Даргала газетаби-журналтала вахъхIила ва марси гьалмагъ ШапигI МяхIяммадов акIубсири 1941 ибил дусла июльла 12-личив Дахадаевла районна ДейбукIла шилизив.
ДейбукIла верхIел дусла школа таманаили гIергъи, или-ни Хъярбукла урга даражала школализиб белчIуди даимбариб. 1961 ибил дуслизив Дагъиста шила хозяйствола институтлизи керхур. ВатIа гьалабси чебла ахъили гIергъи, Орджоникидзелизиб белчIуди даимбариб. Узули калун Дагъиста НИИСХ-лизив. 1971 ибил дуслизив аспирантурализи керхур ва хIябал дусла гIергъи кандидатла диссертация защититьбариб. Чебиуливан, сунела хIянчи литератураличил бархбасунси хIебиалра, ил бугаси девла устадеш уркIилизи минадиубти адамтачи, дунъяличи ва гьарил жагаси ибсиличи алкунти дигили бурсиварибси сай. УркIилизир сабур-яхIла дебш ва челябкьлаличи умут лерси, дунъяличир кадиркути вайтира гIяхIтира анцIбукьуни сунелаван чедиуси, шилтахъ-кIибяхIяндеш агарси, вайси девалра бурес кьас агарси, хIяжатбикибсилис уркIи дурабитIи пешкешбарес хIядурси… адам лехIкахъили уэс вируси ахIен. Илгъуналис ЧевяхIсили шягIирла пагь бедалли машгьурируси сай. Тяп илгъуна пикри бурес лайикьли саби ШапигI МяхIяммадовличила. Сунела назмуртазиб учIаннис илини тамашала дунъя гьаргбирусири. Иш бархибси манзиллизив викеси мер хIебалуси адамла пикруми-кьасани гьунчидушес кумекдирар илдигъунти мурхьси мягIнала назмурти.
ШапигI МяхIяммадовичла сунела марти гьалмагъуни поэтуни-писательтачила уркIи-уркIиларад делкIунти шадлихъуначир мубаракла ва юлдашуни гьуниббатурхIели децIла назмуртани чила-дигара уркIиличи тамашала асар биру. Гьарли-марси хъубзарли мурхьси гъарш кайуливан, халкьли марварибси поэтла назмуртира мурхьси мягIнала дирар. Гьачам делчIалли бекIлил хъумхIертести, пасихIдешла ламили алкунти, вайсилизибадли гIяхIси декIарбарес бурсивирути,…
БегI гьалаб ШапигI МяхIяммадовла назмурти районна «Шила гIямру» газетализир 1958 ибил дуслизир дурадухъунтири. ГIур республикала газетализир ва журналтазир дурадулхъескадииб. ШапигI МяхIяммадовла хIябал цархIилтачил дархти «ХIебла гунзри» (1979 ибил дус), «Дила далай» (1987 ибил дус), «Сагати урунжуни» (1989 ибил дус) жузази назмурти кадерхахъур. Дура-духъун сунела «Тямада» (1996 ибил дус), «УркIи» (1999 ибил дус), «Луги» (2002-ибил дус), «Мекъ» (2007-ибил дус), «Урунж» (2008-ибил дус), «Лусен» (2009-ибил дус), «Аманат» (2010-ибил дус), «Анкъи» (2011 ибил дус), «Чархара» (2011 ибил дус), «СяхIбатунала далуйти» (2013 ибил дус), «Далуйти ва хIябкубти» (2006-ибил дус), «Дигайла хала» (2006-ибил дус), «Ванза» (2016 ибил дус), «ДигIянаси цIакь» (2016 ибил дус) бикIути жузира. Чедир гьандушибти жузазир урус мезличил дурадухъунтира лер. Дураэс хIядурбарибсири илини «Умут» бикIуси жузра. Амма…
ШапигI МяхIяммадов гIямрулизивадли арякьунсири 2020 ибил дусла майла 12-личив. Бахъ давла-чебси ва пагьмула бугаси ламилизиб пархбикIуси творчествола хIялалси гьуни къяббердиб даргала чевяхIси поэтла гьуни. Ил дебали халаси бетахъри саби Дагъиста лукIантала авидлизиб. Амма илала адамтачи дигили ламбикIуси ва даимлис парчбикIуси умути шигIрула урунжлизирадли халкьли дигиличил хIялалдешла шараб-назмурти даимлис «дужули» кавлан. Нушани умутличил буресра дирехIе илдигъунти шягIиртачила дубурлантани хъумуртуси ахIен или.
ПатIимат Кьурбанова
