Дубуртар Улкала шилизивад дураухъунси ГIиса ГIябдулхIялимовли арагIебли Россиялизиб сунела биштIаси ВатIан машгьурбариб. Ил акIубсири 1994 ибил дуслизив ЦIунтIала районна Хашархота бикIуси шилизив. СВО бехIбихьибхIейчибад ил гъаибил дагъистанлан сай ахъси шабагъатличи – Россияла Игитла уличи лайикьикибси. Сепайда, алхи гIергъи.
Гвардияла 177 ибил декIарси полкла урхьула пехотала батальонна гьавала-гьужум дурабуркIутала кьукьяла командир ГIиса ГIябдулхIялимовли СВО бехIбихьибти цаибти бурхIназирал бутIакьяндеш дирутири. Илини Мариупольлизир, Бердянсклизир, Мелитопольлизир ва Работинолизир дявила хъарбаркьуни тамандирулри. ДакIударибти гъабзадеш ва игитдеш, чедаахъибти дявила устадеш багьандан ил ордентачи ва медальтачи, илкьяйдали лейтенантла уличира лайикьикибсири. Работино азадбатахъни багьандан ил Гъабзадешла орденничи гьалаихьибсири.
Херсонна областьлизив, Крынки посёлок азадбалтахъуси замана, офицер кьяшлизивад декIли вяхъибсири. 4 баз госпитальтазив калунсири, гIур – реабилитация.
Къиянси ва бухъянси лечение дураберкIили гIергъи, гвардияла лейтенантли Курскла областьлизиб дявила къуллукъ даимбарибсири. 2025 ибил дусла майла 9-личив «Курскла область балтахъан» ибси медальличил шабагъатлаварибсири. Флотилияла командиртани ГIиса ГIябдулхIялимовлис Россияла Игитла у бедахъес кагъурти хIядурдарибтири.
Арбякьунси дусла июнь базличиб кабикибси дявилизир сарри ГIиса ГIябдулхIялимовли бегIлара гIергъити бутIакьяндеш дарибти. Алексеевка бикIуси шилизир гьужум дурабуркIутала кьукьнас илини бекIдеш дирулри. Душмай хIярхIуби чекьурхIелира, буцибси позиция офицерли бархьхIебатур. Душма хIярхIя ламартла уббухъи, уркIилизи атIи, ГIисала гIямрула ги къяббердиб. Дявила чебла ихъули, ГIиса ГIябдулхIялимов гIяхIгъабзала бебкIали алхун. Ил бегIлара гIергъиси гьигьличи бикайчи сунела улкалис, дявила юлдашунас ва хъялис марли калун.
Дубурлан уршила гьунар — республикала жагьси наслулисра арагIебли улкала халкьлисра ВатIайчи халати дигила, гъабзадешла ва цIакьла гIибратли бетаур. ГIиса МяхIяммадович ГIябдулхIялимовла у Дагъистан Республикала ва Россияла Федерацияла тарихлизи даимлис минабиуб.
ПатIимат Мирзаева
