Ардякьунти бурхIназиб Сочилизиб «Лебил Россия – 2024» бикIуси уличил ишхIелла журналистикала ХХVIII ибил мажлис бетерхурсири. Илцад халаси кьадрила ва санигIятлашал мягIничебси балбуцлизир нушала республикала вакилтанира жигарла бутIакьяндеш дарибтири.
БутIакьяндеш дарнила дурабад, нушала цацабехIти бархкьябани пагьмулашалти конкурсунира чедибдешличил ахъиб. ХIера, республикала «Дагъиста хьунул адам» журналли «БегIлара гIяхIси дизайн» бикIуси номинациялизиб гьалабдеш сархес имканбакIиб. ЦархIилтазибад бегIлара гIяхIси ва къулайси сабливан, декIарбухъунси журналли пагьмулашалси конкурсла Диплом касиб.
Россияла журналистунала Союзла председатель Владимир Соловьевли мажлисла замана баягъи Диплом бедиб «Дагъиста хьунул адам» журналла бекI редактор Хамис Шамиловази.
«Замана» газетала редакцияла агьлулира Хамис ГIяхIмадхановна ва илала бекIдешлиуб бузути пагьмучебти хIянчизарти илгъуна сархибдешличил уркIи-уркIилабад мубаракбирулра. ХIушала бамсриагарси бузерилизир гьатIира халати сархибдешуни диубли дигулра!
