Ну иличил ишдигъунти аги-кьяйдализив тянишиубсири. АрхIяличивад чарулхъухIели Ахъушала шила ХIямшима аркьуси хIябкьяйличив тIашизурси мурул адам леври. Машина тIашаахъес лишан хIебарибкъи, нуни ил катес машина тIашаира. Ил машиналичи кайибхIели нуни хьарбаира:
— ХIу чина аркьусири?
— Шукьти!
Машина ХIямшимала хIябкьяйличиб тIашхIеили, дила пассажир сай викIуси мерличи ваахъира.
Тяп илгъуна анцIбукь гIурра чуйнара тикрарбиуб ва нуша гъамли тянишдиубра.
Гьачам ну зугIялализи викира. Полицияли дила машина бикнила право кебасиб. Камси заманала бухIнаб Ахъушала судлизибад повестка бакIиб. Ахъуша ваибхIели, чебаахъибси кабинетлизи ацIира. ХIерикIулра: баягъи дила пассажир. Илар сарри нуша гьарли-марли тянишдиубти.
— МяхIяммад Асадуллаевич, хIербарира хIела дело. ХIечиб илцад-декIар халаси гIяйиб чехIебаира. Ил багьандан саби нуни хIела право чарбируси, кIина-хIяйна Шукьти укни багьандан ахIенну. Гьундурачив мяхIкамдешличил вашен.
Баркаллара багьахъурли ну кабинетлизивад дуравхъунра. Илала гIергъи чумра адамлизибад бакьира дила тяниш – Ахъушала районна маслигIятла (мировой) судья Каримов ГIямар МяхIяммадович адамтачи ряхIмучевси, кабизалачевси жагьил адам виъни.
Гьаригу, ил гIяхIгъабзала уркIи разибарес даргала газетализи биштIаси биалра иш макьала белкIес пикрибарира. Ил шайчибси дила пагь камлихIели, дугьаизурра дила унра-тухум гьаман газетализи лукIуси Муса МяхIяммадовличи.
— ГIямар Каримов – нуни учIахъули калунси сай. КIел-хIябал дус нуни илис урус мезла дурсри кадихьибтири – викIули сай М. МяхIяммадов. – Валусири илала дудеш МяхIяммадра. ГIямар бажардичевси, белчIудиличи гъаргъси урши. Гьаннара илини дила хIурматбиру. Гьар къаршиикибхIели «Дила учитель» или гьунивиур. БелкIен, ил сегъуна-дигара гапличи лайикьси сай.
ХIямшимала администрацияла бекI ХIябибуллагь Кьутиев
— ГIямар Каримов дила уркIили кьабулварибси адам сай. Наб чумра декIти анцIбукьла бикьрили виэс чебикиб, сарира законна гьунчи кили адамлис кумекбарес багьандан дурадеркIибти. Ца мисал, Мегъала шилизир хIеррируси Хадижат КьурбанмяхIяммадова гIякIаларарес судлизи дархьибти кагъурти хIердарили, судьяли ил хьунул адамлис кумекбариб.
ГIямар викIи: «Хадижат нуни гIяхIил ралас, ил дила учительница сари. Илини хутI хIебилгIни гIячихъси саби».
ГIямар даг институт белчIи, ишбархIи судья ветаурси ахIен. ХIера, илала гIямрула ва бузерила гьуни. Ил акIубси сай Шукьтила шилизив 1961 ибил дуслизив. 1979 ибил дуслизив илини ХIямшимала урга даражала школа таманбариб. ГIур гIярмияла къяяназиб къуллукъбариб ва пулеметчикла санигIят касиб. Ульяновский СМУ-21-лизив узули калун, ва илабси заводлизив 5 дусцадхIи контролерла хIянчи дузахъи. 1990 ибил дуслизиб ГIямарли лебил Союзла юридический институт таманбариб «Правоведение» бикIуси специальность хIясибли. 1992 дуслизив МяхIячкъала шагьарла Ленинский районна судла исполнительли узиб. ГIур ДР-ла юстицияла Министерствола Халкьла Собраниела аппаратла правовой отделлизи шурухъун. 2000-ибил дусла ноябрьличивад ишбархIиличи бикайчи Ахъушала районна маслигIятла (мировой) судьяли узули сай. Илини гIибратла хъалибарг хIербирули сай. Хъа регI ЖумягI Кьадиевна кIел рурсила неш – бухгалтер сари. Илдала халалгъуна рурси юрист сари, риштIалгъуна – тухтур.
Илис арадеш, хъалибарглизиб талихI ва баракат дулгулра ва назмула ишди тугъи багъишладирулра.
Мискин-пякьир гIевурцен,
Къиянтазивси вален,
ЧеввалкIунсис дякь бурен,
Каркусис някъ гьабурцен.
Бархьси гьунила дайлав
Алавчарли хIерилзен,
Къардухъунси чи левал,
Гьунчивикахъес узен.
Адамдеш чихъли дихIен
Сабур кьиблама бара,
Кьакьадешли буцибтас
Шалати дяхI кадурцен.
Дунъялис виргIямайруд,
ХIела у ахъли бихен,
ЗугIлумази бикибтас
КумеквикIули вашен!
Муса МяхIяммадов, МяхIяммад МяхIяммадов
