… «Ахъушала район» МО-ла туризмала шайчибси управлениела начальник ХIясан ХIясановли ХIямшимаб сагаси байрам – унрубала БархIи дурабуркIули биъниличила бурибхIели, итмадан хабарла шира, гIякьлучебти шантира, районнизирти дегIлара гIяхIтала лугIилизи кабурхуси ХIямшимала урга даражала школара чедаэс хьул акIуб.
Школалаличи гъамдиубхIели чедаира алавчарли тIашаибти гIяхIцад машинаби, – шадлихъличи бахъал гIяхIли бакIили биъни багьеслири. БакIибтас разили гьунибиулри ХIямшимала шила администрацияла бекI ХIябибулла Кьутиев, школала директор Тимур Жабаев, районна Собраниела депутат Сиражутдин МяхIяммадов ва цархIилтира ХIямшимала шилизибти хIурматла адамти.
Районна музейла директор Зубалжат Мирзаевара нура школализи духIнадухъи, къунздухъунра ва чебаира, сецад чебетаахъили балкьаахъурси, гьарзаси, шаласи багьудила учреждение сабрил ХIямшимала шилизибси. ЖаняхIлизи даршилри ХIямшимала шилизибадти машгьурти адамтала суратуни – РажабгIяли ГIямаровла, Расул МяхIяммадовла, МяхIяммад ХIясановла. Илдачирад гьарахъли ахIи ХIурматла уркьуйзи даршилри «шула» кьиматуначил бучIути дурхIнала суратуни – даршалцад лерри илди.
Ца гIямзи хасбарилри спортла шайчирти шабагъатунас, –спортла жура-журала абзаназир сархибти дахъал кубокуни лерри. Школала музейлизи духIнадухъунра ва ишарти гьаларла ваяхIличи тамашадиубра. Нушачил варх левси ил школала историяла учитель КьурбанмяхIяммад МяхIяммадовли буриб музей абхьибсири школализив вахъхIи узули калунси, дахъал шабагъатунира хIурматла умира касибси МяхIяммадгIяли МяхIяммадовла къайгъиличил (бунагь-хатIа урдуцаб сунела).
БахъхIиагарли школала азбарлаб шадлихъла бутIакьянчиби цалабикиб. Илди-ургаб лебри алавчарти шимала администрациябала бурги ва культурала хIянчизарти. Байрамличи музабухъири бахъал хIямшимантира. Балбуц бузахъуси районна культурала КIялгIяла методистка Салимат Мусаадаевани шадлихъ абхьиб, ва ХIясан ХIясановлис гъай бедиб.
Туризмала управлениела начальникли буриб унрубала БархIи дурабуркIнила байрам сагаси биалра, Дагъиста халкьанала гIямрула тяхIяр-кьяйдаличи дебали балбикибси саби или.
ХI.ХIясановли районнизиб цаибси илгъуна балбуц дураберкIес ХIямшимала ши чеббикIибси саби, сенахIенну алавчарти шимачил ил шила гIяхIти бархбасуни лерхIели или буриб.
– Гьарил районнизиб декIар-декIарти миллатунала вакилти хIербирули саби, чула ургаб цабалгундеш бихIули, – викIи ХIясан МяхIяммадсягIидович.– Дагъиста адамти цархIилтас гIибратли бетаурли саби балгундешла, ца миллатли итилла хIурматбирнила шайчиб. Ахъушала район гIяхIялдешлизиб ва балгундешлизиб гьатIира гьалабяхI арбукес къайгъибирехIе!
Унрубала БархIи дурабуркIнила гIядатлис бехIбихьуд кабихьибси районна туризмала управлениела начальникла баркьуди гIеббуцили гъайбухъун, ХIямшимала шилизивси хIурматла адам, поэт, журналист, бузерила ветеран Муса МяхIяммадов, районна музейла директор Зубалжат Мирзаева, районна жамигIятла Палатала руководительла заместитель МяхIяммадзагьир МяхIяммадов, районна Жагьилтала политикала ва спортла управлениела начальникла заместитель ГIябдулла ГIисаев. Илини ил бархIи шила спортзаллизир декIар-декIарти спортла журабала абзани дурадуркIути сари, ва илдазир гьарил дигусини бутIакьяндеш дарес ихтияр леб или аргъахъиб.
