Нушаб лебтасалра ашкарливан, хъалибарг, илала дурхъадешуни ва бегIтала анкъи гьарил адамла уркIилис ахIерти, нушала гIямрула дебати хьулчни сари. Илдала икьайчибли саби нушаб къияндешуни ихъес ва сархибдешуни дирахъес имканбикIуси. Хъалибаргла бекIлибиубсигъуна масъала саби дурхIни абикьни, илдас бархьси бяркъ бедни, дурхъати гIядатуни наслубачирад-наслубачи диахъни: ВатIайчи диги, илала гьалар жавабкардеш дихни, гъамтачила къайгъни, халатала хIурматбирни, цали ца гIеббурцни, къугъати гIяхIялдеш дирни. Нушала дахъал миллатунар Дубуртар Улкализир хъалибаргла дурхъадешуни мурталра цаибси мерличир дирутири ва гьаннара сари. СенахIенну лерилра секIал хъалибарглизирад сари дехIдирхьути.
Хъалибаргла, дигила ва мардешла БархIи Дагъиста БекI Сергей Меликовли СВО-ла бутIакьянчибала бегIтачил гьунибаъни дураберкIиб, чулира 25 дусличирра имцIали дарх гIямру деркIибти ва хIурматла дурхIни абикьурти. Гьунибаъниличиб республикала декIар-декIарти районтазибадти ва шагьуртазибадти хъалибаргуни цалабикиб. Илди-ургаб Сергокъалала районна КичихIямрила шилизибадти МяхIяммадовхъала хъалибаргра лебри.
МяхIяммад-ХIябиб ва Меседу МяхIяммадовхъали 44 дус кьисматли цабарибси гьунчибкад башули саби, лерилра къияндешунира разидешунира дарх дуртIули. Илдани, дубурлантала бегIлара гIяхIти къиликъуни хьулчили дуцили, хIябал урши абикьур, бяркъличи бикахъиб, илдази чебяхIси даражала багьуди касахъиб ва гIямрула бягIуси гьунчи дураиб.
МяхIяммадовхъала хъалибаргли шилизир, районнизир, илкьяйдали республикализирра дурадуркIути гIядатла далдуцуначир бутIакьяндеш диру. Ил, сунела сархибдешуначибли, районнизиб машгьурси хъалибарг саби, сунечибадра цархIилтани гIибрат касеси.
Хъалибаргла бекI МяхIяммад-ХIябиб МяхIяммадов акIубси сай 1956 ибил дусла октябрьла 23-личив КичихIямрила шилизив. Шила школа таманбарили, Дагъиста медицинала институтлизи (гьанна университет) керхурсири ва ил ункъли хъараахъурсири. Илала гIергъи Челябинскла областьлизибси Карталы шагьарлизив узахъес вархьибсири. Илаб 4 дус хIянчи барили, сай акIубси шилизи чарухъунсири ва илабси больницализив узес вехIихьибсири. БусягIятла замана МяхIяммад-ХIябиб Шапиевич шилизибси амбулаторияла заведующийли узули сай. Бузерилизир сархибдешуни диахъни багьандан, МяхIяммад-ХIябиб Шапиевич «ДР-ла урибси тухтур»-ла уличи лайикьикиб.
Уршбала неш Меседу МяхIяммадова акIубси сари 1960 ибил дусла майла 5-личир Къаякентла районна Кьаранай-Аул бикIуси шилизир. Шила школа таманбарили гIергъи, политехнический институтлизиб чебяхIси даражала багьуди касиб. Вуз хъараахъурли, муруйчил рарх Челябинская областьлизи аррякьунсири ва технологли рузес рехIрихьибсири. 1985 ибил дуслизир Меседу муруйчил рарх чула биштIаси ВатIайзи чаррухъунсири ва КичихIямрила шила администрациялизир рузес рехIрихьибсири. ИшбархIи илини шила бекIла заместительла къуллукъ бузахъули сари. 2010-ибил дуслизиб халкь хIисаблизи кайснила баркьудилизи белгиси пай кабихьни багьандан, Меседу Куругълиевна «За заслуги в проведении Всероссийской переписи населения 2010 года» ибси медальличи лайикьрикиб.
Илдала халасигъуна урши Арсен МяхIяммадовли ДГУ-ла исторический факультет хъараахъурли, ВатIа гьалабси чебла ахъес гIярмиялизи арякьунсири. ГIярмиялизивад чариубхIели, Сергокъалала районна РОВД-лизив узес вехIихьибсири. Гьанна ил пенсияличив сай.
Ургавси урши МяхIяммад МяхIяммадов дудешван Дагъиста медицинала институтлизи (гьанна университет) керхур ва ил хIунтIена дипломличил хъараахъур. Ил МяхIячкъала шагьарла цаибил больницализив хирургли узусири. Украинала мер-мусаличиб Россияла дявила хасси балбуц бехIбихьибхIели, тухтурти хIяжатли биъни багьандан, М.МяхIяммадов живарибсири. Запорожская областьла Васильевка бикIуси шагьарлизиб мерлабиубси больницализиб бяхъибти бургъантас операцияби дирули хIябал баз калун. КIинайс, илини къуллукъбируси дявила часть Донецклизи гечбарибсири ва авал баз илаб хIянчи бариб. Тухтурли къуллукъбируси дявила часть Запорожская областьла Бердянск шагьарлизи гечбариб ва, бургъантала гIямру уцахъули, ишбархIиличи бикайчи М.МяхIяммадов илав узули сай.
СВО-лизир дакIударибти гъабзадеш, цархIилтас гIяхIдешлис лерилра цIакьани харждирни ва заманаличиб медицинала кумек гIеббиахъни багьандан хирург МяхIяммад МяхIяммад-ХIябибович пачалихъла шабагъатличи гьалаихьили сай.
ВиштIасигъуна урши Руслан МяхIяммадовли шила хозяйствола институт хъараахъурси саби.
Балбуцла ахирличиб МяхIяммад-ХIябиб ва Меседу МяхIяммадовхъалас, илкьяйдали гьунибаъниличи бакIибти цархIилти хъалибаргунасра, ВатIайс марти уршби абикьни багьандан, ДР-ла БекI Сергей Меликовли Баркаллала кагъурти ва хъумхIертести савгъатуни дедиб.
МяхIяммад-ХIябиб ва Меседу уршбала ва илдала баркьибтала сархибдешунани разибирули, илдала дигили алавбуцили хIербирули саби. МяхIяммадовхъалас, гъамси заманализиб, «Диги ва мардеш багьандан» бикIуси медальра бедлуга.
П.Мирзаева
