ГIяхIгъубзни МяхIяммадовхъали Дахадаевла районна Хъярбукла шилизибадти саби. Сержант Шамил ва батальонна командир Ислам МяхIяммадовхъалани СВО-лизир бутIакьяндеш дирули, ахIерси ВатIа хъархIерагардеш далтахъули сари.
МяхIяммадовхъала хъалибарглизиб авал уршира ца рурсира леб. Илдазибадли кIел узини — Шамилли ва Исламли ВатIан балтахъанна санигIят чеббикIиб.
Шамил МяхIяммадов акIубси сай Къизларлизив. ВиштIахIейчивадал ил ахIерси ВатIайс къуллукъбирнила санигIят чеббикIес хьуликIусири. Сириялизир кадикибти дявила анцIбукьуназир илини 2014 ибил дуслизир бутIакьяндеш дарибтири. ИлхIейчивадли Шамилли сунела санигIят гъабзадешличил даимбариб. Украинализир дявила анцIбукьуни дехIдихьибхIелира Шамиль шайчив кахIелун. Илини дявила майдайчир чедиахъути игитти баркьудлуми улкалира ахъли кьиматладирули сари. Ил шабагъатлаварибси сай 2024 ибил дуслизив «Дагъиста халкьла игит» ибси мургьила зубариличил, 2018 ибил дуслизив михъирличи биршуси «Киркенесская морская пехота» ибси лишанничил ва Жуковла медальличил. Илдазирадли гьарилли ургъанна гьунартачила ва санигIятлашалти устадешличила балахъули саби.
Шамилла узи Ислам МяхIяммадовра Къизларлизив акIубси сай. Илинира ургъанна санигIят чеббикIиб. Илини сай пагьмучевси командир сайливан чевахъиб, суненира къиянти замунтазиб бургъанти игитти баркьудлуми дурадуркIахъес уркIичеббирахъуси. Исламлира ВатIайс мардешличил къуллукъбирни багьандан чумал шабагъат сархиб. Илди сари «Дявила асилдеш багьандан», «Дергълизив декIарухъни багьандан», Суворовла ва Жуковла умачилти медальти. Илди шабагъатунани Исламли чедиахъути гьунартас бикьридеш дирули сари.
Бургъантала бегIти Маисат ва Жамалутдин, гьайгьайрагу, къиянти дусмазир кадиркути далагардешуначи хIерхIеили, ВатIайс шанда баруван къарауйчи кабизурти чула уршбачи пахрули бицIили саби. БегIтала, гъамтала ва шантала шайзибадси кумек бургъантас хIяжатсира саби.
Узби МяхIяммадовхъали чеалкIуси наслулис ВатIайчирти дигиличибли ва гъабзадешла баркьудлуми дурадуркIнила шайчиб гIячихъси мисаллира бетаурли саби. Багьадуртани чедиахъути игитдешла баркьудлумани нушала халкьла цадеш дебабирахъни чебиахъули саби.
Дахадаевла районна администрацияла пресс-служба
