Гьалабван Дахадаевла районна КIишала ХI.Су­лайбановла уличилси урга даражала школализиб дявила летчик, РФ-ла ВКС-ла (Воздушно-космические Силы) «Белый лебедь» бикIуси бегIла халаси дявила самолетла лет­чик-штурман Билалов Билал Гебековичличил гьунибаъни бетерхур.

Чедирти классунала дурхIначил ва учительтачил гьуниваэс, сунени ВатIайс бируси къуллукъличила ихтилатбарес ил гьарахъси Саратовла областьла Энгельс шагьарлизивад вакIилри.
ЧеалкIуси наслулис гIибратли биэси ва хъумхIертеси гьанибаъни сабри ил. ДурхIнани багьур, Билалли 2007-ибил дуслизиб КIишала гимназия ахъти кьиматуначил таманаили, кIинайс Челябинск шагьарла дявила училищелизи керхниличила, ахъти сархибдешуначил илра хъараахъурли, Россияла ГIярмияла ВВС-лизиб къуллукъбарниличила.

Сунела гъайлизиб Б.Билаловли аргъахъиб нушала улкала ишхIелла гIярмияла цIакьличила, тяп сунени къуллукъбируси ВКС-ла кьадриличила. Гьунибаъниличи цалабикибти школала бучIантасра, илкьяйда учительтасра чула шан багьадур летчикла хабурти анцIхIедукьун. Иличи дигиличил лехIбизур. Илала буруси таманбиубхIели, лугIилашал дахъал суалти гьаладихьиб.
Бархьил, Билал ца­­ца­дехIти суалтас жа­­вабти дурес къа­ла­ба­хIейкиб: улкала дявила хIяракатла ди­гIян­де­шуни лер­ти диъниличила ва бахълизи хIе­далахъути диъниличила ар­гъа­хъиб.
— Ил санигIят касес багьандан, уршбас сегъунти багьудлуми имцIаливан хIяжат­дир­кули?
— Школализир дедлугути ле­рилра багьудлуми гIягIнити сари. Биалра, хIу­шаб, дурхIни, физкультурала ва спортла шайчибси хIядурдешра чара­агарси саби…
— «Белый лебедь» самолетличиб летчик-штурманна гьалаб-гьалабси чебла се саби?
— Самолет гьаваличи ахъбуцни, че­баахъибси закла гьун­­чибад чеб­хIе­бал­кIахъни, ко­мандиртани чебаахъибси ма­съала хъараахъни, гIур биалли ха­тIа­хIейкили самолет ван­заличи кабиахъни.
— Гьанна бетурхуси Украинализибси дергълизир хIушани бутIакьяндеш дирутив?
— Се буриша хIушази? Ярагъра техникара дергълизир пайдаладарахъес дуракайути сари… Чедибад, улкала БекI­ли­чибад, хъарбаркь агарли, нуша дергълизи дурадулхъути ахIенра,илгъуна ихтияр агара. Итира ракетабани бегIбиубси «Белый лебедьлис» дергъ бемжурси ванза-декIар хIяжатси ахIен: илини гьарахълибадра мурад бируси саби…
— Адамла тIабигIятла се­гъу­на къиликъ имцIаливан гIягI­ниси дявила летчиклис?
— Урехиагни! Ил бекI­ли­биубси саби. УрухкIуси ургъан-летчик ванзаличив кьяйда закив вяшикIес хIейрар. ИлхIели гьамадли хIебирар илис сунела чебла ламусличил ахъес. Ил багьандан ургъан даим чIумали виэс гIягIнибиркур.
— ХIела къуллукъличи хIуни пахрубирулрив, Билал?
— Гьайгьай. ЦархIилван биэс хIебирар! Са­нигIят дигули гIергъи, ил пахруличил хIер­ба­ресра, гьалабяхI би­кесра, чеахъ­­би­кIахъесра гIягIниси саби…
— ХIед гIямрулизиб та­лихI­ли бетаурси ва хъум­хIертеси анцIбукь се сабри?
— БегI гьалав хьанцIа капарайличи самолетличив ваъни. ИлхIели, бархьли бурасли, камсиван кахдешра лебри, аммаки гъира ва разидеш имцIалири, наб нуни сагаси дунъя гьарг­барибхIеливан сабри.
— Бурги кьалли гIямрулизиб децI­ли лагьбухъунси анцIбукь­ра?
— Лебри: дудеш Гебек вахъ жявли гIямрулизивад арукьни. ИтхIели ну виштIаси урши сайри, гьанбиркур илини авлахъличи арикули ва, андаличи хъатра чебуцили, рахли закиб самолет дакIубиалри, вахъхIи хIерикIули, гIур, набчи шурвяхъили, бурули вири: «Урши, чебиулрив самолет? Сегъунти багьадурти сабил летчикуни, гьаваличиб гьуни кавдути, урехиагарли дунъяла дубличи-дигара биути…»
Биуб уршби, чулира жагIял-царахIел школа бархьбалтути: илдас дигулиахъиб дявила летчик Билалличи баэс ва, нагагьладан илала имкан биалли, сай учIули калунси дявила училищелизи чусра бучIес каберхахъес икьалабарили…
Билалличил рарх гьунираэс школализи илала неш Муъминатра ракIиб. Ил бахъал дурхIнала неш сари, гIяхIцад дусмазир шила Культурала Юртла хIянчизар сари. Илини сунела гъайлизиб уршиличи пахрубирули риъни аргъиб лехIирхъутани, ил секIал нешла гьарил девлизиб ва гьигьлизиб лебри. ГIур сен биэс бирара? Чидил нешлис сунела уршила гIяхIгъабзала хабар хIейгахъу?
Пайдаласи ва мекелли халаси мягIнала ил балбуцличир бутIакьяндеш дариб шила администрацияла бекIла замес­ти­тель Сулайбан Мусаевли, шко­­лала организатор ХIяжи Мя­­хIяммадовли, учительтани ва дурхIнала гIяхIцад бегIтани. Ахир­личиб цалабикибти вягI­да­лабиуб: ЧебяхIси Чедибдешла бай­рамличи Билал Гебекович жи­варес ва илхIели шила жа­ми­гIятличил гьунибаъни ду­ра­бер­кIес.

Ибрагьим Ибрагьимов,
Суратуни авторли касибти сари.