Гьанна РФ-лизиб жагьилти дурхIни гIярмиялизи арбикнила хIекьлизибси бузери бехIбихьили саби. Ишдуслизир ил шайчир, Россияла Президентли къулбасбарибси ХIукму хIясибли, дарсдешуни кадикахъили сари. Гьанна арагIебли дусла духIнар гIярмиялизи жибирутала хIекьлизир хIянчи дурадуркIути сари.
РФ-ла Конституцияла 59 ибил статья хIясибли, ВатIан балтахъни гьарил гражданинна чебла саби. Пик­ри­духъеная, сен жагаси статья сабил ил? ВатIан батахъес чебла саби. Нушала адамтани биалли, ил чебла ункъли таманбирули саби, чула хъялис марли кавлули. Илис бикьридеш дирули сари дявила хасси балбуцлизир бутIакьяндеш дирути нушала республикала адамтани.
ГIярмиялизи дурхIни аркути чIянкIли Россияла Федерацияла дявила комиссариатунани саби. Ил шайчир дузути вегIдешла организацияби лерти ахIен.
Жагьилти гIярмиялизи арбикес бехIбирхьур апрельла цаличибад июльла 15-личи бикайчи. Илди дурхIни дявила хасси балбуц дурабуркIуси мерличи аркути ахIен. Ил шайчиб урехи хIебирар. Илгъуна пик­ри буриб Пачалихъла Думала балтахънила хIекьлизиб бузуси Комитетла председатель Андрей Картаполовли.
Нушала республикализиб жагьилти дурхIни гIярмиялизи къуллукъбарахъес жи­бирнила хIянчи секьяйда бетурхулил бу­рахъес нуша дугьадизурра Дагъистан Рес­пуб­ликала дявила Комиссариатла вакил, полковник Явнус Рабазанович Жамбалаевличи.
— Явнус Рабазанович, гьанна нушала улкализир жагьилти дурхIни гIярмиялизи жибирнила хIя­ра­кат­лизир дарсдешуни кадикахъили сари. Секьяйда детурхулив ил агилизир комиссиябала хIянчи?
— Марлира, ил шайчир дарсдешуни кадикахъили сари. Гьалар гIярмиялизи дурхIни жибирнила хIекь­лизир дусли кIина хIянчи дурадуркIутири — ат­хIеб­лизир ва гIебшнила ахирлизир. Россияла Пре­­зи­дентли дусли кIина ХIукмура дурайусири ил­ди хIянчи дехIдихьахъес. Гьанна биалли, дус бехI­бихьиб­хIе­ли гIяр­миялизи жагьилти жибир­нила хIянчи дехI­дир­хьу­ти сари. Къуллукъбирути ме­раначи бурхьнила хIян­чи, гьалар кьяйдали, ат­хIеб­лизир ва гIебшни ду­ра­­деркIили дирар. Ам­ма илди хIядурбирнила хIянчи дусла духIнар дура­дур­кIу. Гьалар хъярхъли дирути хIян­чи: медицинала шайчибси ахтарди, далилти хIя­дур­дирни, комиссияби дурадуркIни дусла духIнар, къа­лабадеш агарли дурадеркIес имканбикIур. ­Бахъал жагьилти гIярмиялизи бурхьути мер-мусаличирти воен­­коматуначибси гуж камбирули саби. Илдигъунти мер-мусализи кабурхуси саби нушала Дагъистан Рес­пуб­­ликара.
— Секьяйда дурадуркIути хIянчи дурхIя гIярмия­лизи вархьес багьандан?
— Илди хIянчи кIел бутIа­личи (этап) дутIили сари. Цаибил — комиссияли жиирусила далилти хIердирути са­ри. Медицинала шайчибси комиссия дурабуркIуси саби. Илини гIярмиялизи жиируси къуллукъбарес вируси сай или кабизахъес бирар, яра ил арадеш хIясибли живарес хIейрар или балахъуси саби. Бирар заманалис ватес (отсрочка) яра чеимцIаси медициналашалси ахтарди барахъес вархьес. Илди хIянчи дусла духIнар дирути сари.
