Хайдакьла районна администрацияли хайдакьлан МутIалим МяхIяммадовли къуллукъбируси дявила частьлизибад кагъар касиб. Илизиб частьла командирли ургъанна гъабзадешличила балахъулри.
«2023 ибил дусла майла 20-личиб Авдеевкализиб бетерхурси дявилизив, хIярхIубала заблиу викниличи хIерхIеили, МутIалим МяхIяммадовли сунела бекIдешлиубси личный составла, илкьяйдали сунелара гIямру дерцахъиб. 2024 ибил дусла майла цаличибад урегличи бикайчи Донецкла республикала Северное бикIуси шилизиб сунела подразделениела колонналис урехи хIебирахъуси гьуни баргили, сабира чучи игьдибар бихьибси масра дерцахъес имканбакIиб. Илала устадешла гIяхIдешличибли тылли гIеббурцуси подразделениели чула гьалар тIашдатурти масъулти заманаличир гьунчидиркахъули сари.
ДакIударибти гъабзадеш ва игитдеш багьандан хайдакьлан ургъан Суворовла ва Жуковла медальтачи лайикьикили сай. СВО-лизиб чедибдеш сархнилизи М.МяхIяммадовли кабирхьуси белгиси пай россиялантас ахъли кьиматлабирес чебиркур», — балахъули саби кагъарлизиб.
МяхIяммадов МутIалим Амирарсланович акIубси сай 2000-ибил дусла январьла 14-личив Хайдакьла районна Мажалисла шилизив. Мажалисла школализир бехIбихьудла классуни делчIи, Родниковый посёлокла школализиб белчIуди даимбарибсири. МугIяллимтани бурни хIясибли, МутIалим ункъли учIуси, школала гIямрулизир жигарла бутIакьяндеш дируси, олимпиадабачир гьаларти мерани сархуси, серхурси урши вири. Школа таманбарили гIергъи, Сургутлизибси медицинала колледжлизи керхурсири. Дус учIули, МутIалимли цархIил санигIят касес пикрибариб ва Тюменьна индустриальный университетлизи керхур. Вузлизив учIесра цазаманализив узесра бажардииркулри ил. 2020-ибил дуслизиб университет хъараахъур ва геолог-технологла санигIятличил вегIиуб. Илала гIергъи, ВатIа гьалабси чебла ахъахъес гIярмияла къяянази живариб. Илаб МутIалимли кIел дуслис вягIда бигьун.
СВО бехIбихьибти цаибти бурхIназивал М.МяхIяммадов гьаркьятала къяянази кайзур ва ВатIа хъархIерагардеш батахъес лерилра цIакьани дяхIчиаиб. ИшбархIира Дагъиста ванза сунела уршбачи пахрули биркьес бирни хайдакьлан уршили гьачам-гьатIи марбариб. СенахIенну гьарилли сунела жан хъябла дигьи, ахIерси неш-ВатIан, халкь ва азаддеш гьанни игитлати баркьудлуми дурадуркIули сари.
Хайдакьла районна администрацияла пресс-служба
