Мусаадаев Рабазан ХIяжимурадович акIубси сай Ахъушала шилизив, хIурматла хъалибарглизив. Рабаза неш Салимат ва дудеш ХIяжимурад  дахъал дусмазиб культурала управлениелизиб бузули саби. Пагьмучебти, малхIямти, адамла мурад бетаахъес къайгъилизибти адамти саби илди.  Илдани кIел дурхIя абилкьули саби, гIяхIси бяркъра бедили, жавабкарти бетаахъурли.  Илдазивад ца сай Рабазан, гьанна ВатIайс къуллукъбарес арякьунси.

Рабазан дигичебси, балгундешличил хIербируси  хъалибарглизив халаваибси сай.  Рабазай Ахъушала урга даражала цаибил школализир 9 класс тамандарили гIергъи, Избербаш шагьарлизибси  педагогический колледжла  физкультурала факультетлизи керхур.

Рабазай спортла шайчирра сархибдешуни дирахъули сай.  Мушулбашнила шайчир детурхути абзаначив ил гьаларти мераначи лайикьвиркули сай. Гьанна биалли, Рабазан ВатIайс къуллукъбарес арякьун. Илини Къарачаево-Черкессияла Республикализибси 34 ибил мотострелковая гвардейская бригадала дявила частьлизиб къуллукъ бетурхахъули сай. Илини жавабкардешличил,  гъабзадешличил сунечи хъарси чебла ихъули сай.

Рабаза неш Салимат акIубси сари Ахъушавадси ЧебяхIси ВатIа дергъла бутIакьянчи, ВатIан багьандан гъабзадешличил ургъули калунси МяхIяммад ГIямаровла халаси хIурматла ва бахъал дурхIнала бегI  хъалибарглизир. Салиматла неш Загьидатра малхIямси, духуси, халкьла хIурмат сархибси, сабурла, бахъал дурхIни абикьес багьандан халаси бузери барибси хьунул адам сарри, бунагь-хатIа урдуцаб чула!

Рабазан ВатIайс сунечи хъарси къуллукъра барили, ара-сагъли сунела бегIтачи чарухъахъес кьадарбиахъаб Аллагьли!

С.ГIябдуллаева