ИшхIели Украинализиб бетурхуси дявила хасси балбуцлизир нушала Дубуртар Улкала асил уршбани жигарла бутIакьяндеш дирули сари ва игитдешла гьунарти чедиахъули сари.
Ишаб гьанбушес дигулра гъабзадеш дакIудирути уршбала лугIилизивадси Мусабек Мусабековличилара, сенахIенну ВатIайчи дигили гьавуцили викуси, сунела къуллукъуни халаси жавабкардешличил тамандируси иличибад чеалкIуси наслулизира гIибрат касахъес багьандан.
Мусабек Мусабеков акIубси сай Дахадаевла районна Меусишала шилизив. Ил сай гIяхIъулали СВО-лизир бутIакьяндеш дарес арякьунсири. Илкьяйдали илини гъабзадешла ва патриотизмала мисал чебиахъуси сай цархIилтасра.
Ишдусла апрельличив Мусабек Луганскла Халкьла Республикализи гуманитарный кумекличил вякьунсири. ИхтилатикIухIели, аргъеслири ахIерси ВатIайс къуллукъбарес ил хIядурли виъни. Старобельсклизиб илала юлдашунани ва шантани къуллукъбирулри. Илини багьахъур илдачил сайра варх виэс хIяжатли биъниличила. Хъули лявкьухIели илини буриб: «Ну чарулхъас ва хIушачил варх кавлас».
Хъули чарухъи хьалли Мусабек паргъатли уэс хIейуб. Ил ВатIа хъархIерагардеш батахъес багьандан, сагали СВО-лизи арякьун.
М.Мусабековличила лебтанилра гIяхIтицун дугьби сари. ХIера, се рикIулил иличила бургъанти ва илдала хъалибаргуни гIеббурцнила фондла председатель Алена ГIябдуллаева: «Мусабекличил вягIда къулбасбарни мягIничебси ганз саби илини ВатIайс мардешличил къуллукъбирнила шайчибси. Иличил рарх ну Лугансклизи рукьес кьадарбиубсири. Илабти адамтас ва бургъантас гуманитарный кумек гIеббаахъес багьандан илини къайгъни дакIударибтири. Иличил чумал дус районна администрациялизир рарх рузули калунсири ну ва илала хъалибаргличил, нешличил тянишсира.
Ну рирхулра, илала баркьуди гьаннала наслулис гIяхIси мисалли – гIибратли бетарниличи. Нушани лебтанилра балулра ВатIайс къуллукъличибти гIеббурцнила мягIничебдешличила. Мусабекла баркьудили халаси асар биру ВатIан батахъес хьулбикIутачи. Чедибдешличил чарухъен, хIурматла Мусабек!»
Нура чумал дус Мусабекличил рарх рузули калунсира. Умутличил буресра рирус ил ВатIа гьарли-марси патриот сай или. Ишдусла апрельличир гуманитарный кумекличил нуша Лугансклизи дякьунхIели, илала гъабзадешла баркьудлумала бикьрили ретаурсири.
Кумек хIяжатсиличи ил итмаданал музаухъес хIядурси сай. Илини бургъантицун ахIенри гIеббурцути, даршути адамтала зугIлумира бекIдарес къайгъни дакIудирулри.
Илгъуна цархIилти багьандан цIализи тIяхIухъесра хIядурси гIяхIгъабзачил рарх рузули калниличи нуни пахрубирулра. Мусабек игитдешла ва патриотизмала гьарли-марси мисал сай. ХIу чедибдешличил чарулхъниличи дирхулра нуша!
Гьалавван Мусабек Мусабеков «Дявила асилдеш багьандан» ибси медальличил шабагъатлавариб. Илгъуна шабагъатличил меусишан гIяхIгъабза нушанира уркIи-уркIилавад мубараквирехIе. Жяв-жявли сунела дигуси хъалибаргличи ва гъамтачи ара-сагъли чарухъи дигулра.
Марият Чапарова
