Цугнила ши Ахъушала районнизиб халкьла балгундешличибли, цалис цали кумекбирниличибли, разидешра децIра цахIнар дуртIули хIербиэс бурсибиубти биъниличибли машгьурбиубси саби.

Цугнила ши мерлабиубси мерра гапбирули вири районна шими – махьурбачила баянти гIяхIил далуси журналист, поэт Насруллагь ГIямаровли, бунагь-хатIа урдуцаб сунелану. «Цугнила ургубалар жявли арши дилкьути сари, – викIусири Насруллагь, – Цугнила шилизивадси адамли цархIилла гIямру къябаънила ва цархIилтани цугланнис илгъуна барнила цалра анцIбукьра биубси ахIен».

Илгъуна кьиматличил даргала машгьурси журналистли иргъахъусири цуглантала гIяхIти хIял-тIабигIятличила. Сунела шантачила жуз белкIунси илцадра чебетаахъили бурили сай Цугнила шила тарихличила, шантала гIядатуначила, динна адамтачила, дявила бутIакьянчибачила, Цугнила шилизибад дурабухъунти машгьурти адамтачила.

ХIусен КьурбанмяхIяммадов Цугнила шилизибадти бегI гьалаб чебяхIси даражала багьуди касибтазивад ца саби, дахъал дусмазиб  Цугнила урга даражала школализиб хIянчи барибси, чумра ХIурматла Грамотара, чихъти умира сархибси педагог. КIина ХIяжлизи вякьи сай, динна шайчибси багьудира чеабиутази касахъес къайгъибирули сай.

ХIусе гIямрула рархкья Хамис 30 дусличирра имцIали шила культурала Юртла директорли рузули калун. ХIусей ва Хамисли 6 урши-рурси абикьур.

ХIусен КьурбанмяхIяммадовли хIядурбарибси жуз  сабирхъухIели, тамашахIейэс хIейрар. Авторли барибси хIянчи сецад халасил ва чебетаибсил: тухтуртачила, учительтачила, спортсментачила, ВатIайс къуллукъбирутачила, культурализиб гьалабяхI арбякьунтачила, дурхIнас гIяхIси бяркъ бедибтачила ва бахъал цархIилтира цуглантачила белкIани, илдала суратуни, шила мер-мусаличила баянти, халкьла далуйти ва айтуби дучили сай.

«Цугнила ши гьалаб ва гьанна» ибси уличил дурабухъунси жузлис гьалагъай белкIи сай Дагъистайзив машгьурси гIялим, филологияла гIилмуртала доктор, ДГУ-ла кафедрала заведующий  БяхIяммадов Муса Расуловичли. Жузла авторли барибси хIянчи М.БяхIяммадовли ахъли кьиматлабарили сай.

Хаслира чебетаахъили  хIянчи барили сай ХI.КьурбанмяхIяммадовли ЧебяхIси ВатIа дявила бутIакьянчибачила баянти дурчнила шайчиб: ВатIан багьандан жан дедибти 38, чарбухъунти 43 бургъантала умира, илдала шабагъатунира гьандушили сай. ВатIан багьандан алхунти 12 мерличиб хIярибихьили биъниличила белкIи сай. Гьандушили сай уми дургъбала дусмазиб къиянти хIянчи дирули калунти хьунул адамтала ва дурхIнала.

Цугнила шилизибад чебяхIси даражала багьуди касибти цаибти  буили саби узби МяхIяммад ХIяжимурадов, ЧебяхIси ВатIа дергъла бутIакьянчи, гIяхIцад шабагъатуни сархили чарухъунси ва гIур жавабла къуллукъуначив узули калунси, БяхIмуд ХIяжимурадов. Шила школализиб бузули кали саби урусла миллатла 13 педагог, цархIилти шимазибад ва районтазибад бакIибти 50 мугIяллим.

Школала директорла къуллукъличиб бузули кали саби Кьурбан Булатов, ЧIимяхIяммад ХIясанов, Залкип Ражабов, Александра Федосеева, ГIяли ГIябдусаламов, АбдуряхIман ШяхIбанов, ХIусен КьурбанмяхIяммадов, Рабазан ШяхIбанов, ШапигI Рабаданов, РажабгIяли Булатов, бусягIят узули сай Рабадан Сулайбанов.

Цугнила шилизибадти машгьурти адамтазибадли сабри МяхIяммад ХIяжимурадов ва МяхIяммад Рабазанов – халкьла баркаллаличил ва хIурматличил жавабкарти мераначир хIянчи дарибти, пачалихъла чихъти шабагъатуни касибти. Илдала хIурматла гьуни даимбарили саби М.ХIяжимурадовла рурси, халаси багьудила регI тухтур СалихIят МяхIяммадовнани ва М.Рабазановла урши ГIямар МяхIяммадовичли, Дагъиста шила хозяйствола академияла преподаватель, гIилмуртала кандидат.

ГIилмуртала доктор сай Руслан Мяммаев, бахъал адамтала баркалла сархибси сай республикала ветерантала госпитальла  тухтур, медицинала гIилмуртала кандидат МяхIярам Мяммаев.

Баркаллаличил гьандушили сай уми участковая больницала бекI тухтур Рабадан Рабадановла, дахъал дусмазиб  Цугнила шилизибси МУП-лис бекIдеш дируси Амирислам Мусаевла ва шила администрациялис бекIдеш дируси Рабазан НикIаевла, рахъхIила учительница Хадижат КьурбанмяхIяммадовала.

