ГIисаева НасихIят ГIямархIяжиевнани 1979 ибил дуслизиб Семгамахьилизибси урга даражала школализир 8 класс тамандарили, Ахъушала урга даражала цаибил школализи шуррухъи, 10-ибил класс таманбариб.

ГIур декIар-декIарти хIянчурбачир рузули, сунела бузерила гьуни бехIбихьиб. Ил рузули калун колхозла клубла заведующаяли, райполизир – хIябал дус, 2002-ибил дусличирад ил прокуратурализир хъулри умудирули рузули сари, илкьяйдали, 2004-ибил дусличирад районна администрациялизирра технический хIянчизарли рузули сари.

НасихIят чинар рузули риалра жавабкардешличил,  сунечи хъарси хIянчи чебетаахъили бирули рузули сари, сунела руководительти баркалла бикIахъули.

Сари рузути мер-мусаличир илини халаси хIурмат сархиб. Ил лебтачилра ралгунси, гIяхIти хIял-тIабигIятла, малхIямси хьунул адам сари.

ГIяхIцад дусмазир рузули, халаси бузерила пай кабихьнилис ил Ахъушала районна администрацияла шайзирад ХIурматла Грамоталичил шабагъатларариб. НасихIятли районна прокуратурала шайзирадра чумал грамота касиб.

НасихIятли сунела гIямрула вархкья Камилличил барх хIябал урши-рурси абикьур, илдас гIяхIси бяркъ бедиб, багьуди касахъили гIямрула дякьличи дураиб.

Камилра дебали гIяхIси, адаб-хIяячевси адам вири, сунела бунагь-хатIа уркадуц.

НасихIятлис, сунела дигутани разирирули, хIерриэс кьадарбиаб!

Сабият ГIябдуллаева