Ахъу­ша­ла ши­ли­зибси Загьи­дат МяхIяммадовала ули­чил­­­си музейлизиб Бур­хIи­­­­мя­­кьмахьила шила ад­ми­нист­рациялизи ка­бур­хуси Гурднима­хьи­ли­зи­вадси, гIер­гъити дус­ма­зив Калмыкиялизив хIе­ри­руси спортсмен Шамил Магь­диев­­личил гьунибаъни бетерхур. Шамил Магьдиев гираби ахъдурцуси, спортла шайчирти дахъал абзаназир бутIакьяндеш дирули, гьаларти мераначи лайикьиркули сай.
Гьу­ни­баънилизир бутIакьяндеш да­риб Ахъушала районна жа­ми­гIятла па­латала председательла за­мес­титель М.Мя­­хIям­­ма­довли, «Бархьдешла гьуни» га­зетала бекI редактор П.Маллаевани, туриз­мала управлениела начальник Х.ХIя­сановли, жагьилтала политикала ва спортла управлениела начальник М.МяхIяммадхIяжиевли, сунела хIян­чи­зартачил, «Цаибтала хIяракат»-ла руководитель Р.ГIялиевли, Ахъушала шилизибси дурхIнала ва гIулухъабала спортла школализиб руркъути дурхIнани ва цар­хIилтанира.
Спортсмен Шамил Магь­диев­ли­чи­ла музейла ди­рек­тор Зубалжат Мир­­­зае­вази гьанбушили уили сай Ахъу­­­шала районна жамигIятла па­латала председательла заместитель МяхIям­мад­загьир МяхIяммадовли. «Или­чил гьунибаъни дураберкIес гIяхI­си­ри, нушала районнизивадси илгъуна цIа­кь­си спортсменничила жа­гьилтазира, ба­гьа­хъес или. Ил Кал­мыкиялизив дебали машгьурвиубси сай, гиряби ахъдурцнила ва бабза гьая (канат) зузбирнила шай­чирти абзаначир гьаларти мераначи лайикьиркули. Ил­гъу­на гIяхIси баркьуди гIе­ба­са­хъес гIягI­ни­ли саби районна бухI­набси чеабиуси нас­лулизира».
Гьунибаъни ибхьули гъайрухъун музейла директор Зубалжат Мир­заева.
– МяхIяммадзагьир МяхIям­ма­довли бурайчи нуни нушала районнизивадси ишгъуна цIакьси спортсмен левни гьанна бикайчи хIебагьурра. Нушани музейлизир Ахъу­шала районнизибадти маш­гьурти адамтачил мурталра гьунибаъниби дурадуркIути сари. Музейлизир лер спортсментала суратуни ва илдачила белкIани. СенахIенну илди цIакьти, дахъал чедибдешуни сархибти адамти нушала пахру саби. Нушани музейлизи живарили гьунибаъни дураберкIибсири Урхьу­чима­хьилизивадси чуй­нара дунъяла чемпион ветаурси боксер МяхIям­мад­расул Мажидов­личил. Иш­бархIи тянишриубра Шамил Магь­диевличил, илра Мя­хIям­­мадрасул Мажи­дов­гъуна паргъатси, малхIямси, гIяхIти хIял-тIабигIятла адам сай. Гьанна наб лебилра спортс­менти илдигъунти гIяхI­ти, халахIебурхути, хамдеш агарти сабира или гьанбиркули саби, — буриб му­зейла директорли. Зу­балжат ХIу­­сей­новнани Шамил Магь­­диев­ла сархибти дахъал че­диб­­­дешуначила, илала гьунар­тачилара гьан­бушиб. Ил гираби ахъдурцнила шайчибси абз­лизив Калмыкияла урчIем­на чемпион ве­таурли сай, Дагъистара чемпион сай. Аст­ра­ханьнизиб дурабер­кIибси лебил Россияла кьадрила «Вызов Легиона» бикIуси абз­личив цаибил мер сархибси саби.
