Дагъиста машгьурси боксер НурмяхIяммад Шагьнавазов 80 ибти дусмала ургайчив сунечила дунъяличир хабардерхурси сайливан спорт дигути лебилра дубурлантани гIяхIил валуси сай.
Ил бегI гьалав сайри Европала чемпион, дунъяла ва «Игры доброй воли» ибси журала абзанала Кубокла вегI ветаурси. Илини сарри бегI гьалар Дунъяла чемпионатличир ва Олимпиадабала хIязаначир медальти сархибти. Илкьяйдали СССР-ла машгьурти боксертазивадли ил бегI гьалав дусла гIяхIсигъуна боксерлизи халбарибсири.
НурмяхIяммад Шагьнавазов акIубси сай 1965 ибил дусла февральла 19-личив Губданила шилизив. 11 дус виубхIели спортла «Спартак» ибси цалабяхълизив тренер Юрий Мирзабекянни бекIдеш дирнила удив боксли виркьес вехIихьибсири.
1978 ибил дуслизиб «Спартак»-лизиб секция гIекIибхIели Мирзабекянни НурмяхIяммад «Динамолизи» киб ва сунела руркъян Арслан
МуртазагIялиевла кьукьялизи велкIун. Арслайчил НурмяхIяммад калунсири сунела спортла ахъси даражаличи ваайчи.
17 дус виубхIели НурмяхIяммад Тбилисилизир дурадеркIибти халкьани-ургарти гIулухъаби-ургарти абзаначив СССР-ла чемпион ветаур ва мургьила медаль сархиб.
1983 ибил дуслизив Тбилисилизир, Румыниялизир, ГДР-лизир ва Югославиялизир дурадеркIибти халкьани-ургарти СССР-ла гьалабдеш багьанданти абзаначив гIяхIсигъуна боксер ветаур.
Юниортала «Гьалмагъдешла Кубок» ибси халкьани-ургабси абзличив кубалан Феликс Савонничивадли чедивикибсири. Ил челябкьлализив боксла (любительский) легенда сайри, Олимпиадабала хIязанала хIяйна ва Дунъяла шуйна Чемпион ветаурсири.
Кубаланнис Н.Шагьнавазовли кабихьибси дарс дугIли архIебякьун. 1984 ибил дуслизиб Дагъиста боксер Северная Кореялизиб бетерхурси халкьани-ургабси СССР-ла гьалабдеш багьанданси жагьилтала абзличив кIинайсра чедиикиб ва РСФСР-ла чемпионатличиб мургьила медаль сархиб.
ГIурра Шагьнавазовли сархибдешуни диахъуб 1985 ибил дуслизир. Илини цаибил мер буциб Индонезияла Президентла Кубок багьанданси машгьурси абзличибра.
Будапештлизиб бетерхурси Европала чемпионатличив дагъистанлан багьадур умутличил финалличи дуравхъун ва ФРГ-лизивадси Маркус Боттачивадли чедиикили мургьила медаль сархиб. ИлхIейчибадли халаси замана архIебякьи лебалли, НурмяхIяммад Сеуллизиб дураберкIибси Дунъяла Чемпионатличивра сай гIяхIил хIядуриубси спортсмен виъни чебаахъиб. ИлхIели илини заманалис гьалар чедибдешуни сархули, профессионалти-ургав челябкьлализив Дунъяла Чемпион ветаурси Риддик Боучивадли чедивикиб. Финалличив биалли канадалан Эгертон Маркусличивадли чедиикиб. Илкьяйдали 1985 ибил дус Н.Шагьнавазовлис гьарбизурсили бетаурсири.
Илини сархути умутчерти чедибдешунани ва рингличив халаси устадешличил узес балнили илала къаршикартас иличибадли чедибдеш сархес багьандан сегъуналра имкан кавлахъуси ахIенри. Илкьяйдали боксла (любительский) халкьани-ургабси ассоциацияли НурмяхIяммад Шагьнавазов дунъяличив бегIлара гIяхIсигъуна боксерлизи вейгIунсири, 1988 ибил дуслизив биалли СССР-лизив хабарла боксер сайливан вагьахъурсири.
Чедибдешуначил давлачебсири дарган гIяхIгъабзас 1986 ибил дусра. Халкьани-ургарти халати лерилра абзаначив ил чедииркусири. Илини илкьяйдали бутIакьяндеш дарибтири Таиландлизиб бетерхурси «Кубок Короля» ибси абзличив. СССР-ла цалабяхъибси тренертала штабли губдалан багьадур «Игры Доброй Воли» ибти абзаначир бутIакьяндеш дарахъес улкала командализи керхахъурсири. Илди абзани Олимпиадала хIязаначи цугтири ва авал дусла духIнар дурадуркIутири. Илди абзани дебали машгьуртири спортсменти-ургар ва илар сархибдешуни дирахъутала хIурматра халасири.
НурмяхIяммадли сунечи тренертани бихьибси игьдибар марбарибсири илхIелира. Финаллизив сунела командализивадси Андрей Караваевличивадли чедиикили, цаибил мерличи дуравхъунсири.
