Нушала Дагъиста адамти жявхIейчибадал вачар-чакар дузахъули хIербирути халкь саби. Гьаб-уб, илцад-декIар яшав къулайли ахIенси замана, хала бегIтани чула някъбани дакIахъибти ризкьи, овощуни ва цIедеш цархIилти шимази дихутири, чула агарти секIайс дарсдирутири. ИлхIелира чус даарила кьадарла дарсдарили, яра хъулир хIяжатдиркути ваяхI асили, бекIахъ сархусири.
Гьанна биалли, илди дарсдирес хIяжатдеш агара. Баралра яшавла даража лебти адамтала хъулир арц лер. Илдас исули сари лерилра хIяжатти секIал.
БусягIятла манзил хIербирути адамтала лерилра баркьудлуми ва къайгъни вачар-чакарличил зумали дархдасахънила дурарад, адам секьяйдали виргIявиргили, имцIали арц дарес виэс виишира или пикрибикIули саби. Дебали арц дигантили, давла-маслис узи-урши ва гъамти бицес хIядуртили бетаурли саби адамти.
Илкьяйда хIебирару, нушала республикализир бегIлара дахъал овощуни (сецад лера нушачир теплицаби?), цIедеш дашахъухIели, базаличир ва тукентазир дирцути илдала багьни дурхъадикIниличир гьачамалра дургIедиубли нуни чехIедаира. «Гъамли заядиэс асубирарну, дургIедарилра, асая?» викIуси хIушани чинавалра чехIейидая. Иличи ургIебли, илди масани дурхъали дицес гъаргъли, эгер адхIесили калалли, заядиахъубли, лайкадакIили чедиид.
Сен вегIла халкьлис гIяхIдешуни дарес гьуцIхIебикIутира адамти? ЦархIилтас се барес гIяхIъулабирути. ЖагIялла бархIи, вегIлис къияндикибхIели, бегI гьалабси яргализиб мякьлаб хIербирути, халкьличигу дугьаилзуси.
Дигахъаси нушала фермертани, мицIираг адилкьантани, овощуни-цIедешуни дашахъантани илдигъунти аги-кьяйда пикридирули. Гьайгьайрагу, чусра зарал бетхIеахъурли, хайриличил, амма бахъ дебали дурхъахIебикIули дагъистанлантас масани дирцули. Дурала мераначирад кадухибтичир хIябилра гIяхIти дирар нушала дубурла мер-мусаличир, тIабигIятла пергер шуртIразир, дакIахъибти овощуни ва цIедеш.

Салимат ГIялиева