Россияла Президент В.Путинна хIукму хIясибли, 2020-ибил дус Асилдешла ва гьан­би­ку­нала Дусли багьахъурли саби. Иличил бар­ба­сахъи, Хайдакьла райониизир мурталра де­­кIар-декIарти далдуцуни дурадуркIули са­ри. Илдазирад имцIатигъунти ЧебяхIси Ва­тIа дергъ кабикибхIейчирад 75 дус дик­ни­ли­с хасдарибти сари.

Гьалабван «Тылла зяхIматчибачил ва дергъла дурхIначил гьунибаъни» бикIуси бал­буцли сунела бузери бехIбихьиб. Илала да­зурбазиб, культурала Центрла хIянчизарти ва районна библиотекала директор ГIяйшат ГIяб­­дурагIязизова Мажалисла шилизивадси Че­бяхIси ВатIа дергъла ветеран МяхIям­мад­ра­сул Тавкаевла рурси Сильваначил гьунибаиб.
ДурхIнала ва илдала баркьибтала урга кариили, хIулбазир нургъбачил гьандиркахъулри илини дургъбала дусми. Сильванани секьяйда сунени дергъ бехIбихьниличила бакьибсирил буриб.
«Илцадра мусибатла «дергъ» ибси дев, сунела гьунчирти лерил секIал ­гьа­рисуси дягIван, адамтала гIямрулизи бухI­­на­бухъун, хаслира — нуша диштIати дурхI­­нала. Илини арбукиб нушала дудешуни, хала дудешуни, узби. Разити дур­хIя­дешла бурхIни кьутIкьути, агъули ди­цIибти гIямрула бурхIначи шуркадухъун. Ши бацIкабухъунсигъуна сабри. БурхIни ар­дашулри, мурул адамти ВатIан ­батахъес бургъулри, хьунул адамти ва биштIати дурхIни хъумачиб хIянчилизи ахъилри. Челябкьлализир гIур сегъунтилра дургъби мадиаб! Лебил дунъяла дурхIни бегIтачил барх арали ва разили хIербиаб! «Дергъ» ибси дев хабарлизиб бикьулицун калаб илдани»,—рикIи Сильвана.
Культурала Центрла хIянчизартани ил Чедибдеш сархибхIейчирад 75 дус диркнила анцIбукьличил уркIи-уркIиларад мубаракрариб. «ИшбархIи нуша хIечи дакIилра халаси баркалла багьахъес. Илдигъунти дусми гIур кьадархIедиубли, анцIкьи-шишимти агарли, арали ва разили гIямру деркIаби хIуни. Дергъла дусми деркIибси гьарил адам нушаб игит сай. Ил нушани хъумуртуси ахIен. Баркалла нушаб Чедибдеш, даршудеш ва азаддеш сархнилис»,—цIакьбарили буриб гIяхIлани.
Гьунибаъни даимбариб далуйти ва назмуртани. Балбуцла ахирличиб Сильвана Тавкаевани лебтасалра халаси баркалла багьахъур.