Ахъушала урга даражала цаибил школализир рузули сари дебали пагьмучерси учительница, изобразительное искусствола дурсри кадирхьуси, художник Кьурбанова Лейла Кьадиевна. МяхIячкъала шагьарлизиб бетерхурси ГI.ГI.Тахо-Годила уличилси Дагъиста гIилмуртала-хIялумцIлабала институт 80 дус биънилис ва педагог – насихIятчила Дуслис хасбарибси «Художник-педагог» бикIуси республикала кьадрила выставкаличиб Кьурбанова Лейла Кьадиевна гьачам цаибил мерличи, кIина 3-ибил мерличи лайикьрикиб.
Цаибил мерличи лайикьрикиб «Графика» бикIуси номинациялизир, Кьурбан Абакаровичла сурат барнилис, хIябъибил мерличи лайикьрикиб «Натюрморт. Сирень» бикIуси вавала ва «Уллучара» бикIуси Уллучарала шила чебаъла суратуни дарили, Дипломтачилра шабагъатларариб.
Лейла Кьурбанова бахълис гIибрат сари багьудила шайзирад. Школала гIямрулизир илини жигарла бутIакьяндеш дирули сари.
МалхIямси, жавабкардешличил рузуси Лейлани сунени кадирхьути дурсри бучIантази гIяхIил аргъахъес, илдачи диги ва устадеш имцIадиахъес халаси къайгъи бирули сари. Сари рузуси коллективла ва сунени бучIахъути дурхIнала, илдала бегIтала ургаб Лейлани халаси хIурмат сархили сари.
Лейла Кьадиевна «ДР-ла багьудила Отличникла», «РФ-ла багьудила ХIурматла хIянчизарла», «ДР-ла рурибси хIянчизарла» умачи лайикьрикили сари. Халкьани-ургабси педагог-художникунала Союзла членра сари. ДР-ла Правительствола шайзирад 200 азир къурушла премияличира лайикьрикили сари, педагогла санигIятлизир касибти сархибдешуни багьандан. ДР-ла гIилмула ва багьудила Министерствола, «Ахъушала район» МО-ла администрацияла, багьудила управлениела ва сари рузуси школала шайзирад ХIурматла Грамотабачира лайикьрикили сари.
Лейла Кьадиевна гьар шайчирад пагьмучерси адам сари, илини далули сари гьаннала заманала лугIурбала технологияби, сайтани дузахъес.
Лейлани уршира-рурсира абикьур, уршили сунела хала дудешлагъуна санигIят чеббикIили, Москва шагьарлизив тухтурли узули сай, рурси нешлагъуна санигIятличи регIриубли, ИЗО-ла учительница ретаурли сари.
Лейлала бегIти, Ахъушала шилизиб халаси хIурмат сархибти адамти саби, пагьмучебти, тухтурли узули калунси Кьадини ва учительница СалихIятли илис къугъаси бяркъра бедили, чебяхIси даражала багьудира касахъили арикьур.
Гьаннала гIергъира бузерилизир ва гIямрулизир сархибдешуни имцIадикIаб!
С.ГIябдуллаева
