БархIиличи-бархIи гIилму гьаладяхI дашуцад адамла гIямрула шалубира къулайдикIахъести имкан­ти алкIули сари. Гьайгьай, гIяхIцад дусмазир Совет хIуку­матла замана касибти мурхьти багьудлуми пай­да­ладарили, чумра къулайдеш акIахъес балкьаур нуша­ла улкала гIялимтира. Камли ахIен дурала улкнала гIялим­тала сархибдешунира. Илдани диахъубти сархиб­де­шуназибадси Интернетли ишхIелла манзиллизир дахъал масъулти арзахъес кумек гIеббиахъули саби.
Интернет пайдалабиресра сегъуналра къияндеш агара. Гъай дагьес гьалаб виштIасилира ил руркъули сай. Ил вяркъес ва цархIилти нушала хала бегIтала бету­цуначи бурсиваресила мерлаб, илала бегIтани теле­фонра бедили, гьарахъ-гьарахъли валтули сай ил игъбарагар. Сен илис игъбарагар рикIулра, гьатIи, ну ? Сена­хIенну бегIлара гIямрулизир багаладиэсти дахъал бяркъла ва багьудлумала бетуцуни ца шайчир кали, ил телефонна арилизи виркули сай.
ВиштIахIейчивадли илкьяйдали дурхIяли Ин­тер­нет­ли­зирадли пайдалативан ахIи зараллати баян­ти имцIали кайсули сари. Илала пикрила дураб кав­лу­ли ахIен кьалли мурталра телефонтази «бухI­на­ка­бикибти» сунела бегIтира. Илдани-декIар бегIта­чи­бадли ахIи, чизибадли мисал кайсуси? Илкьяй­дали адам виштIахIейчивадли Интернетла арилизи виркули сай. Илис, бикIуливан, адамтачилси «мицIирси» барх­бас биули ахIен. Иличивли дахъалгъунти анцI­букьу­на­зив чевулкIули сай.
Адамла гIямрула гьарил бетуцлизи бухI­­на­бер­хур­си Ин­тернетли балкIдешличи хъарихъутас бархли кумек гIеб­биахъули саби. Масала, творческий адамли урхIла пи­круми дилгIули сай ва сунела пик­румази илди духI­накаили, сунела уличил газетаби-журналтазир ду­ракайули сай. УрхIла къиян беркунси адам тус­накъ­ви­рули сай, урхIла материалти дигIунси биалли, гап­ви­ру­ли сай.
Дарс белчIес хIейгуси азгъинси учIаннира Интер­нет пайдалабарили, учитель виргIяургули сай. Ил­кьяй­дали багьла-багьлали бархьдеш ва гIямрула гьарли-марти бетуцуни гIянддикIули, адамти хIя­рам­си гьуникад багьлакабиубли башули саби…
Чила-биалра гьалаб цIаххIебилзалли, вегIла хIя­яла гьалав урузхIейрусив илгъуна адам? Политика­ла шайчирти масъулти ахъдуцили, вершабани ва къа­­­чагъунани Интернетунази къянала багьахъниби дурхь­­­нилира бахъал халкь гъузгъалдибирахъули саби. Кам­­хIебираргу илдала къунбачи бирхарутира. Те­ле­фонтазирадли дурхьути лергIер урехилати баянтани жагьилти чеббулкIахънила баркьудлуми им­цIа­дикI­ни­ра гьариллис якьинси саби. Илдигъунти бетуцуначирли гIулухъаби улхути мисалтира лергу. Илдигъунти уряхIти баркьудлуми дурахIедуркIахъес къарауйчив чилра агарсив? Интернетуни дакIудухъайчи илдигъунти далагардешуни дирути ахIенригу. Умуси ва пайдаласи Интернет биахъес асухIебирусира?

ПатIимат Кьурбанова