Гьанна школабазир дурсри дехIдихьили сари. ДурхIни багьуди касес гьуцIлизиб саби эс дигахъира, амма дигахъули вара нушала дурхIнас бучIес? Вирхес дигулра илкьяйда биъниличи. Цаибил базла байхъала ахирличи биркули саби бахъхIи агарли. Нуни сагаси журала багьудила дигIяндешуни белгидарес вирули ахIенра. Гьалав ну учIухIели, цаибил класслизир хIябал жузра илдицад тетрадунира дирутири. СуратикIнила яра бузерила дарсличи альбом ва пластилин дихутири. Гьанна жузала лугIи белгибарес вирули ахIен. БиштIатала папка халатасра бихес декIли саби. БелчIудила программа барсбиубли саби, амма багьудила даража дебали усалбикили саби.
Лер школабазир наб гIяхIдизурти сагадешунира. Гьаргти дурсри кадирхьни. Гьаларра илди дирули дири, амма дебали камли. Илгъуна дарсличи машгьурти, тамашала адамти, гIялимти, хIянчизарти жибирули саби ва дурхIначил ихтилатбирахъули саби. ЦацадехIти дурсри мягIничерти бурхIначил, байрамличил, декIар-декIарти анцIбукьуначил дархдалсахъули дирар. Набра имканбакIиб чумал илдигъунти дарсличир бутIакьяндеш дарес.
ХIера, гьалабван МикIхIила шилизибси лицейлизиб илгъуна гьунибаъни дураберкIибсири. Чедирти классунала дурхIначил гьаргси дарс барибсири. Дарсличи жибарибти-ургаб лебри Украинализиб дурабуркIуси дявила хасси балбуцлизир бутIакьяндеш дарибси, гьанна сагали школализив учительли узуси Дауд МяхIяммадов, МикIхIила шила мижитла имам МяхIяммад Итонов, МикIхIила шилизибси спортла ва физкультурала школала директор Чамкур Чамкуров, МикIхIила шила администрацияла бекI Руслан Кьурбанов ва ну — журналист Руслан Ражабов. Ил дарс багъишлабарибсири Беслан шагьарлизиб вайнукьабани дураберкIибси чябхъин гьанбиркахънилис ва Дунъяла КIиибил дергъ ахирличи бикибхIейчирад 81 дус дикнилис.
Чамкур Чамкуровли Дунъяла дургъби секьяйда ахирличи дикибтирил гьанбушиб. Илдани халкьлис хибси палакатдешличила ва децIличила буриб, хаслира нушала улкала адамтас. Дауд МяхIяммадовли дявила хасси балбуцличила (СВО), илар бутIакьяндеш дирути нушала республикализибадти бургъантачила, илдала гъабзадешличилара гьанбушиб. Шила бекI Руслан Кьурбановли Беслан шагьарлизиб кабикибси хIиллаличила гьанбикахъиб. ДурхIнази сахъдеш барахъес, вайнукьабала арилизи хIебикахъес ва Интернетлизиб урехи хIебиахъес дарес хIяжатти секIайчила буриб.
Халкьлис халаси децI ва дард хибси такьсир сабри Беслан шагьарлизиб дураберкIибси. Ил дурхIначи бяхIчиаибсири. Илди чула уряхIти хьулани детерхахъес ибси мурадличил ясирбуцибтири. Гьанна бурес къиянни саби чили бегI гьалаб къяйкбарибсирил, амма 334 адам алхунтири, илдазибад 186 дурхIя. Ил анцIбукьличила бекIлил хъумартес асухIебирар. ХъумартурхIели саби илгъуна анцIбукь сагали бетурхуси. Политикализибти вайнукьабани гIядатла адамла гIямру селизилра дирули ахIен. Илдас бекIлибиубси саби давла ва хIукумат (власть).
ИшбархIи багьахъни касес вирути сурсатуни дебали дахъдаили сари. Гьамадли саби багьуди касесра илди сурсатуни пайдаладарес. Амма ил багьуди сархес гьуцIбикIути дурхIнира камбиубли саби. ЧIянкIли багьудичевси адам азадси сай цархIилтала асарлизивад. ДурхIни дарсличиб лехIкахъили кабиилри, илдала суалти аги. Нушала замана дурсрачи бакIибти гIяхIлази суалти дахъал дири. Марлира, аги итхIели Интернет. Жавабти жузазирад ва мугIяллимтазирад сарри даргес вируси. Дебали урехила замана саби ишбархIи. ЖагIялла бархIиличи умут леб викIес вирули ахIен. Сахъдеш дакIудирес хIяжатли саби.
ДахъхIи агарли выборти детурхути сари. Илдазир бутIакьяндеш дарая ва хIушала уркIи кабизурси, улкалис манпагIятвиэси адамлис тIама бедая. ИшбархIи хIуша лехIкахъадалли, балкIси баркьудиличи — жагIял ил хIечира къячбилкуси саби.