МяхIячкъалала Редукторный посёлоклизив хIерирули, Иван бикIуси дила зилан, урус адам лев. КIел-хIябал дус гьалар бялихъуни дурцес дашухIели, илра нура имцIаливан урхьула дублар къаршидиркутири. Ишдус бялихъунира агара, ил багьандан нуша камли къаршидиркулра. Биалра, ишди бурхIназив ну иличил къаршиикира.

Ну чеваибхIели, ил дебали разивиуб ва гьабуцили някъра сайра набчи гъамиуб. ИхтилатдикIухIели, илала гъай хIясибли, ну шакикира дила юлдашлис се-биалра бетаъниличила. Се биубли хIед или хьарикIулра. Иван кIантIивакIиб.

— Къачагъунани дила цайли цаси урши кавшиб, — викIар.

— Сен? Мурт? – уркIухъи хьарикIулра ну илизи.

— Арбякьунси  базличив, ил МяхIячкъалализибси урусла Свято-Успенский соборла къараулли вирусири….

НуникIун иличила Интернетлизиб белчIунра. 46 дус виубси Михаил Вавилин, къачагъуни чебухъунхIели, сунела ярга хIясибли урусла динна киласалис къарауйчив уилри. Илавси динна къуллукъчира булгес бакIибтира киласализи дигIянбикайчи, къараул газла тапанчализивад вайнукьабачи иртули калун. Михаил Вавилинни халаси къайгъи барибсири булгес бакIибтала жан дерцахъес. Амма сунела дерцахъес хIейуб. Нушала хIукуматли илала гьунар ахъли кьиматлабариб: «Гъабзадеш багьандан» бикIуси медаль къачагъунани кавшибси уршила дудеш Иван Вавилиннизи бедиб.

Михаил Вавилинцун сайрив гьатIи ит бархIи алхунси? Июньла 23-личиб гьанагарси балагьли лебил нушала республикала халкь уркIбухъахъун. Къачагъдешла баркьудили 20-личибра имцIали жагьил адамла гIямру къябаиб, биштIати цIуръабариб, хьунри гамъабариб, бегIти марайбиахъуб.

ИтхIели алхунтазив Дахадаевла районна Бакьнила шилизивадси полицейскийра левсири бикIули аргъира нуни. «Замана» газетала корреспондент сайливан, нуни пикрибарира ил гIяхIгъабзачила нушала газетализи макьала белкIес.

Ил пикриличил зянкъикIулра Бакьнила шилизивадси дила юлдаш ХIусен МяхIяммадовличи. Илини наб чула шантачил кадикибти анцIбукьуначила белкIахъес гьалабра кумекбарибсири. ХI.МяхIяммадовли гьаладихьибти баянти  хIясибли, «ХIябразиб хIяб агарти, хIяриб лига агарти» бикIуси макьала белкIунсири нуни. Ил дила макьала «Ассалам» газетализибра «Гьалмагъдеш» журналлизибра дурабухъунсири.

— Се бурес вируда хIуни, ХIусен, июньна 23-личиб къачагъуначил ургъули алхунси полицияла прапорщик,  хIела шан Рабазан Атциевличила? – хьарикIулра ну.

— Ит бархIи Рабазан полициялизибси сунела бегIла гIергъиси дежурстволичи дуравхъунсири. Илини пикрибарили уилри, Росгвардиялизивад арякьи, вягIдара бигьи, СВО-лизир бутIакьяндеш дируси виштIасигъуна узи Шамилличи укьес. Ит бархIи полицияла прапорщик Рабазан Атциевли бекIдеш дируси наряд МяхIячкъалала Редукторный посёлоклизибси полицияла участокличи дежурстволичи дурабухъунсири. Хапли оперативный дежурныйла рациялизибад буйрухъ бакIиб. «Чараагарли бируси хIянчилизирад акьути полицияла хIянчизарти Громовла уличилси кьакьалабси урусла киласализи къалабадикирая!» — бакьиб Рабазай рациялизибад. Сунела группализивадси Тюменьна областьлизивад заманалис нушачиб къуллукъбарахъес вархьибси Мезенцевличил варх, ил машиналичив Громовла уличилси кьакьализивяхI къалабавикиб.

Илдани балули ахIенри, илаб сегъуна анцIбукь кабикилил  ва чула гIямрулис сегъуна урехи лебал. Машиналичибад кабацIибмадан, илдачи кIел мерличирад хIярхIубала цIа чекьур. Рабазанра илала юлдаш Мезенцевра тапанчализибад иртес бехIбихьиб. Вяхъибси Рабазан хIярхIуби кадерхайчи иртули калун, амма къачагъунани кIелра юлдашла гIямру къябдердахъиб. Рабаза кIел уршира ца рурсира гIелаб калун. Авал дус риубси рурсили, дудеш мурт хъули чарулхъусил, гьаннара хьарбиули саби. Рабазайчил барх полициялизиб бузанти ил бегIла гIергъиси гьунчи гьунивватес музабухъун. Илдачил леври илала командирра. Илини полицияла прапорщик Рабазан Атциев сегъуна хIянчизар сайрил чебетаахъили буриб. Гьарил бирусиличи чеветаибси, тIалабчевси ва дахъал гъай агарли сунела къуллукъуни дузахъуси гвардияла прапорщик уилри нушала Рабазан.

