Дагъистаннизир жа­­гьилти-ургар ин­фарктла, тромбозла ва уркIила-хIила тумала из­лу­ми де­бали имцIадиубли сари. Рес­публикала тах ша­гьар­ла 1-ибил клиническая боль­ницала тухтуртани илди анцI­­букьуни коронавирусла чей­хъуси изайчил дарх­дал­са­хъу­­ли сари.

Арадеш къулайбируси уч­реждениела бекI тухтурла заместитель Лайла ХIяжиевала гъай хIясибли, COVID-19 иза­ла тIинтIбиънили арагIебли дунъя­личиб уркIила-хIила тумала излумани зягIиптала кьадар имцIабиахъуб. Дахъалгъунти анцIбукьуназиб ил бархбалсули саби адамтани, урухбиубли, тухтурли хъархIедарибти хIи шинкIадирахъути дармунти (антикоагулянты) дужниличил.
«Дебали зумали къаршидиркули сари тромбозунала, тромбоэмболияла, хIи тIаш­хIе­дилзнила анцIбукьуни, сена­хIен­ну хIеруди агарли антикоагулянтуни дужухIели. Илкьяйдали илдани хIила гъяжра ахъбирахъули саби, суненира инфаркт бетарахъуси ва бекIла мехIелизир хIи гъургъдикIнила тяхIяр-кьяйда дулъахъути», —буриб специалистли.
Л.ХIяжиевани илдигъунти излумачил МяхIячкъалала кли­ническая больницализи ка­биркьути-ургаб жагьилти зягIиптала кьадар имцIабиубли саби или багьахъур. Республикала 25 дус виубси адамла инфаркт бетаънила анцIбукьра къаршибикиб.
«Эгер гьалаб ил 60 дусличибра имцIали биубти адамтала къаршибиркуси биалри, гьанна миокардла инфарктла, хIила туми зараллизи дикнила, бекIла мехIелизи дашути хIила башри буънила анцIбукьуни хап­ли «жагьдиубли сари». Да­хъал инфарктуни детарули са­ри жагьилти-ургар – 25-27 дус хIебиубтачилра. Гьалаб илгъу­на лебси ахIенри», — рикIи тух­тур.
Гьалабван ФАН-лира багьахъурсири коронавирусла чей­хъуси изай акIахъубти, ур­кIила-хIила тумала кабиз­ли­зирти декIарти асурти да­гъис­танлантала, Россияла цар­хIилти халкьанала вакилта­ла­ван ахIи, хIяйнали зумали къар­шидиркули сари.
Илдигъунти пикрумачи ба­кIиб Дагъистанна пачалихъла медицинала университетла экологическая медицинала гIил­мула-ахтардила институтла гIялимти.