Балбуцличиб гъайбухъун Мя­хIям­­мадзагьир МяхIям­мадов, Па­тIи­мат Маллаева, ХIя­сан ХIясанов, Мя­хIяммад Мя­хIяммадхIяжиев. Илданира дахъал гIяхIти гъай дуриб Шамил Магьдиевлис, сунела районничи уркIи изули, минала мер-мусаличиб хIербирути жагьилтази гIяхIси секIал гIебасахъес, спортличи диги адикьес къайгъибарнилис. Спортличи диги биалли жагьилтала челябкьлализирра арати гIямру дирар, вайти хасиятуназибад мяхI­камдеш бетарар или аргъахъиб.
Балбуцличиб гъайбулхъутани Зу­балжат Мирзаевасра баркалла ба­гьахъур, музейлизир илдигъунти гIяхI­ти далдуцуни дурадуркIнилис, сунела районничи уркIи изули, район гьалабяхI арбукес къайгъибирнилис.
Шамил Магьдиевли буриб: «Ну­ни бу­тIакьяндеш дирути абза­ни чи­нар де­турхули диалра, ну Ахъу­ша­ла район­ни­зивадси сайра или бу­рули вирус. Ну Кал­мыкиялизив хIе­рирули хьалли, дила хала бегIти Бур­хIи­мя­кьмахьилизибадти саби. Нуни ил гира ахъбурцнила шайчибси спорт­ла абз Калмыкиялизибра тIинтI­­биахъес къайгъибирис. Гьанна биал­­ли дила минала Ахъушала район­­­низибра жагьилти-ургаб спорт­ла ил жураличи диги акIахъес, ил тIинтI­­биахъес пикриикIулра ва ил­гъу­на кьас бетерхахъес икьа­ла­виэс дигулра».
Шамил Магьдиевли ца­ла­би­киб­тас «устадешла дарсра» че­ба­ахъиб.
МяхIяммад МяхIяммад­хIя­жиев­ли Шамил Магьдиев жагьил­тала политикала ва спортла управ­ле­ниела шайзибад Грамо­тали­чилра ша­багъатлавариб, дурхIнала ургаб спорт­личи диги акIахъес ва спортла ил жура тIинтI­би­ахъес къайгъи­бир­­нилис.
Гьунибаъни ахирличи бир­­­ку­хIели Зу­бал­жат ХIу­сей­­нов­нани леб­тасалра бар­кал­ла багьахъур. Шамил Магь­диев­ли­зира бу­риб: «Нуша мур­талра разитира музей­ли­зи ба­шути гIяхIлачи. ХIура гIурра ва­шен нушачи гIяхIладли. ХIела лерилра шабагъатунира даршили, касахъили су­рат бархьа нушачи. Нушани хIечила белкI­ра барили, нушала районнизибадти маш­гьурти спортсментачила делкIунтала мякьла кабирхьехIе. Сена­хIен­ну чеабиуси наслу­лизи Ахъушала район машгьурбарибти, хIушагъунти цIакьти адамти нушала пахру сабни багьахъес хIяжатли саби!»
Шамил Магьдиевличил тяниш­деш дарес гъамбиубли гъай­бикIулри бал­буцличи бакIибти уршби-рурсби. Ил­­да­зибра лебри спортличи ди­ги­чебти дурхIни, ца рурси лер­ри каратэличи бурсирируси. Ша­мил Магь­диевли гираби ахъ­дурц­нила ша­йчирти абза­начила дуру­ти гъай­личи дурхIни халаси иштяхI­ли­чил ле­хIяхъиб.
Гьунибаъни къугъати ихти­ла­ту­на­чил бе­терхур. Балбуц таманбиуб леб­танилра Ша­мил Магьдиевличил дарх суратуни ка­са­хъили. ГIур биалли Зубалжат Мир­зае­вани ле­билра сахаватли баршибси стол-алав жибариб.

Сабият ГIябдуллаева