КIиибилгъуна, гIярмиялизи жибарибти къуллукъбирути мераначи бурхьути саби. Илди хIянчи гьаннара кIел манзил дурадеркIили дирар: апрельла цаличирад июльла 15-личи ва октябрьла цаличирад декабрьла 31-личи бикайчи. Ил багьандан жагьил адам гIярмиялизи вархьес багьандан комиссияли хIукму дурасайчи чумал баз дикес асубирар. Мисаллис, комиссияли дурхIя гIярмиялизи вархьес вирар ибси хIукмубарес бирар январь базличиб, сай виалли гIярмиялизи урхьу май базличив. Иличибли баарила кьадарла гIярмицунала кьукья цахIнабяхъес ва илди хIяжатти хIянчи дурадеркIахъес бархьес имканбикIули саби.
— Жагьилти гIярмиялизи жибирнила хIяракат дурабуркIуси комиссияла хIукму бетерхахъес секьяйда хIеруди бируси?
— ГIярмиялизи жибарес хIяжаттала лугIурбала (цифровой) цаси база акIахъубли саби. Илаб кабирхъуси саби комиссияла хIукму, бедибси повесткала баян, жиирусила статус.
Илкьяйдали лебси саби повесткабала реестр. Ила ил кабяхъибхIели, бедибсилизи халбируси саби. Рахли жиируси ил повестка хIясибли хIекIалли, илис алкIахъути сари декIар-декIарти къадагълуми. Ил нушала улкализивад дурахIелхъахъа. Сунечи сегъуналра машина хIелукIахъа, илкьяйдали хIейрар хъулрала хIекьлизир сегъунти-биалра вягIдурти даресра. Илгъуналис банклизирад арц гIегудилис касахъес ихтияр хIебиру. Илди къадагълуми уркасес бирар илди чедихьибси дявила комиссариатли сай комиссияла заседаниеличи вакIибхIели. Районна комиссиябани барибси хIукму ахтардибарес бирар республикала комиссириатли.
Жагьил адамлизи сай гIярмиялизи укес багьандан, дявила комиссириатли сунези жиирниличила повестка бедес бирар, къулбасра кабатахъурли сабира, илкьяйдали почтализибад бархьесра бирар. Гьанна ил бедлугули саби узуси, яра учIуси мерличибра. ГIергъити дусмала сагадеш — Госуслуги-базибад бурхьни. Ил ила кабяхъили гIергъи 30-ли бархIила ухIнав военкоматлизи вакIес хIяжатси саби. Гьанна илди хIянчи арагIебли дусла духIнар дурадуркIути сари ва повестка мурт-дигара бакIес бирар.
— Ишдуслизиб нушала республикализибад гIяр_мия­лизи чум адам бурхьути?
— Дагъистан Республикализибад 2026 ибил дуслизиб хIябал азир адам гIярмиялизи къуллукъбарахъес бурхьути саби. Нушала республикала дурхIни бирар чидил-дигара Россияла мер-мусализи бархьес. ГIяскурти декIар-декIарти сари. Чидил мерличи урхьусил дявила комиссириатли белгибируси саби, жиирусиличи хIербизурли ва илала медицинала, психологияла шайчирти далилтира хIердарили. Нушала имкан леб дурхIни дявила белчIудила заведениебази бучIахъес бархьес. Ил барес дигути гIярзаличил военкоматлизи дугьадизес дирудая. ГIяскуртазибад нушала дурхIнас баркалла балахъути кагъурти дурхьули дирар. Нушани дурхIнала бегIтачил, нешанала комитетуначил бархбас бузахъулра. Сегъунти-биалра челукьути суалти лерли диалли, нушачи дугьадизес дирудая.
Нушачил ихтилатбарнилис Явнус Рабазановичлис баркалла багьахъес дигулра. Дирхулра, нушала дурхIнани чула республикаличила, шимачила, шантачила ва бегIтачила хъумхIертни ва гIяхIсиличилацун хабар тIинтIбирни. Илдани чула у чихъли бихIниличи ва ВатIа гьалабси чебла ахъили, гьарли-марти мурул адамти бетаурли, хъули чарбулхъниличи дирхехIе.

Руслан Ражабов