РахъхIи зягIипли кали гIергъи, ноябрьла 17-личир 77 дусла гIямруличиб уркIи тимхъхIебикIули тIашбизур ГI.Батирайла уличилси Даргала музыкала-драмала театрла пагьмучерси гIяртистка Загьидат Ибрагьимовна Мусаевала.

З.Мусаева акIубси сари 1948 ибил дусла сентябрьла 10-личир Сергокъалала районна УбяхI МахIаргила шилизир. 1968 ибил дуслизиб илини Ереваньна художественно-театральный институт таманаибсири.  Загьидат Ибрагьимовна Даргала театрлизир 2010-ибил дусла февральличирад рузусири ва 15 дусла духIнар сценаличир хьунул адамла гIяхIцад пергер ролани гьаладихьиб.

Сунела пагьмула биографиялизир Загьидат Мусаевани драмала ва комедияла гIячихъти сипатуни акIахъуб: ГI.Абу-Бакарла «Гончарный круг» спектакльлизиб Сельбила, Р.БяхIяммадовла «КьутIкьуси кьисмат» спектакльлизиб МухIлисатла, А.Атаевала «Васият» спектакльлизиб Аминатла, Р.ГIямаровла «Чинара дила неш?», Р.ХубецIовала «Нешла уркIи», С.ГIялиевала «Гулжанат», ХI.ГIялиевла «Къагъси гьанкI» («Бредовый сон») спектакльтазир нешанала ва дахъал цархIилтира.

Къиянни саби вирхаэс Загьидат Мусаева нуша-ургар агниличи. Гьаларванра илини сценаличир пергер ролани дузахъутиригу… Мурталра разиси, гIямруличи дигичерси илини сари-алавтира рухIла ванадешли ванабирусири. Тяп илгъунали кавлан ил бархкьябала, гъамтала ва сари ралутала гьанбикуназир.

Даргала театрлизир рузуси илала рурси Шагьризатлизи ва узи-уршилизи халаси пашмандеш балахъули саби Загьидатличил барх бузутани ва театрлис бекIдеш дирутани. Илдачил бах нушанира, газетала хIянчизартанира, децI буртIулра.

Загьидат Ибрагьимовала шаласи сипат нушала уркIбазиб даимлис кавлан.

«Замана» газетала агьлу