ПатIимат Кьурбанова

ЦацабехIтани санигIят чеббиркIу вегIла яшав гIеббуцес багьандан алапа кайсес кьасличил. Илдигъунти чинаб халаси алапа бикахъес вирарал, ила дуцIбикIули бирар. Амма лебти саби адамти, чула пагьму хIясибли санигIят чеббиркIути. Илдигъунти санигIят гьалабяхI арбукес ва вавалибяхъяхъес къайгъначил бирар бузутира. Поэтли биалли санигIят сегъуна чеббикIили виалра, уркIила жи хIясибли назмурти лукIес имкантира дургули вирар. Илини ВатIайчи дигили ламбикIуси уркIила хIялани иргъахъули, марти дигай черяхIдирули яра анцIкьи-децI чедуркъубхIели бирар кьалам някълизи кайсуси. ВегIла пикри дурусли аргъахъес багьандан халаси пагьмура хIяжатсигу. Илкьяйдали пагьмула асарлиур уркIила бегIлара дурхъати хIялани иргъахъес устадеш лертири даргала машгьурси поэт Сарат ГIялиевала. Ил даимлис нушачирадли аррякьи риалра, илала далуйтачи шурдухъунти назмурти ахIерси ВатIан багьандан гIязиз жан кьурбандарибтас ва марти дигай дихьибтас ишбархIира зайдикIули сари. Илди даимлис гIералгьули кавлутира сари. Газета бучIантас илала чумал назму гьаладирхьехIе:
Узидешла хIябрачиб
ТIамала хIебакьири
Ахъли жирикIукъира,
ХIерли сайра викIути
Кагъурти дарх хибкъира.

ХIу паргъатси мерличир
Булбулти дучIулири,
ГIяхIти гъубзнала хIябрас
Илди дезадикIулри.

Гъайлис гъай чархIебарри
ГъайрикIули рамсуркъи,
КарцIли сайра викIути
Дугьби уркIилар леркъи.

ХIед кьадин гъайдикIулри
Вавначир дурхIя мирхъи,
ВатIайс жан дедибтачи
Икрамличи дакIибти.
* * *
ТIашбизи гьари БерхIи,
Лебну хIези буруси,
Дунъяличир чум наслу
Чедаадлира хIуни,
Хабар бурен ВатIаннис
Жан кайхьиб гъубзначила.

ЛехIбизи хIу, Бац, набчи
Лебну хIези тилади,
Замунтазиб азирти
Хьурабиалра хIечи,
Хъуммартидра гьанрушес
ХIерли калун исбагьи.
* * *
Агьурли шихъла шала,
Ахъриишав заклизи,
Закла ахъдешлизирад
ХIеррикIес даим хIечи.

Агьурли забла къири,
Рукьишав гъагултази,
ДуцIрум дегъбиубхIели
Маркали кагес хIечи.

Агьурли шихъ гъудур Бац,
ГьарракIишав рурхIули,
Дуги цIябси биалли
ШаларикIесли хIечи.

Агьурли БерхIила дяхI,
Руишав хIела мякьлар,
ГIямрулизиб цайналра
БугIярхIегахъес хIечи.
* * *
Дубурличир мар мургьи
Дилацун сари майкIуд,
Мургьи даргес дубура
Нуни диркъубсирину.

Вавначир гIяяр мирхъи
Дилацун сари майкIуд,
Мирхъилис жанай вавни
Нуни дегIунтирину.

Диркьаличир шиниш кьар
Дилацун сари майкIуд,
Кьарличир цIуба мукьри
Нуни гIяйдарибтину.

ВацIализир галгуби
Дилацун сари майкIуд,
Галгубачир булбулти
Наб дучIули сарину.
* * *
Дати дигай викIуду
Ардухахъес дягIлизи,
Дигай кьалли далтаси
Духахъес бурямтази.
Дигайли дицIиб хIулби
Ардухалли рахли дарх,
ХIечи хIерхIерикIули
Рираслири ну хайри.

КарцIай дуаб викIадив
Дигаллира берхIили,
Дигай кьалли дуиши
Дигалли хIунтIен цIали.
КарцIай духIнаси уркIи
Дила цIали бигалли,
ХIези гъайхIерикIули
Рирасри сабурбарес.
* * *
Даргдердиб бикIар шурми
ДухIнар шин дяргIибхIели,
Дила сен даргхIевдути
Чархлизир азир биркIан,
ДяргIибкъи дуцIар дигай.
АгархIели ца дус заб
Кадерхур бикIар хIуркIби,
Дила сен кадхIерхути
Андайлар шараб хIулби,
Агаркъи марти карцIай.
* * *
Бай хъатлизиб ашрапи
БихIес хIебагьуррину,
Бай белкунси шел шагьи
Някъла буцили бихен.

Пигьалавад шарабли
Ужес виъхIейубрину,
БургIяларад дамкьур шин
Держили милги ихъен.

Анхълизибси хабарзак
Беркес шакхIейкирину,
Забгуран дургла кьада
БалцIи разили кайрен.

ЦIуба чалтукла арши
Диршес шакхIейкирину,
Дуари гъудур мучи
Делкьес шинкьани укьен.
* * *
Шихъ шарабла хIеркIличи
Савли шичи аркьясли,
Мургьила ургьур чебил
ХIибаран бидавличив
Гьанбиркур цугиркули.
ЦIуб арцла къянарличил
Къадала лаглизирад
Хъули чаррулхъухIели,
Гьалабад бурцисрану
Биха къянари или
Гьанбиркур гIеввиули.
БерхIи гьаббакIарачи
Маркаличил кьар биршес
Гьалакли рашухIели,
ГIяйдарили цIуб мукьри
Гьанбиркур чевиули.
Арзи кьарла махличил
Хъули чаррулхъухIели,
Чидил дигив мукьара,
ЧеббикIа хIед викIули,
Гьанбиркур гъайвикIули.
ДяхIимцIа дяхIцIилизир
Кариларад ляркьясли,
ШятIахьила тIамали
БархIехъ лехIбилзахъули,
Гьанбиркур къунзикIули.
* * *
ХIу багьандан бакIибси
Шури тIякьла шумеръа
ЦархIийзи балцIахъунри,
Гьарахъли хIерикIули.

ХIу гьанни къунзбикIуси
Илхъила айгъир тази
УрхIлизи буцахъири,
ХIяжатагарвиубли.

ХIечицун куртIбикIуси
Ругерличиб цIуба кIас
ДягIли гIяндбушахъири,
УркIи бурхIебурили.

ХIед цIедешли берхъибси
Авадан анхъла галга
УрхIлизи балцIахъунри –
ХIу гушли увкалунри.
* * *
Чилра вирххIерар набчи
Дураслира дардани,
Авадан дунъяличир
Дирутив или илди.

Чилилра мархIедиру
ДелгIаслира шишимти,
Алавчар шалализир
Сейрутив или илди.

Чилилра дила хIергъу
УркIила анцIдукьлуми,
ГIяхIдешла гIямрулизир
Дашару или илди.

Чилилра далхIедала
Чархлизир улукьути,
Эркинси яшавлизир
Сейрути или илди.

Дарданира дирхIейри
Виадлири хIу мякьлав,
Шишимтира кахIевли
Чейадлири гьар бархIи.