Ишди бурхIназир нушала ралликьяна Муъминат Хаттаева 65 дус риубли сари. Илини макьалабицун ахIенну назмуртира, хабуртира, повестунира лукIути сари. «ГьанкIагарти дугурби» бикIуси, назмуртира хабуртира кадерхурси, халали ахIенси жуз Дагъиста жузала издательстволи 2004-ибил дуслизиб дуракаибсири ва халкьли дигиличил кьабулбарибсири. «Сакинат» бикIуси, халаси повесть 2010-ибил дуслизиб дурабухъунсири. Повесть урус мезличи шурбатурли 2017 ибил дуслизиб дурабухъун ва жузала кьасиличиб бахъхIи кахIели халкьла урга тIинтIбиуб. Гъамливан Дагъиста жузала издательстволи «ГIямру даимдирар» бикIуси жузра дуракайу. Илала белкIани «Дагъиста хьунул адам», «Гьалмагъдеш», «Лачин» журналтазир гьаман дурадулхъули сари. Муъминат, нушала газетала бучIантас гIяхIризурси, дахъал, декIар-декIарти журала белкIанала автор сари. АкIубси бархIиличил мубаракрирули илала цаибил жузлизир дурадухъунти ва сагати назмурти газета бучIантасра гьаладирхьулра.
Даргантас
Сабурла умхьули, дунъя ибхьанти,
Мургьила някъбани, яшав лушанти,
Халадеш агарли, гьунар халати,
Даршудеш диганти, дила дарганти,
Дамсес хIебалули, дузес диганти,
Дяв ахIи даршудеш уркIилизирти,
Узидешла къала, дила дарганти.
Дарган мезлис
Даргантала рухIла, адабла умцла,
Нушала миллатла дурхъаси давла,
Дахъал лугъатуни делсунси хазна,
АкIубси ванзаван мяхIкамбарили,
Аманатбарили вавнабяхъяхъес,
ДурхIнази нушала, анхъ нешла мезла,
Дарганти абикьаб дарган нешана,
Илизиб сабину гIямрула мягIна.
Хайям, хIу вархьли сайри
Азир дус гьалав кьяйда,
Хайям, хIу вархьли сайри,
ИшбархIира бархьдешла,
Багьа дургIели саби.
ИшхIелира гIярякьи,
Бахъаллис кьибла сари,
Гьалар кьяйда къурушми,
Ахърила умцла сари.
Тахличибти гьаннара,
Гьалабван хамли саби,
ХIялалли хIербирути,
Халкьлис къиянни саби.
Дунъя аргъес дигути,
Гьаннара камли саби,
Давла багьандан гIямру,
Кьурбандирули саби.
КIибяхIяндеш, хаиндеш,
ГIурра черяхIли сари,
Рушбатлира цIакьлира,
Дунъя буцили саби.
Азир дус гьалав кьяйда,
Хайям, хIу вархьли сайри.
Дунъяла халкь барсбиэс
Азир дус камли сари.
Рерцахъаба Аллагь
Рерцахъаба, Аллагь, кьясдешлизирад,
УркIби мискинтала гъай-мезлизирад,
Халарурхус ибси пикрилизирад,
ХIярамли бакIибси къурушлизирад,
Арцличиб белшунси талихIлизирад,
Баракат агарси яшавлизирад,
Зиланти агарти гIямрулизирад,
ГIямрула пашманси ахирлизирад.
