Багьудлумала БархIи, сентябрьла 1-личиб, Хайдакьла районна Чумлила шилизиб, «Багьуди» бикIуси миллатла проект хIясибли лутIи-хьулчилизибадал къу­лайбарибси Д.В.ГIялибековла уличилси школа байрамла аги-кьяйдализиб абхьиб.
БелчIудила сагаси дус бехIбихьниличил школала бучIанти, бегIти ва педагогуни мубаракбариб Хайдакьла районна бекI Запир ХIя­сановли: «Лерилра багьудлумала Бар­хIи­личил ва белчIудила сагаси дус бехI­бихь­ниличил мубаракдирулрая! Цаибил класслизи аркьути дурхIнас ишбархIи сагати гIямру дехIдирхьули сари, выпускникунас школализиб буркIуси бегIлара гIергъиси дус саби, цархIилтас биалли — се-биалра сагаси багьес гIяхIси имкан, хьу­ланачи-кьасаначи кайцIуси цагьатIи ганз».
Хаслира илини пикри бяхIчиаиб дуцIрум школала Юрт къулайбарниличи улкалис ва республикалис бекIдеш дирантас баркалла багьахъур, шимазир илдигъунти мягIничерти проектуни гIямрулизир детурхахъес икьалабирнилис.
Школала бучIанти илкьяйдали мубаракбариб ДР-ла Халкьла Собраниела депутат ве­таэс кандидатура гьалабихьибси Кьурбан ГIялиевли: «ИшбархIи лебталалра цахIнабси байрам саби. Хаслира ил мягIничебси саби цаибил класслизи аркьути дурхIнас. Илдас багьудлумала дунъялизи тамашаласи гьуни бехIбирхьур. Нуша лерилра уржили ца регионнизир хIердирулра. Илизиб саби нушала цIакьра. Лебтанилра цали цала уркIи иргъули, хIур­матбирули ва бузерилизир гьарбизуни дирахъули дигулра. Сагабарибси школализиб белчIудила дус сабухъчебсили бетааб!»
Школала бучIанти мубаракбирули, илкьяйдали гъайбухъун Хайдакьла районна депутатунала собраниела председатель МяхIяммад МяхIяммадов, Чумлила шила бекI Анвар МяхIяммадов ва школала директор СултIан ГIяхIмадханов. Илдани дурхIнас белчIудилизир гьарбизуни, гIяхIти юлдашуни ва тамашалати дурсри далгун, педагогунала бузери лебтанилра кьиматлабирули, бегIти биалли – дурхIнала хIясилтачи разибирули дигни аргъахъиб.
Байрамла программа балкьаахъурлири школала бучIантанира. Илдани цалабикибтала гьалар назмурти ва далуйти зайдухъахъун. БегIлара жигарчебти дурхIни Грамотабачил шабагъатлабариб.
Балбуц ахирличи бикахъиб сагабарибси школа абхьили. З.ХIя­сановли ва С.ГIяхI­­­мадовли хIунтIена чял кьицI­­бариб. Илала гIергъи рай­онна бекIли балбуцла бу­тIа­­кьянчибачил варх къулай­да­рибти кабинетуни хIер­да­риб.
Школа къулайбарибси саби баягъи проектла «Школала багьудила кабизуназир дарсдешуни» ибси балбуцла дазурбазиб. Юртла дуралати куц-кабиз жагадарес, хутIла гьимирти дарсдарес, ванадешличил классуни гIердурцути гIягIниахълуми сагадарес имканбакIиб. ЖаняхIлизир сагати плиткаби кадихьиб, духIнарти ва дуралати унзурби дарсдариб.
Школала бучIантала гьанна багьудлуми кайсес хIяжатти лерилра шуртIри лер. Гьарли-марли, ахъси даражаличир дахъал хIянчи дарили сари. Школа багьесагарли барсбиубли саби. ИшбархIи ил дурхIнас бучIес ва гьалабяхI башес дигеси, ишхIелла тIалабуначи балбикибси майданни бетаурли саби. Миллатла проектли нушала школабас гIяхIла шайчир дарсдешуни акIахъес имканти гьаладирхьули сари. ХIера, илкьяйда биъни марбариб Чумлила школали», — буриб районна бекIли, дарибти хIянчи ахтардидарили гIергъи.
Чумлила школа «Багьуди» бикIуси миллатла проект хIясибли, белчIудила сагаси дуслис лутIи-хьулчилизирадал къулайдарибти Хайдакьла районна хIябал школализибад цали бетаур. Ил бархIи ХIуллила ва Гъазияла сагадарибти школабанира чула унзурби бучIантас гьаргдариб.