Иш белкIлизиб наб ахъбуцес дигулра гьарил адамла гIямрулизиб мягIничебсили бетаурси суал. Сен-сен бедлугес хIяжатсив биштIати дурхIнас бяркъ, сецадла кьадар чекалзуси илди масъултачи?
Балуливан, адамлис виштIахIели бедибси бяркъ гIямру деркIайчи барсбарес вируси ахIен. ГIе, вирар се-биалра вайси батахъес, гIяхIсиличи бурсиварес, амма бяркъ цахIнабли барсбарес хIейрар. Сен, или хьарбаадалли, бурис. Сагали кабатурси галгала кьяли бакIибси тяхIярли хIебатурли, цархIил шайчи ласбарес вирару? Юх, хIейрар. Ил бялчан. Амма заманаличиб хIеруди барили, ца мерличибад чеббяхъили, цархIил мерличи чебатадли, ункъли лябкьян. ЦархIил мисал: убатурси вава шинни балхули сунела даражаличи абаахъалли, кIинайс сецад шин картIили хьалли, илала ахъдеш барсбирару? ХIебирар, дахъдиубти шинни илала мякьи заядарес асубирар. Илкьяйдали биштIатира. Илдази се картIули халабаахъадалра илди картIибтачил гIямру дикайчил бузар.
Бяркъ бедес хIебалути бегIтира бахъал къаршибиркули бирар. Сен? СенахIенну чула замана бегIтас илдала бегIтанира бедес хIебагьурхIели. Ил биштIатала гIяйиб ахIен. Леб бегIти дурхIначи дебали чекабизурти, секIал асухIебирахъути, белчIудила дурабад секIал чехIебиахъути, лебил дунъяла гIялам вайтази халбирути, балкIси секIал баралли, дунъя буэс хIядурти. Илгъуна бяркъра бяркъ ахIен. Урши-рурси цархIилти дурхIначил бархбиркес бурсибирес гIягIнити саби, илкьяйдали цархIилличи уркIецIибирес, агарсилис секIал бедлугес, букуси секIал бархли буртIес, вайсира гIяхIсира декIарбирес. КъантIли буралли, гьалмагъдеш дузахъес. ДурхIнази халатала, бегIтала хIурматбирахъесра багьахъес чебиркур. БегIтани дурхIни чучил гъайбикIахъес, чула уркIилизибси секIал бурахъес бурсибирес гIягIнити саби. СенахIенну дебали бегIтазибад урухкIути дурхIнала разидеш камли бирар, вайси се-биалра биубхIели илдачи дугьабизес къиянни бирар, ил багьандан цархIилти халкьла кумеклигIиб къяйцIбикIули бирар илди.
ДурхIнас бегIлара гъамти сабигу чула бегIти,
БегIтани саби илди арцанван урцахъути,
БегIтани саби илди урунжван билъахъути,
Биаб гьарилла бегIти, уркIи чучи бирхести,
Къияндикиб мерличиб някъ гьабатес хIядурти!
Анжела Мутазова
