Ну мурталра хIяй­ран­ри­рахъусира дурхI­на­ла унхъразиб бузути хIянчизартала, вос­пи­та­­тельтала бузерили. Илдани дурхIначи къуллукъ­би­­ру­ли­цунра ахIенну, илди ко­ман­да­лизиб секьяйдали вяш­би­к­Iутил бурсибирули са­би. Та­ма­шахIейэсив, гьатIи, вос­пи­­тательтани хIябал-авал дус биубти биштIати ца­за­ма­­на­лизиб цаван бул­хъа­хъес бурсибирухIели. Ил­кьяй­да­ли далдикахъили ле­рил­ра ди­ра­хъес халати барх­ли бур­си­барес къиянси бар­кьу­ди­хIе­ли?

Гьайгьайрагу, воспитательла дебали къиянси ва да­­хъал цIакьани харждира­хъуси хIянчи саби. Ил бузери къелгIеббикес хIейрар дурхIначи диги агарси адамли. Школала гIямруличи ахIе­баибти биштIатира чула на­сихIят­чибани буруси гьарил дев «кьяраэс» хIядуртиван би­рар. Хъулиб бархли, бегIтази «Ну­шази воспитательли илкьяйда бирен или бурибси саби» ибти дугьби дархли тик­рардирули саби, дурхIнала анхълизиб бурсибарибтиван вяшбикIес алавбулхъули.

Сентябрьла 27-личиб улкализиб воспитательла БархIи дурабуркIуси саби. Ил байрам хасбарибси саби биштIатас чула диги, хIеруди ва багьудлуми пешкешдируси гьариллис.

Илгъуна дигеси анцI­букьличил бархбасахъи, ишаб наб гьанбушес дигулра Ла­ва­ша­ла районна Кьакьамахьила «Ромашка» бикIуси дурхIнала анхълизир рузуси воспитатель ГIямарова Сарижат Булатовначила. Ил акIубси сари 1982 ибил дусла июньна 22-личир. Школализиб белчIуди хъа­раахъурхIели, ДГПУ-лизи карерхур. Бузерила гунзри дехIдихьиб школализир рузули, кIинайс ил цазаманализир дурхIнала анхълизир рузескарииб. Чедиб гьанбушибси дурхIнала анхълизир биалли, ил 2022 ибил дусличирад рузули сари. КIел дус музыкала руководительли рузули калун, ишдусличирад воспитательли рузули сари. Сунела асилси бузериличил илини бархкьяби-ургаб халаси хIурматра сархили сари. Гьарил секIайчи черетаибси, сунела къуллукъуни жавабкардешличил бекIдируси насихIятчи лерни, гьайгьайрагу, биштIати дурхIналара илдала бегIталара халаси талихIра гьарбизнира саби.

ХIера, гьанна Сарижат ГIя­маровани школала гIям­ру­личи ахIебаибти дурхI­нас хасбарибси учреждениелизиб гIяхIцад дусмазиб хIялалли хIянчи бирули сари. Илис бикьридеш дирули сари гьар бархIи иличил чатIнала вичIиръалаличил ихтилатбикIути никIабани. Су­нени секьяйдали дурхIнас ванадешлис уркIи гьаргбирулил, илцадра биштIатира иличи битIикIули бирар. Илизир ахIену, гьатIи, адамли бузахъуси санигIятла устадеш? Сари-алав дурхIни цалабяхъили, илди гьар секIайчи бурсибирули, гьунчибикахъес къайгъи дакIубирнилизиб.

СанигIятлашалси байрамличил бархбасахъи, дигулра Сарижат Булатовна ва школала гIямруличи ахIебаибти дурхI­нас хасдарибти организациябазиб бузути лебилра мубаракбарес. БиштIатала бегIтала шайзибад хIушаб уркIи-уркIилабадси баркалла! Бузерилизир биалли, гьарбизуни ва сархибдешуни каммадиаб!

 

Салимат Алиева