Цугнила шила администрациялизи кадурхули сари хIябал ши: Цугнила, Урганила ва ГулебкIила. ХIябалра шила халкь чула ургаб уржили хIеркабирули саби.

Жузла авторли белкIи сай гIяхIти хъалибаргуначилара.  Илдазибад ца саби Шейховхъала хъалибарг, сунезибадра пагьмучебти хIябал педагог дурабухъунти: Хадижа, Рабазан ва МяхIяммад. Шила адамтазибад цаибтала лугIилизибад чебяхIси даражала багьуди касибсири илдани  ва халаси хIурмат сархиб чебетаибси хIянчиличил, гIяхIти хIял-тIабигIятличил. Рабазан гIямрулизивад жявли арякьун. Илала гIямрула рархкья Муъминат Дахадаевла районнизирадси сарри ва дурала мезла дурсри кадирхьули школализиб чекаризурли хIянчи бариб. Хадижанира МяхIяммадлира шантала баркаллаличил бузери даимбарили саби. Хадижа Цугнила шилизирад цаибси хьунул адам сари чебяхIси даражала багьуди касибси. Сунела 6 урши-рурсилизира багьуди касахъиб.

Илдала риштIалгъуна рузи ПайтIма дахъал дусмазир Ахъушала районна газетала редакциялизир корректорли рузули сари ва чуйнара ХIурматла Грамоталичил шабагъатларарили сари.

Жузлизир лер Афганиста мер-мусаличиб биубси дявила бутIакьянчибачила, гIяхIти кьиматуначил бучIути студентуначила баянти.

Цугнила шилизибти бахъал адамти шила дураб, шагьуртазиб бузули саби. ГIяхIси девличил гьанушес лайикьли сай жагьил поэт,писатель, журналист Кьади ГIялисултIанов, «Гьалмагъдеш» альманахла редактор. Жузлизир баянти лер сунела хала дудешличила, тяп илгъуна ула вегI, сайра ЧебяхIси ВатIа дергълизив ургъули калунси ва къел-хIерзи агарли ветахъибси.

Дучили сай авторли дахъал халкьла далуйти, буралаби, айтуби, мер-мусала уми, суратуни. Лер шилис ва шантас хасдарибти сунела назмуртира. Гьандушили сай уми шилизиб бахъал дусмазиб хIянчи барибти адамтала. Илди-ургаб леб Зайнаб Сулайбанова, Цугнила шила администрацияла бекIла къуллукъличир рузули калунси, ва илала рузи КьурбанпатIимат Сулайбанова — Цугнила школала рахъхIила учительница.

Шилизибад чебяхIси даражала багьуди касибти цаибти специалистунала умира делкIи сай авторли. Илди саби ГIяли ГIябдусаламов — химик; ШапигI Рабаданов — биолог; ХIусен КьурбанмяхIяммадов — филолог; МяхIяммад Сулайбанов — физик; Жавгьарат Даудова — математик; МяхIяммад Шайхов — историк; МяхIяммад Рабаданов — агроном; Муслимат Сулайбанова — экономист; Рабадан Рабаданов — педиатр; Амирислам Мусаев — ветеринар.

ХI.КьурбанмяхIяммадовли хIянчиличила сецад гапъала делкIалра дахъал ахIен или гьанбикесли саби, хаслира Цугнила школализиб бузули калунти урус учительтала ва цархIилти шимазибад бузес бакIибти педагогунала уми ва илдачила баянти делкIи виъни пикрибаралли. Илди-ургаб леб гIяхIцад учительти Дахадаевла ва Сергокъалала районтазибад бакIибти, ХIямшимала, ТIантIала, МухIела, Бутрила шимазибад бакIибти. Баркаллаличил гьандушили сай уми ХIямшимабадти ИсмягIил ИсмягIиловла, МяхIяммадхIяжи ГIябдуллаевла, Кьассагумахьилизибадти ГIяли ГIяхIмадовла, ГIямар Кьурбановла, Хадижат Рабадановала, ПатIимат ХIуммаевала, Умалат Адамовла, Уржагьимахьилизирадси СалихIят Арсланбековала ва бахъал цархIилталара.

Сай акIубси шиличи сецад дигиличил ва хIурматличил бурулил ХIусен КьурбанмяхIяммадовли сунела жузлизиб.

Жуз хIядурбарес багьандан пайдаладарибти белкIани гьандушили сай авторли ва тамашахIейэсли ахIен ил шайчиб барибси хIянчиличи: чумилра жуз даргили сай ва илдазирад  сунес хIяжатти  баянти касили сай.

«Цугнила шилизиб 40 ибти дусмазиб дебали камли буибти саби бехIбихьудла багьуди касибти адамти, — лукIули сай ХIусен КьурбанмяхIяммадовичли. — ИшбархIи биалли 200-личи гъамли адам леб гIяхIси багьуди касибтицунра ахIи, гIилмуртала кандидатла, докторла, цархIилтира хIурматла уми сархибти».

Арадешра разидешра диаб пергер адамти ХIусе ва Хамисла  гIямрулизир, игъбарла биаб чула дурхIнала ва лебилра цуглантала гIямрула кьисмат.

П.Маллаева