Усишала шилизивадси БяхIмуд Булатовли байрамлис багъишлабарибси назму белчIун.
Шадлихълизир бутIакьяндеш дарес бакIилри районна культурала КIялгIяла хIянчизарти ХIяжимурад Мусаадаев, Кумсият ГIяхIмадова, Пирдаус ХIяжимяхIяммадова, ЖумягI ГIялиева, Бутрила шила культурала Юртлизиб бузути Зубайдат ГIялиева, ПатIимат ИсмягIилова, ХIялимат Ражабова, ТIантIала шилизирад – культурала Юртла директор Хадижат Сулайбанова, Урганила шилизибад Мустапа ТIагъзиров ва ЦIибацI МяхIяммадова. Лебри Шукьтила, Балхъарла, Уллучарала шимала культурала хIянчизартира.
ТамашахIейэсли ахIенри илдазивад гьарилла пагьмуличи: сецад жагатирил гьаларла журала палтар чегьурли Бутрибадти рурсбани дарибти делхъ, Балхъарла ва Уллучарала коллективтани дарибти булугунала делхъ! Далуйтира цаличир ца жагали зайдикIути, чусра къугъати дугьби чердикIибти сарри.
Аргъра чуйнара «чебухъес» балбизурсиван дягIра дакIубухъи, забла хала-халати кIунтIрира чекьурли, гIур балкабиркулри, БерхIила шалара гIяйбиубли, адамтала балгундешличи разибиубсиван алавла шалабирулри.
Сунезибад бахъал пагьмучебти, халаси багьуди касибти ва Дагъиста дурабра машгьурбиубти адамти дурабухъунси ХIямшимала шилизир, ил-алав дурабад бакIибтас чедаэс хIяздухъести жагати мер-муса лерти сари.
Илди чедаахъес ва баянти дурес хIядурли сай ил шайчиб гIяхIси багьуди лебси историяла педагог КьурбанмяхIяммад МяхIяммадов.
ХIямшимала хьунул адамтала машгьурдиубти устадеш лерти сари някьиш дирнила. Ил шайчиб декIарбухъунти ХIяписат ГIяппасовачил ва илала рурси Зугьра ИсмягIиловачил, дурхIнала анхъла заведующая Людмила СягIидовачил, илала рузи, пергер учительница Марьям Наримановначил, шила библиотекала ва культурала Юртла хIянчизартачил гьунидаэс имканбакIниличира разидиубра. Зубалжат Мирзаева Бутрила шилизирти культурала Юрт-алавти къугъали кадизахъурти мер-мусара чедаэс, илдачила газетализира белкIес гIягIнибиркур или рикIи.
Ахирлизиб гъайбухъи, бузерила ветеранти Муса МяхIяммадовли ва МяхIяммад Ванатовли баркалла багьахъур илгъуна гIяхIси баркьуди хIядурбарибти туризмала, культурала, жагьилтала политикала ва спортла управлениебала хIянчизартас, ил гIеббуцили, ахъси даражаличиб бетерхахъурти ХIямшимала шила жавабла хIянчизартасра.
БегIла гIергъи Урганила шилизирадси ЦIибацIли белчIунси далайлира лехIирхъутачи халаси асар бариб – ца нешли адикьуртиван, ца хъалибаргван хIердиэс къайгъибирехIе ибси мягIнала дугьби кадерхурлири далайлизи ва иличи лехIирхъути лебилра жибирулри дигичебдеш, балгундеш бихIяхъес, цаличи цала гьими-кьяс агарли хIербиахъес.
– СВО-лизибад чедибдешличил дурхIнира чарбухъи, даршути гIямруличи улка шурбухъунси замана сабаэсгу, Иншаалагь, бахъхIиагарли! Ил анцIбукьли халкьла цабалгундеш цIакьбирахъни гIячихъси саби,– буриб гъайбухъунтани. – Нуша хIерлира, цаладикили, ил шайчиб разидеш бутIес.
Байрамличи дурабад бакIибти гIяхIлас баракатчебси кьумур гьалабихьили, балбуцлизир бутIакьяндеш дарнилис баркаллара багьахъурли, суратунира касили, илди гьуниббатур.
П.Маллаева