— ХIуни се бурес вируда, ХIусен, хIела шан  гIяхIгъабзачила? – викIулра ну юлдашлизи.

— Рабаза гьарли-марси бяркъ, ВатIайчи ва адамтачи диги, къияндикибсилис кумекла някъ гьабалтни хIиличил ва нешла дерхъибти ниъличил уркIилизи хьурадиубти сари. Илала мурталра разити дяхI тухумтала, шантала ва юлдашунала уркIбазир даимлис калниличи ну вирхулра, — викIар ХIусен.

Рабазан ит балагьла бархIи шайчив калес хIейри, илис бяркъ бедибси дудеш ХIусен Атциев улкала гьарли-марси патриот ва гIяхIгъабза сай. Чернобыльлизибси атомная станция баргбердибхIели, ХIусенра цархIилтачил ита ваибсири.

«Чернобыльлизи ветаибси бархIи бархIехъ, нугъунти цархIилтачил стройлизив тIашхIели, нушази хъарбаркьуни гиб, — бурибсири илини сунечила. – Баргбердибси станцияла авэсил блокла хъалчиб хIебузули тIашси робот убяхIясес гIягIнили буилри.

Мониторлизиб набзи чевяхIихъуси гьунира чебаахъиб, тяхIяр-кьяйдара гIердуриб. ГIергъиси бархIи савли ну илгъуна анцIбукьлизир челгьути хасти палтарличил вегIварира. Дебали декIси вецIал метрличибра бухъянси гьаяра хъябличи баршиб. Мегьла ганзиличивад чевяхIяхъили, баргбердибси ядерный блокла хъалчи ватихьира. Блокла хъалчи ацIибхIели, кьукьубачи адиути радиактивный хяса-пухIлизи гIелайкира. ДуцIухъунрагу – кайкира. Дебали къиянбухъун айзес: набчирти палтар бурес хIейэсли декIтири. Ахирра-ахир ветаира роботличи, илизи гьая дебабарили, итил бутIа строительный кранна къярдализи бигьунра.

Илавад къалабали чарухъахъес кIина буриб: илав илцадхIи уэс дебали урехиласири. Набчи хъарбарибси таманхIебарили, ну чарухъес хIейубра. Нуни хIебарасли, гIур чили бирусири ил хIянчи? ГIягIнисира барили, ну гIелавяхI ватихьира».

Дебали вамсурси ХIусен, мегьла ганзиличивад увяхIихъухIели, 3 метрла ахъихIивад кайкибсири. ИтхIели ХIусен Атциевли асубирусиличиб вецIнали имцIали радиацияла кьадар касилри. ГIергъила бархIи сайгъунтала стройла гьалаб грамотара бедили, баркаллара багьахъурли, ил хъули  вархьибсири.

Илис гIергъи ХIусен Дахадаевла районна «Октябрьский» совхозла авлахъла бригадирли узули калун. Чинав узалра, сунечи хъарбарибси хIянчи чебетаахъили бируси адам сай нушала игит Рабаза дудеш ХIусенра. Совхозла давла батахъес ил мурталра къарауйчив вирусири.

ГIергъити дусмазив ХIусен зягIипикиб: илала сурслизиб демдрила (ракла) изала дакIубухъун. Чернобыльлизив радиацияла нуранау викнила асар сабри ил. Сурслизи операция барили гIергъи, ил гъайикIес хIейранвиуб.

Сунела гIямрула рархкья ГIяшурачил варх илини хIябал урши абикьур. Хала дудешла у бихьибси МяхIяммад сунела хъалибаргличил Сочилизив хIерирули сай ва ЧОП-лизив узули сай. Дила белкIла игит Рабазай Росгвардиялизиб къуллукъбирусири, бунагь-хатIаличивад Аллагь чевверхабну сунела. ХIусе виштIалгъуна урши Шамилли,  вягIда хIясибли дявила къуллукъбируси сайливан, СВО бехIбихьибти цаибти бурхIназибал илар бутIакьяндеш дирули сай.

Илдала хала дудеш МяхIяммад Атциев Бакьнила шилизив урибси гIяхIгъабза адам ва хIянчила зяхIматчи  вирусири. Илини дахъал дусмазир колхозла мазала букIунна хIянчи дузахъули дири. Нушала улкаличи фашист-гъармукаби чебухъунхIели, цархIилти гIяхIгъубзначил МяхIяммадра дергълизи арякьунсири ва, чедибдешра сархили, хъули чарухъунсири.

Дила макьалала игитунанира илдала дудешунанира чула гIямру, цархIилтас гIибратли диэсли, ВатIайчи дигиличил дуркIули сари.

ХIяжимурад Ражабов