Ца дила тянишси рурси лерилра сунела гIям­ру­ли­зир талихIличи хIерлири… ГIядатла талихI­ли­чи, гьа­рилталагъуна – мурул, биштIати, хъали диэсли. Ил Аллагьличи (а.т.) рирхуси, лерил шаригIятла кьанунти дузахъуси рурси сари.

Амма талихI иличи бакIес къалабабикIули ахIен­ри. Илини се-дигара бирулри талихI сунечи бяхI­барес: гIяхIси багьуди касили, хIянчи баргили даража ахъбурцули рузулри, дусмира ардашулри. Илала умут лебри – гьанна ЧевяхIсини сунела хьулани дартарахъу ва талихIла бутIа пешкешбиру или.
ХIера, хабарагарли гьаннала вирусла чейхъуси изала дакIубиуб, ва илала пикруми-кьасани дукьдуун. Рурси гъузгъалдириуб, тирхьрухъун. УркIилизи уре­хи хьу­рабиуб, бахълис кьяйда илисра гьанбикиб, руб­кIус или. БебкIализирад илцадра-декIар урух­кIули ахIен­ригу, рахли талихI хIебаргили, я мурул, я биш­тIа­ти, я хъали агарли ребкIишагу или урухриуб.
ГIямру ца ити, хIязлис деркIибтин бизур. «Сен? Ну­никIун итцад халаси сабурбарира… Марлира, ну дила гIямрулизир мурадличи хIераили ишкьяйда руб­кIусирав гъари?» —гьар русес карилхьухIели децI­ри­кIулри ил, алавтачила хъумартурли. Гьар бархIила бебкIибтала ва зягIиптала лугIиличи хIер­ри­кIули, сунезирра зягIипдешла лишанти дургулри.
Савли урехи бара гIелабяхIбирулри, сагадан Интернетлизи ва телевизорлизи хIерризайчи. Сунела уркIиларти пикрумачила чизи-биалра бурес ил урузкIулри, сари илцадра урухкIутазирад риъниличила багьахъес хIейгули. Иличи че, дусми аркьули хьалли, сунела пикруми-кьасани гIямрулизир детхIедурхниличила пикририкIес къияннири.
Гьайгьайрагу, ил Кьудратла ВегIличи гьаман дугьарилзули арадеш ва дунъяличибси талихI тиладидирулри. Амма ишди бурхIназир сунесра хабарагарли, гьатIира имцIали балга-дугIяличил дугьарилзанриуб, уркIи-уркIиларад, урехикIун мурталра мякьлабад башулри ва ил гIеррурцуси хIяжатлири. Багьла-багьлали илала уркIи паргъатбиранбиуб. «Я Аллагь, ну зягIипмариркахъаба» или илис сари сунечилацун пикририкIнилис цIахбизур. «Се бетаурли наб? НуникIун хьунул адамла талихIра хIебаргира… Ну набчилацун ва иш дунъяличилацун пикририкIулрагу!»
Илди пикрумазир лерли, илини тавба дариб, сунечилацун пикририкIни, илцад бебкIализирад урухриъни багьандан. Гьар бархIи ЧевяхIсиличи уркIи-ур­кIи­ларад балгначил дугьарилзесрииб. Сари-алавтачи де­кIарси хIерли хIерризур, илдасра декIли биъни че­­баиб, рирутас кумекбариб ва ряхIятриуб. ВегIлис на­сибси сеналра вегIличибад чиналра архIякьни якьин­би­уб.
«ИлхIели, ну дебали талихIчерси риъни багьурра, челябкьлализиб вегIличи се хIерсил, багьесра хIейрар», — рикIар ил.
Иличила багьурхIели, наб Юсуп Идбагличи Зу­лай­хала диги гьандикиб. Зулайхара мурталра Юсуп багьандан сунени сари гIязабруркIусири, Че­вяхI­си­ни иличи Юсуп чарварайчи, селра цархIил секIал чехIебиули. ЧевяхIсини илала уркIилизи диги кIер­тIиб­­хIели, гьар секIал мерладиуб, Юсупличира ил цар­хIил тяхIярли хIерризур.
Адамли сунечилацун пикрумазир дуркIути гIям­­­ру алавтачила хъумартурли, дацIти, дугIлати сари. Или­чила заманаличив багьурси сай гьарли-марли та­лихI­­чевси. ГIямрула дусмала мягIна, илди Кьудратла ВегI­­ли сецад декIардарили диаллира, адамтачи ва Че­­вяхIсиличи дигили дицIибти диахъес чебиркур. Иш дунъяла лигIматуначицун ахIи, итил дунъяли­чилара пик­румачил ва баркьудлумачил хIериэс чебиркур. Ил­хIели гьарил адам гьарли-марли талихIчевсили ви­рар.