Сегъунти абзаначир бутIакьяндеш дараллира илини, мурталра чедииркусири ва Сеуллизир дурадеркIибти Олимпиадала хIязани дехIдихьайчи чеббикIибти спортсментазивадли цаибсили ветаурсири.
Илкьяйдали ункъли гьалавяхI вашусири илала гъамси юлдаш ва рингличив къаршикарли ветаурси Дмитрий Елисеевра. Илди-ургабадли Сеуллизир дурадуркIути Олимпиадала хIязаначир бутIакьяндеш дарахъес багьандан тренертани илдазивадли ца чеввикIес хIяжатлири. Илдачила лерилра баянти пикрилизи касили, тренертани губдалан урши Сеуллизи вархьес пикрибарибсири.
ИтхIели Олимпиадала хIязаназир бутIакьяндеш дарибси дарган уршила кьуватчебдешличила ва гьунарличила адамтани гьаннара хъумуртули ахIен, итхIейчирадли 37 дус ардякьи диаллира.
Абзла хъумхIертесил бутIара гьанбиркахъехIе. 71 килограммличи баайчи битIакIлизибти спортсменти-ургабси абзла финаллизиб къаршибикибтири рингла «хозяин» Пак Си Хунн ва америкалан Рой Джонс. ХIябалра раунд ахирличи дикайчи Южная Кореялизивадси америкаланни сагъ-саламатли дикахъибтири, амма чедибдеш Паклис бедибсири. ИлхIели лебилра заллизибтала разиагардешла тIамри зайдухъунтири. Америкала делегацияла разиагардешунира дахъалри. Илдани къаршидеш дагьахъурли хьаллира гIяхIдеш бетхIеур. Илкьяйдали Рой Джонс Олимпиадала хIязанала мургьила медаль агарли калунсири.
Биалра америкаланти 81 килограммла битIакIлизиб гьалабухъунтири. Илкьяйдали Финалличиб Эндрю Мейнард советский боксер НурмяхIяммад Шагьнавазовличил къаршиикибсири. Илабра аги тикрарбиубсири. НурмяхIяммадли бегI гьалабал гьарил секIал тренертани дагьахъурти кьяйдурти пайдаладирули, умутличил гьалавяхI вашулри. Заллизи кабиибтицунра ахIи, дунъяла лерилра улкнала гIялам халкьра хIербикIули чедибдеш сархибси Н.Шагьнавазовлис ахIи, судьябани илала къаршикарлис чедибдеш бедиб. Амма илис бедибси цIуба арцла медаль лебтасалра мургьилайчибра дурхъасили бетаур.
1989 ибил дуслизив НурмяхIяммадли Дунъяла Чемпионатличиб жармала медаль сархибсири. Илкьяйдали цархIилти абзаначибра чедибдешуни сархибси спортсменни, илини бегIлара цIакьани вавалидяхъибхIели бокс бархьбатурсири.
НурмяхIяммад Шагьнавазов Дагъистайзивцунра ахIи, Россиялизивра халаси хIурматличил пайдалавикIуси сай ва республикализирра илала дурарра дурадуркIути лерилрара-сера спортла абзаначив хIурматла гIяхIялра сай.
2010-ибил дуслизир НурмяхIяммадла юлдашуни Жамалудин Сахаватовли, Рустам МяхIяммадовли, Ордаш Ордашевли гьалабихьибсири Украинала Артемовск шагьарлизиб губдалан спортсменна хIурматлис абз дураберкIахъес ибси пикри. Ил сипта ункъли гIеббуцибсири Хасавюрт шагьарла бекI Сайгидпаша ГIумахановли ва Дагъиста спортла министр Арсен МуртазагIялиевли. Артемовсклизибси спортла КIялгIялизиб балбуц ибхьухIели Дагъиста эстрадала гIяртистуни Зайнаб Махаева, Лариса ХIяжиева, Роза Максумова, цархIилти гIяртистунани ва «Дубуртала жагьдеш» бикIуси хореографияла ансамбльли чула пагьмурти чедаахъибтири.
Балбуц гIеббуцес бакIиб СССР-ла замана цалабяхъибси командализибадти НурмяхIяммадла бахъхIила юлдашунира.
Илкьяйдали илди спортла абзани дурадеркIницун ахIи, Донецкла областьлизир Дагъиста культурала БурхIни детурхули сари или гьанбикеслири. ИтхIели илгъуна къугъаси балбуцла дазурбазиб Артемовсклара Хасавюртлара ургар узидешла бархбасуни кадизахъниличила меморандум бархли кьабулбарибсири.
2011 ибил дуслизив НурмяхIяммад Шагьнавазов Дагъиста Халкьла Собраниела депутатли викIибсири, «Россияла патриотуни» ибси фракциялизи керхурсири.
ИшхIелла манзиллизив НурмяхIяммад Шагьнавазовли сунела уркIили чеббикIибси санигIят бузахъули, Бузай Ибрагьимовла Олимпиадала хIязаназир бутIакьяндеш дарести чеалкIуси наслула вакилти руркъули сай. Илгъуна чевяхIси спортсменни бяркъурти дубурла чIакназибадли бахъли Олимпиадала хIязаначир чедибдешуни сархниличи вирхес вирар.
Салимат ИсмягIилова
