«Кавказ 2021» бикӀуси Интернет-мажлисла дазурбазиб, Дагъистанна лугIурбала (цифровой) бетуцлизиб гьалабяхӀ башнила министр Тамерлан Бугановличил пикридарибти масъултала ургаб республикала шимала халкь къалабаси Интернетла сурсатуначил гIеббурцнила суалра ахъбуцибсири. Илала гъай хӀясибли, «Устранение цифрового неравенства» бикӀуси федеральный проект хьулчили буцили, Дагъистанна 543 шилизи Интернетла сеть тIашбалта.

Хайдакьла районна бекӀ ГӀялим Темирбулатовли цIакьбарили буриливан, Россияла лугIурбала бетуцлизиб гьалабяхӀ башнила Министерстволи ва Ростелекомли 2014 дусличибад бехӀбихьили, ил программа акӀахъуб. Хайдакьла районнира илизир жигарла бутӀакьяндеш дариб. 2018 ибил дуслизир дунъяла сетьлизи 11 ши цахӀнадяхъиб: Хунгия, Газия, Мижигъли, Жигия, Шилягьи, Кьулижа, Дуреги, Дакьниса, Маллакент, Туменлер, Сурхачи.
«Мажалисличибад бехӀбихьили, шимазиб 40 километрла бухъяндешличилси кабель тIинтIбариб. ГӀур Интернетличил адамти пайдалабикIахъес багьандан хIяжатти гIягIниахълуми кадизахъур. Гьанна гьарил дигусилис, 100 метрла мякьлав виалли, Интернетла Wi-fi сетьлизи матъал каберхес имканбикIули саби. Илдигъунти далдуцунани, гьайгьайрагу, район гьалабяхӀ башахъес икьалабирниличилара иргъулра», — викӀи ГӀ.Темирбулатов.