Дагъистанланти чула чIумадешличибли ва гъабзадешличибли сезаманалра декIарбулхъутири. Ил багьандан илди цархIилтани мурталра гIибратлис гьанбуршути саби.
Тарихла декIар-декIарти манзилтазиб пачалихъла ахъти шабагъатуначи лайикьбикибти дубурлантала лугIи гьачамличиб-гьачам халабикIули саби. ХIера, илдала сияхI чебицIахъиб Кьасумкентла шилизивадси СВО-ла бутIакьянчи Султан Сулайбанович Сулайбановлира. Сепайда, вебкIили гIергъи сай ил пачалихъла ахъси шабагъатличи – Россияла Игитла уличи лайикьикибсира.
С.Сулайбановли цаибти бурхIназирал дявила хасси балбуцлизир бутIакьяндеш дирес вехIибхьисири. Душма хIярхIяли гIямрула бурхIни къябдердес гьалав ил подполковникла уличи лайикьикесра бажардиикиб. Сунела бекIдешлиубти бургъантачи уркIи изуси, гьарилла гIямру дерцахъес къайгъилизивси адам вири. Гьалмагъунала ва барх бузутала гьанбикуназив урехиагарси адам, гIяхIгъабза ургъан сайливан кавлан ил.
Султан Сулайбанов акIубсири 1997 ибил дусла июльла 28-личив. Илис виштIахIейчивад сунела лерилра гIямру дявила баркьудиличил дархдасес дигусири. Ил багьандан школа таманбарили, Москвализибси Суворовла уличилси дявила командиртала чебяхIси училищелизи керхурсири. Ил шула кьиматуначил хъараахъурли, Южно-Сахалинсклизибси дявила частьлизиб къуллукъбирес вехIихьибсири. 2022 ибил дуслизиб Украинала мер-мусаличиб мотортачилти ярагълизибад къяйкбикIутала 39 ибил декIарси бригадала командирла къуллукъ бузахъулри ва майорла уличи айкилри. СВО-лизив Султан Сулайбанов чуйнара вяхъибсири, амма, дяхъурби сагъдарили, сагадан гьаркьятала къяйлизи калзусири.
Дявила къуллукълизир диахъубти сархибдешуни багьандан С.Сулайбанов пачалихъла гIяхIцад шабагъатуначи лайикьикибсири — Гъабзадешла орденничи, «ВатIа гьалар диахъубти сархибдешуни багьандан» бикIуси 2-ибил даражала орденничи, «Гъабзадеш багьандан», «Дявила асилдеш багьандан», «Гъабзадеш багьандан» бикIути 1-ибил ва 2-ибил даражлумала медальтачи. Илкьяйдали илис «Дагъиста халкьла игит» ибси ура бедибсири.

ПатIимат Мирзаева