Гьаннала замана школабазир кадиркути цацадехIти анцIбукьуначила аргъибхIели, ну дебали тамашавиубра.
Нуша школализир дучIухIели, мурталра мугIяллимти чекабизурли бири багьудлуми касахъес, бяркъличи дикахъес. ИшхIелла заманара, лугIурбала бетуцла сагадешуни дагьардиубли диалра, илдала хьулчиличиб дурхIни бяркъчебтили бетаахъес бузути учительти дебали бахъал саби.
Амма леб, арцличи хIербикIули, «чус хIейгули биалли, мабучIаб» или «кIила» кьиматуни кадатурли, дурхIни уркIиагарбирахъути школала хIянчизартира. Илдигъунтала вяшатIала наб сеналра гIяхIдилзули ахIен. Илди гьар байрамлис чус арц дучили, савгъатуни пешкешдарили, гIяхIти кьиматуни кадалтахъес бурсибиубли саби. Се дирути илгъуна гьуйчил касибти кьиматуни? ГIямрулизир биалли, нушаб багьудлумигу хIяжатдиркути. ДурхIнала селалра шайчиб бархьси яра балкIси чебаэс дагьри хIедиули диалли, мугIяллимтани илди бархьси гьунчибад башахъес гIягIнитигу.
МугIяллимти ибси девла мягIнара наб итмаданал багьудлуми тIинтIдируси насихIятчиван кабилзан. Амма вегIла санигIят хIейгахъуси мугIяллим мугIяллим сай викIесра хIейрар. ГIядатлибиубливан, илдигъунтани бучIахъути дурхIнала бел­чIу­ди­личи иштяхIра беткайхъа­хъули бирар.
Ил багьандан дигахъаси нушала мугIяллимти-ургаб санигIятличи диги агарти сеналра къаршихIебиркули, эгер лебли биалли, замана арбукьяйчи, декIарси санигIят касили, илаб устадешличил бузули.

МяхIяммадшапи Матаев