Адамти акIес гьалаб Аллагьли илдас санигIятуни дуртIули сай. Илдазибад бегIлара чебяхIсилизи халбирулра тухтурла санигIят. СенахIенну илини зягIипти мухIлила гъайли, малхIямси хIерли сагъбирули сай. Илдигъунти дигили чумилра адамла жан дерцахъес имканбикIули саби. Илкьяйда илдани халаси пай кабирхьули саби адамла гIямру дерцахъес ва гIурра гIеркъадиахъес.
Бахъал саби дарганти-ургаб машгьурти тухтурти, чучила лебилра Дагъистайзиб хабардерхурти. Илдала лугIи чебирцIахъули сари сунела санигIят ункъли балуси пергер тухтур ПатIимат Каримовани. Адамтачи уркIи изуси, гьарли-марли хIялалси тухтурличил тянишиэс набра кьадарбиуб. Ил дебали малхIямси хьунул адамли гьарил вакIибси жагали кьабулварили, илис гIягIниси кумек гIеббиахъулри.
ПатIимат акIубси сари Дахадаевла районна Зилбачила шилизир. Илала дудеш Ацци Каримов дахъал дусмазив Зилбачила урга даражала школализив мугIяллимли узиб. Ил жявли гIямрулизивад арякьунсири. Илини чумилра наслу бархьси гьунчи дураиб. Багьесли саби илгъуна хъалибарглизир гьарли-марси дубурлан алкIни.
ПатIиматли тухтурла санигIят школализир ручIухIелил чеббикIибсири. РиштIали рирухIелил ПатIимат адамтачи уркIецIичерси, кумекбарес гьалакси рирусири. ГIяхIти кьиматуначил Зилбачила урга даражала школара таманаили, ил Каспийскла медицинала колледжлизи карерхурсири. ПатIимат халаси гъираличил ручIи ва мурталра багьудлуми чедирцIахъес больницализи ва поликлиникализи рузес раши. Илини гьаман сунела акьуси замана колледжла библиотекализиб буркIи. Ункъли таманбарили колледжра, касили дипломра ил сари акIубси шилизи чаррухъунсири.
ПатIиматли сунела бузерила гьуни Зилбачила ФАП-лизир рузули бехIбихьиб. Камси заманала бухIнаб илини сунела шантала ва алавти шимала адамтала ургаб хIурмат сархиб. Дуги-хIери хIеили ил адамтала арадешлис къарауйчир рири. ПатIимат, гIяхIцад дусмазиб хIялалси хIянчи барили, МяхIячкъала шагьарла «Целитель» поликлиникализи медсестрали рузес шуррулхъун. Ишарра ил бажардирикиб шагьарлантала ва барх бузутала ургаб хIурмат сархес. Мурталра поликлиникала руководстволи ил гIибратлис руру.
ПатIимат, хIела гьамадли ахIенси бузерилизир гьатIира сархибдешуни ва гьарбизуни диаб!
Кьади ГIялисултIанов
