Ишди бурхIназиб Р.ХIямзатовла уличилси Миллатла библиотекализиб Шамил Абакаровли дарган мезла гIярбукIла лугъатличи шурдатурти дунъяла халкьла хабуртала жузличил бучIанти тянишбариб.
ГIярбукIла мезличиб «СихIрула кване» бикIуси жуз дуракаъни, камти халкьанала мез хIедебкIахъили калахъниличи бяхIчиаибси балбуц сабри.
Ила бакIибти лебилра чула мез дузули калниличи хьулбикIулри ва ил шайчиб бирусигъуна кумекбарес чейсулри.
Жузличил тянишбиэс гIярбукIантицун ахIи, илдачи мешути лугъатунала бегIти шимала халкьра бакIилри ва жуз шурбатурсилисра, дуракаибсилисра баркалла балахъулри.
Балбуц бузахъулри ДГУ-ла профессор, Дагъиста Халкьла Собраниела депутат Узлипат ХIясановани.
Илар жузличила ва мезличила чула пикруми дуриб тарихла гIилмуртала доктор Амирбек МяхIяммадовли, кIарахъала мезла Каратала лугъатличиб дурхIнас жуз дуракаибси ДГПУ-ла профессор Рашидат Халидовани, тарихла гIилмуртала кандидат Фатима Гаджаловани, РФ-ла багьуди бедлугнила шайчирси хIурматла хIянчизар Сакинат ГIялиевани.
Гъайбухъунтани чула пикрумазиб, бархIиличи-бархIи миллатла мезани камли дузахъули диъниличила бурулри. «Ил суайзир хIедамсурли дузес гIягIнили саби, давлачерти, дахъал миллатунала мез ахIерадарес багьандан. Ил шайчиб чула миллатунала мезли жузи лукIути писательтани ва поэтунани, жузи шурдалтутани халаси хIянчи бирули саби», — бурулри илдани.
Кубачила шилизивадси культурала хIянчизар ХIяжикьурбан Умалатовли Кубачила лугъатли делкIунти сунела назмурти делчIун.
«ДурхIнази нешла мез дагьахъес багьандан шимала школабала учительтани шантала фольклор бурчнила шайчир конкурсуни дурадуркIес чебиркур. Ил шайчиб халаси хIянчи дураберкIес имканти лерти сари. ДурхIнани чула жинсла, хала бегIтала галга (генеалогическое древо) суратбаралли, бегIти ва мез дагьес хьулбулхъан, нушани гьанна цара байхъала дус дузули лерилра Дагъиста литературала мезанала, имцIаливан дузахъути мезла, словарьти хIядурдарилра, гъамли илди жузира дурра-дулхъан. ВегIла мез дагьес илдира кумекдирар.
БусягIят лертиван жузлизи кадяхъили Кубачила лугъат калахънилизибра халаси мягIна леб», — рикIулри профессор Узлипат ХIясанова балбуцла ахирличир гъайрулхъухIели.
Илини жузличил тянишбиэс бакIибтас лебтасалра баркалла багьахъур, сагали дуракаибси, имцIали дузахъути мезла словарь гьалабихьили, гъамси заманализир гIурра учидиркниличила, гьала хили буриб.
Муъминат Хаттаева
