссер ПатIимат Бурзиевани фильмра касибсири.
Илини дахъал тамашала гьунибаъниби дурадеркIиб цахIнабси ба­гьудила ва спортла школабала бу­чIан­тачил. ХIурматла гIяхIял сайливан, мурталра живирусири Дагъистайзир ва Россиялизир детурхути жагьилтала далдуцуначи, илини мурталра чеалкIуси наслулис гIибрат чебиахъи, арати гIямру дуркIниличи илди жибири.
«Динамо-Махачкала» бикIуси футболла клублис бекIдеш дирантала жи хIя­сибли, Б.Айгубовлис Пятигорск шагьар­лизир «Машук-КМВ» командаличил дура­дур­кIути абзаназиб таплис цаибси бяхъ чегахъес ихтиярбарибсири. 2024 ибил дусла февральла 23-личир Ахъушала районна администрацияли БяхIямма Айгубов акIубхIейчирад 70 дус дикнилис хасдарибти, 11-12 дус биубти гIулухъаби-ургар футболла шайчирти абзани дурадеркIибтири.
Илини дебали халаси хIурмат бирусири хала бегIтала, илис дигахъи ВатIан. «Дила халкьлис поэма» бикIуси назмулизиб илини черяхIдирутири шантала, нешани-игитунала гьунарти. АхIерси шилизи аркьуси гьунила дублар ва шилизир илини азирцад галга удатур. Илис дигахъи ванза бузахъес. Лебилра адамтас кумеклис музаухъес ил мурталра хIядурли вири. Лерилра гIямрулизив ил спортлизи ахъибсири, рекордуни кадилзахъи, сунела чархла хIялумцIи ва дебшлабири, рухIлашалси дебадеш ахтардибири. Сунела мисалличил илини спорт – арадешла хьулчи биъни марбирусири.
2024 ибил дусла июньна 8-личив ил кавшнила хабарли лебилра уркI­бу­хъа­хъун­тири. Гьаннара Лавашала районти-ургабси следствиела Комитетла ахтарди дурабуркIули лебал, илала хIекьлизибси дело РФ-ла следствиела Комитетла БекI­либиубси управлениела хIерудилиуб саби.
БяхIямма Айгубов сунела заманала тамашала ва машгьурси адам сайри, иличила шалати гьанбикуни нушала уркIбазир даимлис кавлан. ГIяхIти хIял-тIабигIятла, мал­хIямси уркIила, чеббикIибси сани­гIят­лис марси, жамигIятлис гIяхI­де­шуни дирес хIемсуси, ВатIайчи дигичевси дубурлан сайливан, иличила нушани сеналра хъум­хIер­те­хIе.
Спорт гьалабяхI башахънилизи мекелли халаси пай кабихьибси Б.Айгубовли су­нела у тарихлизи мургьила хатIличил бел­кIун.

Нушала корр.