Дусла бехIбихьудличир Сергокъалала районнизир дигести дарсдешуни кадикиб. Иличил къяйли цацадехIти бузерила бетуцуназир диахъубти сархибдешуни багьандан, жавабла хIянчизарти шабагъатлабарибтири.

ХIера, илдигъунтала лугIилизир сарливан, нушани гьанруршехIе районна администрацияла налогунала ва арцла масъултала шайчибси отделла начальник ГIялиева Раисат ГIусмановна. Илини сунела лайикьси шабагъат – Баркаллала кагъар — касиб Дагъистан Республикала вачарла ва промышленностьла министр Низами Халиловла някъбазибад. Учреждениебала хIянчизарти-ургар налогунала хIекьлизир чеблуми камдиахънила шайчир гIяхIти хIясилти чедаахъни багьандан сарри Раисат ГIялиева шабагъатличира лайикьрикибси. Гьайгьайрагу, вегIличи хъардарибти хIянчи асилдешличил ва жабаркардешличил детурхахъухIели сари илдигъунти дигести сархибдешунира кадиркути.

Налогуни – нушала пачалихъ гьалабяхI башнила бекIлидиубти хьулчназибад ца саби, сунелара кумекличил социальный бяхIчибизла, багьудила, гьундурала программаби гьаладяхI дашахъес имканбикIахъуси. Ил кьяли вируцад гьалабяхI арбукнилизибад нушала гIямрула къулайдешра дигахъуси саби. Баркалла биаб Раисат ГIусмановнас сунела бузери ункъли бетурхахънилис. Иличибад гIибрат касес чебиркур цархIилти хIянчизартанира.

Гьаннала гIергъира Раисатлис районна ва республикала къулайдеш багьандан дурабуркIуси хIянчилизир сархибдешуницун дулгехIе! Чесабиуси байрамличилра уркIи-уркIиларад мубаракрирули, эс дигулра: хъалибарглизиб балгундеш, чархлизиб арадеш, дурхIнала ва хIу-алавти гъамтала кахIедурхути диги!

Нушала корр.