Дубуртар Улкализиб халаси спортлизи ахъибти жагьилтани гIяхIти хIясилти чедиахъни нушаб якьинни саби. Чула цIакьаначи бирхули, спортзаланазиб гьар бархIи ибкьли бузухIели сари илдани сархибдешуни дирахъутира. Спортла декIар-декIарти журабазир гIяхIти хIясилти чедиахъули, улкализибцунра ахIи, дунъяличибра нушала Дагъистан машгьурбарибти спортсментазивадли ца сай Сергокъалала районна Мурегала шилизивадси ХIяжимурад Тяймазовра. Илини бурни хIясибли, сай 13-личивад 17 дусличи бикайчи каратэлизи ахъибсири, гIур – азадли мушулвашнила журализи шурухъунсири.
«Ил журализир сархибдешуни диахъес багьандан, виштIали левай спортлизи ахъес чараагарси саби. Цалра тренерлис ну вяркъес хIейгули, кIел дусцадхIи калунра. Илди набзи бархьаначи бикIулри: «ХIу халасири, кьанни саби азадли мушулвашнила журализи ахъес». Чумра спортзал дарсдарира, гIяхIси тренер варгес дигули. Ахирра-ахир тренер К.ХIясановличил къаршиикира ва, «Динамо» заллизив тренироватьвикIес вехIихьира.
Гьалар-гьаларти кIел дус абзаначиб гьархIебилзули калунра, амма уркIиагархIейубли, мурадуни-кьасани гьала тIашдатурли, баркьуди даимбарира. ХIябэсил дуслизиб лерилрара-сера абзаначир сархибдешуни диахъубра: 2001-ибил дуслизиб МяхIячкъалала цаибил мер багьанданси абзличиб, ДР-ла цаибил мер багьанданси абзличиб, Россияла цаибил мер багьанданси абзличиб цаибти мерани касили, Европала цаибил мер багьанданси абзличи путёвка сархира. Ил абз Турциялизиб бетерхурсири ва нуни 3-ибил мер касира. Турциялизиб набчил барх нушала машгьурти спортсменти МяхIяч МуртузагIялиевлира Мавлет Батировлира Дагъистан гьалабихьибсири».
2003-ибил дуслизиб Казахстайзиб бетерхурси прикаспийский улкназибадти студентунала халкьани-ургарти абзаначибра цаибил мер касес имканбакIибсири илис. Илаб ХI.Тяймазовли ДГУ гьалабихьибсири. ИлхIели Казахста вакилтани спортсменничи пикри битIакIибсири ва ил чучи шурухъахъес тиладибарибсири. ХI.Тяймазовли илдала пикри кьабулбарибсири ва Казахстайс гьаларти мерани сархутири. Казахста спортла мастерла уличи лайикьикили, Дагъистайзи чарухъун. Гьаларти кIел дус азадли мушулвашнила журализив калун, илала гIергъи хъали-цIа акIахъуб ва спорт тамай лайкабакIиб. ХI.Тяймазов Избербашлизив хIерирули сай ва, ил 3 дурхIяла дудеш сай. 7-8 дус дикили гIергъи сайри ил сагадан халаси спортлизи чарухъунсира. ХIяжимурад Тяймазовли Избербаш шагьарла Собраниела депутат МяхIяммад Ражабкьадиевичлис баркалла балахъули сай, спортлизи сагадан чарухъунси замана сай гIевуцнилис.
2016 ибил дусличирадли лерилра абзаначир бутIакьяндеш дирули, азадли мушулвашнила, джиу-джитсула ва грэпплингла журабазир дебали гIяхIти хIясилти чедиахъули сай.
ИшбархIилис спортсмен гIяхIцад медальтачи ва умачи лайикьикили сай: азадли мушулвашнила шайчибси халкьани-ургабси даражала мастер, Европала цаибил мер багьанданси абзла призёр, Россияла жагьилти-ургав чемпион, кьалтинна мастертала ургарти азадли мушулвашнила шайчирти абзанала верхIна чемпион, азадли мушулвашнила шайчив дунъяла чемпион…
Ишдусла июньна бехIбихьудличиб Донничибси Ростов шагьарлизиб бетерхурси бразилиялантала джиу-джитсула шайчибси Россияла абзличир бутIакьяндеш дарили, цаибил мер сархиб ва мургьила медальличи лайикьикиб. Илис, илкьяйдали, Смоленск шагьарла Советла депутат Максим Барановла шайзибад Баркаллала кагъарра бедиб.
БусягIятла замана ХI.Тяймазовли Избербашлизибси Кубаевла уличилси спортзаллизир тренировкаби дурадуркIули сай. Спортлизир сархибдешуни дирахъни ва арати гIямру дуркIниличи жибирни багьандан спортсмен шагьарлизибти жагьилтас гIибратли ветаурли сай.
Гьаннала гIергъира сархибдешуни дирахъес виэсли, ХIяжимурад Тяймазовлис арадеш булгехIе.
П.Мирзаева
